‏ Romans 11

Худая садык галанлар

1Инди шуны сорайын: эйсем Худай Өз халкыны рет эдәйдимикә? Элбетде, ёк! Мен-де Ыбрайымың неслинден, бенямин тиресинден болан ысрайылларың биридирин. 2Худай Өзүниң эзелден сайлап-сечен халкыны рет эденок. Я-да Мукаддес Язгыларда Ыляс пыгамбер барада языланлар ядыңызда дәлми? Ол Худая ысрайыл халкы барада арз эдип, шейле диййәр: 3 ^a«Я Реб, ысрайыллар Сениң пыгамберлериңи өлдүрип, гурбанлык сыпаларыңы йыкдылар, еке мен галдым. Олар җаныма каст этмек үчин, инди мени ызарлап йөрлер». 4 ^bШонда Худай оңа нәме җогап берди? Худай: «Мен Ысрайылда Багал бутуна сежде этмедик еди мүң адамы Өзүме айрып гойдум» дийди. 5Шонуң ялы хәзирки вагтда хем Худая садык галанлар бар. Олар Худайың мерхеметине гөрә сайлананлардыр. 6Мерхемете гөрә сайланан болсалар, онда ынсан ишлерине гөрә сайланан дәлдир. Ёгса мерхемет мерхемет болмазды. ▼

▼Кәбир голязмаларда Эгер ынсан ишлерине гөрә сайланан болсадылар, онда бу эййәм мерхемет-де дәлдир, ёгса иш эййәм иш болмазды диен җүмле хем бар.

7Инди нәме? Ысрайыл халкы догрулыга ымтылса-да, оңа етип билмеди. Оңа диңе сайланып-сечиленлер етди, галанлары болса өз доң йүреклериниң ыгтыярына табшырылды. 8 ^dМукаддес Язгыларда олар барада шейле язылгыдыр: «Худай олары агыр ука батырды,
олара гөрйән гөз,
эшидйән гулак бермеди».

9 ^eДавут хем олар барада шейле диййәр: «Олара өз сачагы гапан ве дузак болсун,
бүдреме дашы ве алҗак җезасы болсун.
10Гой, гөзлери гараңкырасын, гөрүп билмесин,
биллери өмүрлик бүкүлип галсын».

Сапылан балдаклар

11Онда шейле сораг йүзе чыкяр: эйсем яхудылар гайдып галмаз ялы йыкылайдылармыка? Элбетде, ёк! Хава, олар Иса Месихи рет этдилер, йөне оларың бу гүнәси бейлеки миллетлериң халас эдилмегине себәп болды. Бейлеки миллетлериң халас эдилмеги болса яхудыларың габанҗаңлыгыны оярмалыды. 12Хава, яхудыларың бу гүнәси бүтин дүнйәниң ялканмагына себәп болды. Оларың бу гүнәси башга миллетлер үчин бәхбитли болды. Эгер оларың гүнәси шейле ялканышы гетирен болса, онда тутуш Ысрайыл Худая долананда, бу ялканыш гөр бак нәхили болар!

13Инди болса сизе, ягны яхуды дәллере йүзленйәрин. Худай мени ресуллыга белләп, сизе Хош Хабары вагыз этмәге иберди. Мен муңа дийсең буйсанярын. 14Шунуң билен бирликде сиз аркалы өз илдешлеримиң габанҗаңлыгыны оярып, олардан кәбириниң халас болмагына ярдам эдерин диен умыдым бар. 15Хава, Худай ысрайыл халкыны рет этди. Онуң шейле этмеги бейлеки миллетлериң хем Худай билен ярашмагына мүмкинчилик берди. Эгер Худайың рет этмеси бейлеки халклара шейле ялканыш гетирен болса, онда Онуң ысрайыл халкыны гайтадан кабул этмеги нәмә етирер? Өлүмден яшайша етирер! 16Себәби Худая хөдүр эдилен чөрек мукаддес болса, шол хамырдан биширилен бейлеки чөреклер хем мукаддесдир; эгер багың көки мукаддес болса, онуң шахалары хем мукаддесдир.

