‏ Psalms 24

Давудың мезмуры

Алеф 1Я Реб, мен көңлүми Саңа гөге гөтерйән.
Бет 2Эй, Худайым, мен Саңа бил баглаян;
мен утанҗа галмайын;
душманларым менден үстүн чыкмасын.
Гимел 3Саңа интизарлар галмасынлар утанҗа,
нәхак ере хыянат эдйәнлер галсын утанҗа.
Далет 4Я Реб, маңа салгы бер Өз ёлларыңы
хем-де өврет маңа ёдаларыңы.
Хе 5Мени хакыкатыңда йөрет хем маңа өврет,
чүнки мени халас эдйән Худай Сен;
мен узаклы гүн Саңа интизардырын.
Зайин 6Я Реб, ядыңа сал мерхеметдир садык сөйгиңи,
чүнки олар бардыр гадымдан бәри.
Хет 7Ятлама Сен яшлык гүнәлерими
хем-де битабынлык ёдаларымы.
Я Реб, садык сөйгиңе гөрә,
Өз ягшылыгың хатырасына яда сал мени.
Тет 8Реб ягшы хем-де догрудыр
Ол гүнәкәрлере Өз ёлуны өвредйәр.
Ёд 9Догры ёла гөнүкдирйәр гөвни песлери
Өз ёлуны песпәллере өвредйәр.
Каф 10Онуң әхтиниң дүзгүнлерини саклаянлара
сөйги билен садыклыкдыр Реббиң әхли ёллары.
Ламед 11Я Реб, Өз адың хатырасына
багышла Сен мениң этмишлерими,
чүнки улудыр олар.
Мем 12Ребден горкян ынсан бар болса,
Реб оңа өвредер сайламалы ёлуны.
Нун 13Ол яшаҗакдыр болелинликде,
ери мирас алар онуң зүряды.
Самех 14Реб Өз ниетини Ондан горкянлара аян эйлейәр,
Ол олара Өз әхтини билдирйәр.
Айин 15Гөзлерим мыдама Реббе гарап дур,
чүнки Ол аякларымы тордан чыкарар.
Пе 16Маңа өврүл-де, мерхемет эйле,
чүнки мен ялңыз, эзъетлидирин.
Тсади 17Йүрегимиң гайгы-хасраты артды;
җебир-җепаларымдан халас эт мени.
Реш 18Мушакгатым билен ызама серет
хем-де мениң әхли гүнәлерими өт.
19Гөр Сен көпдүгини душманлырымың,
олар гүйчли йигренч билен йигренйәр мени.
Шин 20Җанымы гора-да, халас эт мени,
утанмайын, чүнки пена эдиндим Сени.
Тав 21Кәмилликдир догрулык мени горасын,
чүнки мен Саңа интизардырын.
22Эй, Худай, ысрайыл халкыны
әхли мушакгатлардан Сен халас эйле.