‏ Proverbs 22

1Ягшы ат-абрай көп байлыкдан артык,
сылаг-хормат хем күмүш-алтындан ягшыдыр.

2Бай билен гарыбың бир меңзешлиги бар,
оларың икисини-де ярадан Ребдир.

3Пайхаслы адам ховпы гөрүп гизленйәндир,
надан гөни гидип җеза аляндыр.

4Кичигөвүнлилигиң, Ребден горкмагың
сылагы байлык, абрай ве яшайышдыр.

5Эгри адамың ёлунда тикенлер ве дузаклар бардыр.
Өз җанына хайпы гелйән олардан даш дурар.

6Чаганы догры ёл билен тербиеле,
улаланда хем шондан совулмаз.

7Байлар гарыпларың үстүнден хөкүм сүрйәндир,
бергили-де карз берениң гулудыр.

8Адалатсызлык экйән бела-бетер орар,
газабың таягындан хеләк болар.

9Сахы адам ялканяндыр,
чүнки ол чөрегинден эҗизлере берйәр.

10Масгаралайҗыны ков, шонда җенҗел ёк болар,
төхметдир-даваның ызы кесилер.

11Пәк йүреклилиги сөййән,
мерхеметли сөзлейән патышаның якыны болар.

12Реббиң гөзлери билими гораяндыр,
вепасызың сөзлерини болса ялана чыкаряндыр.

13Ялта диййәр: «Дашарда арслан бар,
ёлда ол мени парчалар».

14Азгын аялың агзы дүйпсүз горпдур,
Реббиң газабына душан оңа йыкылар.

15Чаганың йүрегинде акмаклык көк уряндыр,
йөне тербие таягы оны акмаклыкдан узаклашдыряндыр.

16Бай болмак үчин гарыплары эзйән хем-де
байлара совгат берйән диңе гарып дүшер.

17Гулак ас-да, акылдарларың сөзүни диңле,
мениң өвретҗек затларыма дыкгат эт.

18Сен олары калбыңда сакласаң,
оларың әхлиси дилиңде болса якымлы болар.

19Сениң Реббе ынанҗың болары ялы,
мен шу гүн саңа, хут саңа өвредйәрин.

20– 21Гайданыңда сени ёлланлара
чын сөз хем ынамлы җогап берериң ялы,
мен саңа маслахат хем билим үчин
отуз несихат язып берейин.

22Гарыбы гарыплыгы себәпли талама,
мәтәҗи меҗлисде эзме.

23Чүнки оларың тарапыны Реб тутар,
олары таланы Ол талар.

24– 25Оларың ёлларына өвренишип,
җаныңы дузага дүшүрмезиң үчин,
гахарҗаң адам билен тиркешме,
гызма адам билен гатнашык ачма.

26Бири билен эл беришме,
бирине кепил болянлардан болма.

27Төлемәге задың болмаса,
ашагыңдакы дүшегиңи алмазлармы нәме?

28Ата-бабаң гоян
гадымы арачәк дашыны сүйшүрме.

Ишине өкде адамлары гөрйәңми?
Олар гарамаягың хызматыны этмез, патышаларың хузурында дурар.
29