‏ Psalms 87

1Нагма. Кораның несиллериниң мезмуры. Айдымчылар топарының ёлбашчысына. Киришли саз гуралында айдылян нагма. Эзра неслинден Хейманың маскили.
2Я Реб, мени халас эйлейән Худай,
гиҗе-гүндиз гашыңда дат-перят этдим.
3Сениң хузурыңа дога-дилегим барсын,
диңле мениң дат-перядымы.
4Чүнки мушакгатлардан долудыр җаным,
өлүлер дүнйәсине голайландыр мең өмрүм.
5Мен габра инип барянлардан сайылдым,
бир меҗалсыз адам дек болдум.
6Мен өлүлер арасына ташланып,
Сени инди асла яда салмаян,
Сениң элиңден узага дүшүп,
габырда ятан җесет дек болдум.
7Сен мени габрың дүйбүнде,
түмлүкде, чуңлукда гойдуң.
8Сениң газабыңың лабыры үстүме инди,
әхли толкунларың мени юмурды. Села
9Дост-яранларымдан мени айырдың,
мени олара йигренҗи этдиң.
Дашымдан багланан, чыкып билмейән.
10Хасратдан яңа күтелди гөзүм,
я Реб, хер гүн Сени чагырдым,
мен эллерими Саңа узатдым.
11Сен гудратлары мерхумлара этҗекми?
Өлүлер Саңа өвги айдармы? Села
12Сениң сөйгиң җар эдилерми габырда,
Сениң вепадарлыгың – хеләкчилик еринде?
13Гудратларың билинйәрми түмлүкде,
Сениң догрулыгың – унудылма юрдунда?
14Мен болса, я Реб, Саңа перят эдйәрин,
ир сәхерде Саңа дога эдйәрин.
15Я Реб, нәме үчин рет эдйәң мени?
Нәме үчин гизлейәң менден йүзүңи?
16Мен чагалыкдан бәри гөргүли, өлүм халында,
ховпларыңа учрап, умытдан дүшдүм.
17Сениң газабың үстүме инди,
вехимиңиң хүҗүмлери мени юмурды.
18Олар узаклы гүн сил дек габаяр,
әхли тарапдан төверегими гуршаяр.
19Узаклашдырдың менден
достларымы, якынларымы,
гараңкылык – ялңыз ёлдашым.