‏ Proverbs 6

1Оглум, карз алҗага кепил гечип,
оңа дерек эл берен болсаң,

2өз дилиңден дузага дүшенсиң,
өз сөзлериң билен тутулансың.

3Ондан халас болмак үчин шейле этмели, оглум.
Якының пенҗесине дүшениңе гөрә,
бар-да, онуң өңүнде өзүңи кичелт.
Ялбар.

4Гөзүңе укы берме,
габагыңы юмма.

5Авчыдан гачан җерен кимин,
гушбазың элинден сыпан гуш кимин өзүңи гутар.

6Эй, ялта, гарынҗаның янына бар;
оларың ишлейшине серет-де, акыл ал!

7Оларың не баштутаны, не гөзегчиси,
не-де хөкүмдары бар.

8Томусда өз иймитини топлаярлар,
оракда өз азыгыны йыгнаярлар.

9Эй, ялта киши, сен хачана ченли ятҗак?
Укудан хачан оянҗак?

10– 11Биразаҗык укламак, бираз иркилмек үчин,
гышарып гол говшураныңда,
гарыплык гаракчы ялы,
мәтәчлик яраглы адам мысалы башыңдан инер.

12Дейюс билен яманың
ялан яшаяр агзында.

13Ол гөзлерини гыпяр, аяклары билен ышарат эдйәр,
бармагы билен үмлейәр.

14Йүрегинде мекир ниет бар,
мыдама дава-җенҗел турузяр.

15Шонуң үчин оңа бетбагтчылык дуйдансыз инер;
пагыш-пара болар, шыпа тапылмаз.

16Реб алты зады,
догрусы, еди зады йигренйәндир:

17текепбир гөзи, яланчы дили,
бигүнә ган дөкйән эли,

18яман ниетли йүреги,
яманлыга ёртян аяклары,

19ялан ягдырян галп шаяды,
доганлар арасында дава дөредйән адамы.

20Оглум, атаң буйругыны берҗай эт,
энең өвүтлеринден йүз өвүрме.

21Олары мыдам йүрегиңде сакла,
бойнуңа багла.

22Ёлбелет боларлар саңа йөрән махалың;
горарлар сени ятан махалың;
гүррүңдеш боларлар оя вагтыңда.

23– 24Яман аялдан, сүйҗи дилли зынахор аялдан горамак үчин,
буйрук – чыра,
өвүт – нур,
кәйинч-тербие – яшайша ёлдур.

25Онуң гөзеллигине йүрегиңден хөвес этме,
кирпиклериниң есири болма.

26Лолының бахасы бир дөвүм чөреге дурса-да,
бу кемчин гымматлы җаны авлаяндыр.

27Ким этегинде от гөтерер-де,
эшигини якмаз?

28Ким көзүң үстүнден йөрәр-де,
дабаны көймез?

29Якынының аялына янашан хем шейле боляр;
оңа эл дегрен җезасыз галмаз.

30Ачка гарныны доюрмак үчин огурлан
огрыны йигренйән дәлдирлер ахырын?

31Йөне ол тутулса, еди эссе эдип гайтарар,
өйүниң бар байлыгыны бермели болар.

32Зына эдйән адам кемакылдыр,
ол өз җаныны хеләк эдйәр.

33Ол тенине яра алар, биабрайчылыга учрар,
пәкленип болмаҗак уяда галар.

34Чүнки габанҗаңлык эркек кишини газапландыряр,
ол өч аланда, хич рехим этмез.

Ол сениң пара-пешгешиңе бакмаз,
нәче төлесең-де, хич разы болмаз.
35