‏ Proverbs 2

1Оглум, мениң сөзүми кабул эдип,
буйругымы калбыңда сакласаң,

2даналыга гулак асып,
дүшүнҗә йүрегиңи берсең,

3хава, пайхасы чагырсаң,
дүшүнҗә ялбарсаң,

4оны күмүш ялы гөзлесең,
хазына дек агтарсаң,

5шонда Ребден горкмаклыга акыл етирип,
Худайы танамагы башарарсың.

6Чүнки даналык берйән Ребдир,
билим хем дүшүнҗе Онуң агзындан чыкяндыр.

7Ол догручыллара ярдам берйәр,
садыклыкда гезйәнлере галкан боляр.

8Ол адалат ёлларыны гораяр,
Өзүне садыкларың ёлуны гораяр.

9Шонда догручыллыга ве адалата акыл етирерсиң,
адыллыга ве ягшы ёла дүшүнерсиң.

10Чүнки даналык сениң йүрегиңе гирер,
билим калбыңа хош якар.

11Акыллылык сени горар,
дүшүнҗе саңа середер.

12Даналык сени яман ёлдан,
эрбет геплейәнлерден халас эдер.

13Олар догры ёлы ташлап,
гараңкылык ёлундан йөрейәрлер.

14Яман иш эдип шатланярлар,
яманың эрбетлигине гуванярлар.

15Оларың ёллары эгридир,
ёдалары өврүмлидир.

16– 17Худай билен әхтини унудандан,
башдашындан айрылышан аялдан,
дили сүйҗи кесеки зенандан даналык сени халас эдер.

18Чүнки шейле зенаның өйи өлүме элтйәр,
ёллары земиниң тейине баряр.

19Онуң янына гирен ызына доланып билмез,
гайдып яшайыш ёлуна етмез.

20Шонуң үчин ягшы иш эдйәниң ёлундан йөре,
догручылларың ёлуны тут.

21Чүнки юртда догручыллар мекан тутарлар,
садыклар шол ерде галарлар.

Йөне эрбетлик эдйәнлер ир өлерлер,
хайынлар көки билен гырларлар.
22