‏ Psalms 144

Давудың Ребби шөхратландырмак үчин айдан мезмуры

1Эй, Худайым, мениң Патышам! Мен Сени бейгелдерин,
Сениң адыңа эбеди ве бакы алкыш айдарын.
2Саңа хер гүн алкыш айдарын,
адыңы эбеди ве бакы шөхратландырарын.
3Реб бейик, Ол ченсиз өвгә мынасып,
Онуң бейиклиги ынсан аңына сыгмаз.
4Сениң ишлериң несилербойы тарып эдилер,
Сениң гудратлы ишлериң хем ыглан эдилер.
5Сениң белентлигиңиң шанлы шөвкети,
аҗайып ишлериң барада мен ойланарын.
6Олар хайбатлы ишлериң гудратындан гүррүң берерлер,
мен хем Сениң бейикдигиңи ыглан эдерин.
7Сениң болелин ягшылыгың дабарасыны беян эдерлер,
Сениң догрулыгың барада нагма айдарлар.
8Реб мерхеметли хем рехимли,
гиң гөвүнли, садык сөйгә байдыр.
9Реб хеммелер үчин ягшыдыр,
Ол әхли яраданларына мерхемет эдйәр.
10Я Реб, әхли ишлериң Саңа шүкүр эдерлер,
әхли садыкларың Саңа алкыш айдарлар.
11– 12Сениң шалыгыңың шанлы шөвкетини,
гудратлы ишлериңи ынсанлара билдирмек үчин,
олар Сениң шалыгыңың шөхратыны айдарлар,
Сениң гудратыңдан гүррүң берерлер.
13Сениң шалыгың – мүдими шалык,
хөкүмдарлыгың – несиллербойы.
Реб әхли сөзлеринде вепадар,
Ол әхли ишлеринде рехимдар ▼

▼Реб әхли сөзлеринде вепадар, Ол әхли ишлеринде рехимдар – бу сөзлер кәбир голязмаларда ёк.

.
14Реб сөйгетлейәр әхли йыкыланлары,
Ол дикелдйәр әхли бүкүленлери.
15Хеммәниң гөзлери Саңа умыт билен гараяр,
Сен өз вагтында оларың рыскыны берйәрсиң.
16Сен элиңи ачярсың,
әхли җандарлара ислән задыны берйәрсиң.
17Реб әхли ёлларында догрудыр,
Ол әхли ишлеринде рехим-шепагатлыдыр.
18Реб Өзүни чагырянларың хеммесине,
Өзүни чындан чагырянларың хеммесине якындыр.
19Ол Өзүнден горкянлары мырадына етирйәр,
оларың налышыны эшидйәр ве халас эдйәр.
20Реб Өзүни сөййәнлериң әхлисини гораяр,
эмма эрбетлериң барыны Ол хеләк эдер.
21Мениң агзым Реббе өвгүлер айдар,
җанлы-җандарларың бары асырларбойы
мукаддес адына алкышлар айдар!