‏ Psalms 36

Давудың мезмуры

Алеф 1Эрбет иш эдйәнлере җаныңы якма,
найынсаплара хөвесли бакма.
2Чүнки олар тиз вагтда от кимин гурар,
гөк өсүмлик кимин саралып солар.
Бет 3Реббе бил багла, эт сен ягшылык,
юртда яшап, яйна асудалыкда.
4Ребден теселли тап,
йүрек арзувларыңы Ол хасыл эдер.
Гимел 5Ёлуңы Реббе табшыр, Оңа бил багла,
шонда Ол саңа хемаят берер.
6Нур дей ялпылдадар догрулыгыңы,
гүнорта чагы дей – хаклылыгыңы.
Далет 7Үмсүм бол Реббиң өңүнде,
Оңа сабырлы гараш,
ёлы ровач бетниете хөвесли бакма.
Хе 8Гахардан саклан, газабы ташла,
аладачыл болма: ол шере элтер.
9Чүнки кесилип ташланар пислик эдйәнлер,
Реббе интизарлар ери мирас аларлар.
Вав 10Аз-кем сабыр эт, эрбетлер ёк боларлар,
ерлерине гөз айларсың, йөне тапмарсың.
11Пәлипес адамлар болса ери мирас аларлар,
абаданчылыкда яшап, хезил эдерлер.
Зайин 12Эрбет догры адама хыянат эдйәр
хем-де оңа дишлерини гыҗаяр.
13Таңры болса онуң үстүнден гүлйәр,
чүнки онуң вагтының доляндыгыны гөрйәр.
Хет 14Гарып билен мәтәҗи ере чалмаклык үчин,
догры ёлдан барянлары өлдүрмек үчин,
эрбет адамлар гылыч сырып, яйыны гуряр.
15Эмма гылычлары өз йүреклерине санҗылар,
оларың яйлары хем күл-оврам болар.
Тет 16Догры ынсаның аз зады
әхли эрбетлериң байлыгындан ягшыдыр.
17Чүнки эрбетлериң голлары дөвлер,
йөне Реб догрулары сөйгетләр.
Ёд 18Реб кәмиллериң гүнлерини билйәндир,
оларың мирасы эбеди галар.
19Олар яман вагты утандырылмаз,
док боларлар ачлык дөврүнде.
Каф 20Эмма эрбетлер хеләк боларлар,
Реббиң душманлары өрүлериң гөзеллиги дей йитип гидерлер,
гайып боларлар, түссе ичинде сумат боларлар.
Ламед 21Эрбет адам карз алып, ызына бермез,
догры ынсан болса җомарт ве эли ачык.
22Чүнки Онуң ялканлары ери мирас аларлар,
Онуң гарганлары болса гырлып ёк болар.
Мем 23Реб догрының гадамыны беркарар эдйәр,
Ол онуң ёлундан гөвнүхош боляр.
24Йыкылмаз бу ынсан бүдрәенде хем,
чүнки Реб онуң элинден тутяр.
Нун 25Яш йигитдим, инди гаррадым,
йөне догры ынсаның терк эдиленини
я зүрядының чөрек дилененини
хениз гөрмедим.
26Элмыдама эли ачык хем-де карз берйәр;
оларың неслинден ялканыш гелер.
Самех 27Шер ишден гача дур хем эт ягшылык –
бакы яшарсың.
Айин 28Чүнки Реб адалаты сөййәндир,
Ол садык ынсаны терк эдйән дәлдир;
догры ынсан бакы горалар,
йөне эрбетлериң зүрятлары гырлып ёк болар.
29Догры ынсанлар ери мирас аларлар
хем-де онда бакы месген тутарлар.
Пе 30Догры адамың агзы даналыгы сөзлейәр,
онуң дили адалаты беян эйлейәр.
31Онуң йүрегиндедир Худайың кануны,
тайян дәлдир онуң аягы.
Тсади 32Эрбет догры ынсаны аңтаяр,
оны өлдүрмәге пурсат пейлейәр.
33Йөне Реб оны эрбедиң элине бермез;
каза гетириленде, оны айыплы чыкармаз.
Коф 34Реббе умыт багла, Онуң ёлуны сакла,
Ол хем ери мирас алмагың үчин сени бейгелдер;
сен эрбетлериң ёк эдиленини гөрерсиң.
Реш 35Мен ызгытсыз эрбет адамың чынар дек
гөгерен еринде яйрап отураныны гөрдүм.
36Бирденкә ол гайып болды-да гитди;
мен оны гөзледим, эмма тапмадым.
Шин 37Кәмил ынсаны сынла, догры адама серет.
Парахат ынсаның гелеҗеги бар.
38Эмма гүнәлилер бүтинлей вейран эдилер;
эрбетлериң гелеҗеги ёк болар.
Тав 39Реб догры ынсанлары халас эдйәндир,
мушакгатлыкда олара пена боляндыр.
40Реб олара көмек берер ве халас эдер;
олары эрбетлерден гутарар ве халас эдер,
чүнки олар Оны пена тутуняр.