17Хава, багың кәбир шахалары дөвлүп, ябаны зейтуның шахасы болан сиз оңа сапылдыңыз. Сиз идедилип етишдирилен зейтуның көкүниң ширесине шәрик болдуңыз. 18Шоңа гөрә-де, онуң дөвлен шахаларының өңүнде магтанмаң, себәби сиз көки дәл-де, көк сизи саклаяндыр. 19Онда-да сизиң: «Шахалар бизиң сапылмагымыз үчин дөвүлди» диймегиңиз мүмкин. 20Сиз мамла, йөне олар имансызлыгы зерарлы дөвүлди. Сиз болса иман аркалы дурсуңыз. Шоңа гөрә, гопбамсырамаң-да, гайтам горкуң. 21Себәби Худай багың өз шахаларыны гайгырмадык болса, онда сизи, ягны сапылан ябаны шахалары асла-да гайгырмаз. 22Худайың мәхрибанлыгы ве берклиги барада ойланың. Ол йыкыланлар үчин беркдир, сизиң үчин болса мәхремдир. Эгер сиз Онуң мәхрибанлыгына бил багласаңыз, Ол хем сизе мәхрем болар. Эгер бил багламасаңыз, сиз хем кесилип ташланарсыңыз. 23Йөне ёлдан чыканлар хем имансызлыкларындан эл гөтерселер, тәзеден сапыларлар. Себәби Худай олары бага сапмагы башаряндыр. 24Эгер сиз ябаны зейтун агаҗындан кесилип, өз тебигы хәсиетлериңизе гарамаздан, идедилип етишдирилен зейтуна сапылан болсаңыз, онда аслы бу багдан болан шахалар өз зейтунына хас аңсат сапылар!

Тутуш Ысрайыл халас эдилер

25Эй, доганлар, сиз текепбирлиге йүз урмаз ялы, шу сырдан хабарлы болмагыңызы ислейәрин. Худай башга миллетлерден сайланларының барыны халас эдйәнчә, кәбир ысрайылларың йүреги юмшамаз. 26– 27 ^fЧүнки тутуш ысрайыл халкы хут шейле халас эдилер. Мукаддес Язгыларда хем шейле язылгыдыр: «Мен Якуп неслиниң гүнәлерини багышланымда,
олар билен эдйән әхтим, ине, шудур:
Сиондан Халасгәр гелер,
Ол Якуп неслинден худайсызлыгы айрар».

28Ысрайыл халкы Хош Хабары кабул этмән, Худая душман болды. Бу болса башга миллетлер, ягны сизиң үчин бәхбитли болды. Йөне ысрайыл халкы шонда-да Худайың сайлап-сечен халкыдыр. Худай олары ата-бабаларының хакы үчин сөййәндир. 29Чүнки Худай берен пешгешлерини ызына алмаяр, Өз чакылыгыны ятырмаяр. 30Сиз хем бирвагтлар Худая табын дәлдиңиз. Эмма ысрайылларың битабынлыгы аркалы Худайың сизе мерхемет эдиши ялы, 31олар-да сизе эдилен мерхемете етҗек болуп, Худая табын болмаярлар. 32Чүнки Худай хеммелере мерхемет этмек үчин, хеммелери битабынлыгың туссагы этди.

33Худайың байлыгы, даналыгы ве билими уммасыздыр! Онуң хөкүмлерини ким дүшүндирип билер? Онуң ёлларына ким акыл етирип билер? 34 ^g«Реббе ким акыл етирди?
Ким Оңа маслахат берип билди?
35 ^hХудай бергили болар ялы,
ким Оңа зат берди?»
36Хич ким! Чүнки бүтин барлык Худайдан болуп, Ол аркалы ве Онуң үчиндир!
Оңа бакы шан-шөхрат болсун! Омын!