Psa 48 | TukCyr16 | STEP | Айдымчылар топарының ёлбашчысына. Кораның несиллериниң мезмуры.

‏ Psalms 48

1 Айдымчылар топарының ёлбашчысына. Кораның несиллериниң мезмуры.
2 Эй, әхли халклар,
эй, дүнйәде яшаянлар,
әхлиңиз муны эшидиң.
3 Сада халк ве бегзадалар,
бай ве пукара – барыңыз диңләң.
4 Мениң агзым даналыгы сөзлесин,
йүрек пикирлерим дүшүнҗе берсин.
5 Мен бир тымсала гулак герейин,
мукам билен маталымы чөзүп берейин.

6 Мушакгатлык вагтында,
душманлар нәхак ере маңа хүҗүм эденде,
мен нәме үчин горка дүшейин?
7 Байлыгына бил баглаян ынсанлар,
мал-мүлкүниң көплүгине магтаняр.
8 – 9 – 10 Ынсан доганының эбеди яшары ялы,
хем-де габры гөрмези ялы,
пул төләп, оны азатлыга чыкарып билмез;
онуң үчин Худая төлег төлемез.
Догрудан-да, җан азатлыгыны газанма гыммат,
муны хич ким башарып билмез.

11 Себәби ол акылдарың-да өлйәнин гөрйәр;
акмаклар-да, самсыклар-да ёк болуп гидйәр,
мал-мүлклерини башгалара галдыряр.
12 Мазарлары бакы өйлери болар ^{▼▼Мазарлары бакы өйлери болар – бу җүмле кәбир голязмаларда Олар өйлери бакыдыр өйдйәрлер дийип душ гелйәр.},
месгенлери гечер несилден-несле,
атларыны дакярлар өз мүлклерине.
13 Йөне ынсан хорматда галмаз,
ол ёк болуп гидйән хайванлар ялыдыр.
14 Оларың ёлы шулар ялыдыр,
акмаклык-да оларыңкыдыр.
Эмма муңа гарамаздан, индики несил
оларың магтанмасыны макуллаяндыр. Села
15 Олар өлүлер дүнйәсине гоюн дек сүрлер,
өлүм оларың чопаны болар;
сәхер чагы догры адамлар
оларың үстүнден агалык сүрер;
яшаян ерлеринден узакда –
өлүлер дүнйәсинде бедени чүйрәр.
16 Эмма Худай мени кабул эдер;
Ол өлүлер дүнйәсиниң ыгтыярындан,
мениң җанымы бошадар. Села
17 Бир адам баяп, өйүниң шөхраты артса,
муны гөрүп, умытдан дүшме.
18 Чүнки өленде яны билен хич зат әкитмез,
шөхраты онуң ызына дүшмез.
19 Яшайшында өзүни багтлы сайса-да,
(өвйәндирлер сени ровачлананыңда)
20 онуң җаны ата-бабасының янына гидер;
олар гайдып гөрмезлер нуры.
21 Хорматланса-да, муны гөтернип билмейән ынсан,
ёк болуп гидйән хайванлар дейдир.