Rev 7 | TukCyr16 | STEP | Шундан соң ериң дөрт бурчунда дуран дөрт перишдәни гөрдүм. Олар ер йүзүне, деңзе я-да агачлара өвүсмесин дийип, ериң дөрт тарапындакы еллери саклап дурдулар.

‏ Revelation of John 7

Мөхүрленен 144000 адам

1 Шундан соң ериң дөрт бурчунда дуран дөрт перишдәни гөрдүм. Олар ер йүзүне, деңзе я-да агачлара өвүсмесин дийип, ериң дөрт тарапындакы еллери саклап дурдулар. 2 Олара ере, деңзе зыян етирмеклик ыгтыяры берлипди. Соңра гүндогардан ёкары чыкып барян перишдәни гөрдүм. Онда Дири Худайың мөхүри барды. Ол шол дөрт перишдә батлы гыгырып, шейле дийди: 3 «Биз Худайымызың гулларының маңлайына мөхүр басянчак, ере, деңзе ве агачлара зыян етирмәң!» 4 Мен мөхүрлененлериң саныны эшитдим. Ысрайыл халкының әхли тирелеринден бир йүз кырк дөрт мүң адам мөхүрлененди: 5 Яхуда тиресинден он ики мүң адам,
рубен тиресинден он ики мүң адам,
гат тиресинден он ики мүң адам,
6 ашер тиресинден он ики мүң адам,
нафталы тиресинден он ики мүң адам,
манаша тиресинден он ики мүң адам,
7 шимгон тиресинден он ики мүң адам,
леви тиресинден он ики мүң адам,
ысакар тиресинден он ики мүң адам,
8 зебулун тиресинден он ики мүң адам,
юсуп тиресинден он ики мүң адам,
бенямин тиресинден он ики мүң адам.

Ак лыбаса бесленен мәхелле

9 Мундан соң хер миллетден, хер халкдан, хер тиреден, хер дилден болан, хич кимиң санап билмеҗек әгирт мәхеллесиниң тагтың ве Гузының өңүнде дураныны гөрдүм. Олар ак лыбасдадылар ве эллеринде палма агаҗының шахалары барды. 10 Олар батлы сес билен гыгырып: «Тагтда отуран Худайымыз ве Гузы бизиң Халасгәримиздир» диййәрдилер. 11 Тагтың, яшулуларың ве дөрт махлугың төверегиндәки перишделериң әхлиси йүзин дүшүп, Худая сежде этдилер. 12 Олар шейле диййәрдилер: «Омын!
Худайымыза өвги, шан-шөхрат болсун!
Оңа пайхас, шүкүрлер, хормат, гудрат ве кувват
эбедилик яр болсун!
Омын!»

13 Онсоң яшулулардан бири менден: «Бу ак лыбаса беслененлер ким, ниреден гелипдирлер?» дийип сорады. 14 Мен: «Муны сен билйәнсиң, агам!» дийип җогап бердим. Яшулы: «Булар шол агыр мушакгатлары башдан гечиренлер. Олар өз лыбасларыны Гузының ганы билен ювуп, олары ап-ак этдилер. 15 Шоңа гөрә, олар Худайың тагтының өңүнде болуп, гиҗе-гүндиз Онуң ыбадатханасында Оңа хызмат эдйәрлер. Тагтда Отуран олары Өз пенасында саклаяр. 16 Олар инди асла аҗыкмазлар, асла сувсамазлар, олары гүн урмаз, җөвза-да якмаз. 17 Чүнки тагтың ортасында дуран Гузы олары бакар, олары яшайыш сувуның гөзбашларына әкидер. Худай оларың гөзяшларының хер дамҗасыны сүпүрер».