‏

Б. э. өң 586-нҗы йылда Иерусалим шәхери бабыллылар тарапындан вейран эдилйәр. Абадя пыгамбериң китабы хем шу вакаларың болуп гечен дөврүнден соң язылыпдыр дийип хасапланыляр. Иерусалимиң вейран эдилмегине ысрайылларың гадымы душманы болан эдомлылар гаты бегенйәрлер. Олар диңе бегенмек билен чәкленмән, басыбалыҗылара көмек берип, шәхери талаярлар. Абадя пыгамбер Худайдан ылхам алып, ысрайыл халкының душманлары болан эдомлыларың ве бейлеки халкларың җезаландырылҗакдыгы барада пыгамберлик эдйәр.

Мазмуны

Эдом юрдуна гаршы пыгамберлик 1:1-14

Реббиң гүни 1:15-21

‏ Obadiah

Эдом юрдуна гаршы пыгамберлик

1Абадя гелен аянлык:

Хөкмүрован Реб Эдом барада шейле дийди:
«Миллетлере векилиң иберилендигине хабар гелди.
Ребден гелен векилиң: „Туруң, Эдома гаршы сөвеше чыкалың!“диен хабарыны эшитдик.
2Эдом, Мен сени халкларың арасында иң песи эдерин
сен бүтинлей рысва боларсың.
3Текепбир йүрегиң алдады сени.
Сен белентде, гаяларың ховпсуз еринде яшаяң,
„Мени песе – ере ким дүшүрер?“дийип, калбыңдан айдяң.
4Эгер сен бүргүт дейин ёкары галсаң-да,
хөвүртгәңи йылдызларың арасында гойсаң-да,
ол ерден Мен сени ашак дүшүрерин!»

Муны Реб айдяндыр.
5«Сениң ичиңе огрулар гирдими я гиҗеки талаңчылар?
Огрулар диңе өзүне герегини огурламазлармы?
Эгер үзүм багыңа гирселер,
саңа-да миведен галдырмазлармы?
Эмма сен нәхили вейран болдуң!
6Ысав несли ничик таланды,
онуң хазынасы дөрүлди.
7Сен билен саламатлыкда яшанлар сени алдадылар.
Әхли аркадашларың сени серхетден чыкардылар.
Биле дуз ийшен адамларың сенден рүстем чыкдылар.
Муны сен аңшырмадың».
8«Шол гүн – Реб диййәр –
Мен Эдомың акыллы адамларыны
ве пайхаса дүшүнйәнлерини
Ысав дагында гырманмы?

9Тейман, сениң батырларыңы горкы-ховсала басар.
Оларың бары Ысав дагында гырлып ёк эдилер.

10Доганың Якубың неслине залымлык эдениң үчин,
бүтин бетнам боларсың ве эбеди ёк эдилерсиң.
11Кесекилер оларың эмләгини талан гүнүнде,
сен кеседе дуруп серетдиң.
Гелмишеклер дервезеден гиренде,
Иерусалим үчин биҗе чекиленде,
сен-де оларың бири ялы болдуң.
12Доганың – Яхуданың неслиниң
бетбагт гүнүнде гүлмели дәлдиң.
Олара бела инен гүнүнде,
сен хешелле какмалы дәлдиң.
Оларың хасрат гүнүнде магтанмалы дәлдиң.
13Сен Мениң халкыма бела гелен гүнүнде,
оларың дервезесинден гирмели дәлдиң.
Оларың гыргынчылык гүнүне ичиңден бегенип серетмек,
хеләкчилик гүнүнде оларың эмләгине галташмак
хич догры дәлди.
14Ёлуң чатрыгында дуруп,
гачан адамлары тутмалы дәлдиң.
Хасрат гүнүнде аман галанлары
душмана бермели дәлдиң.

Реббиң гүни

15Чүнки, Реббиң әхли миллетлере хөкүм этҗек гүни голайлап гелйәр.
Эй, Эдом, нәме эден болсаң, саңа-да шол болар.
Эдениң башыңа дүшер.
16Чүнки, сиз, яхудалар,
Мениң мукаддес дагымда ичдиңиз.
Әхли миллетлер-де хемише шейле ичерлер ве ювудып, асла болмадык ялы боларлар.
Себәби җеза кәсесинден ичерлер.

17Йөне Сион ▼

▼Сион – бу Иерусалим шәхериниң бейлеки ады. Сөзлүге серет.

дагында җезадан халас галанлар болар
ве Сион дагы мукаддес болар.
Якубың несли өз мүлкүне говшар.
18Якубың несли от болар, Юсубың зүряды алава дөнер.
Одуң саманы якышы ялы, олар Ысавың неслинден ыз гоймаз.
Ысавың илинден гутуланы болмаз.
Чүнки муны Реб айтды.
19Негеп чөлүниң халкы Ысав дагыны эеләр.
Байырлыкдакы адамлар пилиштлилериң топрагыны эеләрлер.
Олар Эфрайым хем Самария топрагына ченли етерлер.
Бенямин несли Гилгады эеләр.
20Сүргүн эдилен ысрайыл сөвешиҗилери
Кенганың Сарепата ченли ерлерине эе боларлар.
Иерусалимден Сепарада сүргүн эдиленлер Негепдәки
галалары эеләрлер.
21Еңиҗилер Ысав дагларының үстүнден хөкүм сүрмек үчин,
Сион дагының үстүне чыкарлар.
Патышалык Реббиңки болар».