Rev 2 | TukCyr16 | STEP | «Эфесдәки йыгнагың перишдесине шуны яз: Еди йылдызы саг элинде Саклаян, еди алтын чыраданың арасында Гезйән шейле диййәр:

‏ Revelation of John 2

Эфесдәки йыгнага

1 «Эфесдәки йыгнагың перишдесине шуны яз:

Еди йылдызы саг элинде Саклаян, еди алтын чыраданың арасында Гезйән шейле диййәр: 2 „Мен сениң әхли эденлериңи, шол санда зәхмет чекендигиңи, гайратлыдыгыңы билйәрин. Сениң яман адамлары йигренйәндигиңи хем билйәрин. Сен өзлерини ресул сайянлары сынап, оларың ялан ресулдыкларыны әшгәр этдиң. 3 Сен гайратлысың, Мениң угрумда көп мушакгатлара чыдадың, рухдан дүшмедиң. 4 Эмма сенде оңламаян бир задым бар: сен Мени илкибашда сөйшүң ялы сөймейәрсиң. 5 Шонуң үчин, хайсы белентликден йыкыланыңы ядыңа сал! Тоба эт-де, илкибашда эден ишлериңи амал эт! Эгер тоба гелмесең, яныңа барып, чыраданыңы еринден айрарын. 6 Йөне шу эдйәнлериңи велин оңлаярын: сен николачыларың ^{▼▼Николачылар – Никола атлы галп мугаллымың шәгиртлери.} эдйән ишлерини йигренйәрсиң. Мен хем олары йигренйәрин. 7 Гулагы бар адам Мукаддес Рухуң йыгнаклара нәме диййәнини эшитсин! Яманлыкдан үстүн гелене Худайың җеннетдәки яшайыш дарагтының мивесинден иймәге ругсат эдерин“».

Измирдәки йыгнага

8 «Измирдәки йыгнагың перишдесине шуны яз:

Өлен ве Дирелен, Илкинҗи ве Ахыркы шейле диййәр: 9 „Мен сениң мушакгатларыңы ве гарыплыгыңы билйәрин, аслында велин сен байсың! Мен өзлерини яхуды сайянларың саңа дил етирйәндиклерини хем билйәрин. Йөне олар яхудылар дәл-де, шейтаның үйшмелеңидир. 10 Гөрҗек гөргүлериңден горкма! Ине, сынамак үчин, иблис сизиң кәбирлериңизи туссаг этдирер. Сиз он гүнләп мушакгат чекерсиңиз. Өлүм ховпы үстүңе абананда-да, садык гал, Мен саңа яшайыш тәҗини берерин. 11 Гулагы бар адам Мукаддес Рухуң йыгнаклара нәме диййәнини эшитсин! Яманлыкдан үстүн гелен икинҗи өлүмиң җебирлерине дучар болмаз“».

Пергамондакы йыгнага

12 «Пергамондакы йыгнагың перишдесине шуны яз:

Ики йүзли кесгир гылыҗы Болан шейле диййәр: 13 „Сениң ниреде яшаяныңы билйәрин, шейтаның тагты хем шол ердедир. Эмма муңа гарамаздан, сен Маңа садык болуп галансың. Сен хатда өз шәхериңде, хава, шейтаның яшаян шәхеринде садык гүвәм Антибиң өлдүрилен гүнлеринде-де Маңа болан иманыңдан дәнен дәлсиң. 14 Йөне сенде оңламаян кәбир затларым бар. Сизиң араңызда Билгамың таглыматына эерйәнлер бар. Билгам ысрайыл халкыны гүнәниң торуна салмагың ёлуны Баллага өвретди. Шейдип, ысрайыл халкы бута берлен гурбанлыгы ийип, зына этди. 15 Шейле-де, араңызда николачыларың таглыматына эерйәнлер хем бар. 16 Тоба эт! Ёгса тизара яныңа барып, агзымдакы гылыч билен олара гаршы уршарын. 17 Гулагы бар адам Мукаддес Рухуң йыгнаклара нәме диййәнини эшитсин! Яманлыкдан үстүн чыкана яшырын сакланан маннадан ^{▼▼Манна – чөлде Худай тарапындан ысрайыллара берлен үйтгешик иймит. Сөзлүге серет.} берерин. Мундан башга-да, оңа йүзүне тәзе ат язылгы бир ак даш берерин. Бу ады дашы алҗак адамдан башга хич ким билмез“».

Тиятирадакы йыгнага

18 «Тиятирадакы йыгнагың перишдесине шуны яз:

Гөзлери алавлаян от ялы, аяклары мис ялы ялпылдаян Худайың Оглы ^{▼▼Худайың Оглы – Көне Әхтде бу ат патышалар үчин уланылярды. Тәзе Әхтде болса бу ат Худай тарапындан сайланып-сечилен диймеги аңладяр. Сөзлүге серет.} шейле диййәр: 19 „Мен сениң әхли эденлериңи, сөйгиңи, иманыңы, хызматыңы ве гайратыңы билйәрин. Сениң хәзирки эдйәнлериңиң озалкылардан көпдүгини хем билйәрин. 20 Эмма сенде оңламаян бир задым бар: сен өзүни пыгамбер сайян Изебел атлы аялың эденлерине гечиримлилик эдйәрсиң. Ол Мениң бенделерими өз таглыматы билен аздырып, олара зынахорлык этдирҗек боляр, бута хөдүрленен гурбанлыклардан ийдирҗек боляр. 21 Мен оңа тоба этмәге вагт бердим, йөне ол азгынлыгындан йүз өвреси геленок. 22 Шонуң үчин-де, Мен оны хассалык дүшегинде ятырарын. Бу аял билен зына эденлере-де, онуң азгынлыгындан ^{▼▼Онуң азгынлыгындан – кәбир голязмаларда өз азгынлыкларындан.} йүз өвүрмеселер, җебир-җепа чекдирерин. 23 Мен онуң чагаларыны хем өлдүрерин. Шонда хемме йыгнаклар Мениң йүреклери ве пикирлери дерңейәндигими билерлер. Мен сизиң хер бириңизе эден ишлериңизе гөрә җеза берерин. 24 – 25 Эмма сизе, ягны Тиятирадакы Изабелиң бу таглыматына эермедиклериң ве ‘шейтаның сырлары’ дийилйәнлери билмейәнлериң барына шуны айдярын: эгер иманыңызы Мен гелйәнчәм сакласаңыз, сизиң үстүңизе башга зат йүклемерин. 26 – 27 – 28 ^eАтамың Маңа ыгтыяр берши ялы, Мен хем яманлыкдан үстүн чыкана, Мениң ырадамы ахыра ченли берҗай эдене миллетлериң үстүнден ыгтыяр берерин. Ол миллетлери демир хасасы билен доландырар; олары күйзегәриң голчасы дей чым-пытрак эдер. Мен оңа даң йылдызыны хем берерин. 29 Гулагы бар адам Мукаддес Рухуң йыгнаклара нәме диййәнини эшитсин!“»