Psa 2 | TukCyr16 | STEP | Миллетлер арасындакы башбозарлык нәме? Халклар нәмә бидерек питне турузяр?

‏ Psalms 2

1 Миллетлер арасындакы башбозарлык нәме?
Халклар нәмә бидерек питне турузяр?
2 Реббе ве Онуң сайланына гаршы
дүнйә шалары аяга галяр;
хөкүмдарлар биригйәр ве баш галдыряр.
3 Олар шейле диййәр:
«Сыпырып ташлалың гандалларыны
хем-де гыралың зынҗырларыны».
4 Гөклерде отуран Таңры оларың үстүнден гүлйәр
хем-де олары масгаралаяр.
5 Шонда олара гахар билен йүзленер,
газабында олары эймендирер:
6 «Мукаддес дагым Сионда ^{▼▼Сион – бу Иерусалим шәхериниң бейлеки ады. Сөзлүге серет.}
Мендирин Өз патышамы отурдан».
7 Патыша: «Мен Реббиң перманыны
ыглан эдейин» диййәр.
«Сен Мениң оглумсың, – дийди Ол маңа –
бу гүн Атаң болдум Мен.
8 Менден диле, саңа берейин
миллетлери мирас хөкмүнде,
тутуш әлем-җаханы мүлк хөкмүнде.
9 Сен олары демир хасаң билен дөверсиң,
күйзегәриң голчасы дей чым-пытрак эдерсиң».
10 Шейлеликде, эй, патышалар, пайхаслы болуң;
дүнйә хөкүмдарлары, шундан хабарлы болуң:
11 Реббе гуллук эдиң сиз горкы билен:
хем галпылдаң, хем-де шатланың.
12 Оглы өпүң, ёгса ол газаба мүнер,
сиз хем хеләк боларсыңыз өз ёлуңызда,
чүнки тиз туташяр онуң газабы.
Оны пена эдинйәнлериң әхлиси багтлы.