Mic 1 | TukCyr16 | STEP | Яхуда патышалары Ётамың, Ахазың ве Хизкияның дөврүнде морешетли Мика пыгамбере Самария ве Иерусалим барада Реббиң сөзи аян болды.

‏ Micah 1

1 Яхуда патышалары Ётамың, Ахазың ве Хизкияның дөврүнде морешетли Мика пыгамбере Самария ве Иерусалим барада Реббиң сөзи аян болды.

Самария билен Иерусалим хөкүм эдилйәр

2 Әхлиңиз эшидиң, эй, халклар!
Гулак гоюң, эй, земин ве онуң яшайҗылары!
Хөкмүрован Реб мукаддес месгенинден
сизе гаршы гүвәлик эдер.
3 Ине, Реб Өз меканындан чыкып,
ер йүзүне инип, байырларда йөрәр.
4 Даглар Онуң аяк астында эрәр,
дерелер бөвсүлип,
отда эрейән мум ялы,
кертден инйән сув дейин болар.
5 Буларың бары Якубың несиллериниң языгы,
Ысрайыл халкының гүнәлери үчиндир.
Якубың несиллериниң языгына ким себәпкәр?
Самария дәлми?
Яхуданың бутлара сеждегәхи ниреде?
Иерусалимде дәлми?
6 «Шонуң үчин Мен Самарияны харабачылыга,
үзүмчилик ерине өврерин.
Дашларыны дерә дөкүп,
дүйплерини ачык гоярын» диййәр Реб.
7 «Әхли бутлары бөлек-бөлек эдилер,
харам газанчларының бары ода якылар,
бутларының барыны ёк эдерин,
чүнки булары лолы газанҗы билен топлады.
Олар ене-де лолы газанҗына өврүлер» диййәр Реб.

Миканың агысы

8 Мунуң үчин мен аглап, дады-перят эдерин.
Эшиксиз ве аякялаңач гезерин.
Шагаллар кимин увларын.
Дүегушлар кимин гөзяш дөкерин.
9 Самарияның ярасына эм ёк.
Ол Яхуда гелип етди.
Халкымың дервезесине,
Иерусалиме барып етди.
10 Муны Гатда айтмаң ^{▼▼Гатда айтмаң – еврейче Гат ве айт сөзлериниң айдылышы меңзешдир.},
ахы-налаңызы бес эдиң;
Бейтлегапарда ^{▼▼Бейтлегапар – бу сөз гум өйи диймеги аңладяр.}
гамгынлыкдан гума тогаланың.
11 Эй, Шапыр ^{▼▼Шапыр – бу сөз якымлы диймеги аңладяр.} халкы!
Ялаңачланып, утанч ичинде өтүң.
Саванан халкы чадырындан чыкмасын ^{▼▼Саванан… чыкмасын – еврейче Саванан ве чыкмак сөзлериниң айдылышы меңзешдир.}.
Бейтесел халкының өзи яс тутяр,
ондан сизе ярдам болмаз.
12 Маротың ^{▼▼Еврейче Марот ве аҗы сөзлериниң айдылышы меңзешдир.} халкы ягшылыга сабырсызлык билен гарашяр,
эмма Реб Иерусалимиң дервезесине бела индерди.
13 Эй, Лакыш халкы, йүврүк аты ^{▼▼Лакыш халкы, йүврүк аты – еврейче Лакыш ве йүврүк ат диен сөзлериң айдылышы меңзешдир.} араба гош.
Сен Сион гызының ^{▼▼Сион гызы – бу Иерусалим халкы диймекдир. Сөзлүге серет.} гүнәсиниң гөзбашысың,
чүнки Ысрайылың языгы сенден чыкды.
14 Инди Морешетгата хошлашык совгадыны берерсиң.
Акзып ^{▼▼Акзып – бу сөз алдав диймеги аңладяр.} обасы Ысрайыл патышаларына дузак болар.
15 Эй, Мареша илаты,
Реб галаңыза басыбалыҗы ^{▼▼Мареша… басыбалыҗы – еврейче Мареша ве басыбалыҗы сөзлериниң айдылышы меңзешдир.} гөндерер.
Ысрайылың бейик ёлбашчылары
Адуллам галасында гизленер.
16 Сөйгүли огулларыңыза
яс тутмак үчин сачыңызы сырың.
Башыңыз чайкелиңки кимин кел болсун,
чүнки чагаларыңыз сүргүн эдилер.