‏ Romans 8

Яшайыш берйән Мукаддес Рух

1Шейлеликде, Иса Месихе дегишли боланлар ▼

▼Кәбир голязмаларда ынсан тебигатына гөрә дәл-де, Мукаддес Руха гөрә яшаянлар диен җүмле хем бар.

инди асла хөкүм эдилмез. 2Себәби яшайыш берйән Мукаддес Рух мени Иса Месих аркалы гүнәниң ве өлүмиң ыгтыярындан азат этди. 3– 4Мусаның Кануны ынсан хөвеслеримизиң хөтдесинден гелип билмәнсоң, бизи халас эдип билмеди. Кануның башармадык ишини Худай амала ашырды. Худай дүнйәдәки гүнә себәпли Өз Оглуны бир гүнәкәр ынсан кимин иберди-де, Ол аркалы гүнәни хөкүм этди. Худай муны Кануның адалатлы талапларының бизде берҗай болмагы үчин амал этди. Шунлукда, биз инди ынсан хөвеслеримизе гөрә дәл-де, Мукаддес Руха гөрә яшаярыс. 5Чүнки ынсан хөвеслерине гөрә яшаянлар бу хөвеслериң оңлаян затлары барада пикир эдйәрлер. Мукаддес Руха гөрә яшаянлар болса Онуң оңлаян затлары барада пикир эдйәндир. 6Ынсан хөвеслеринден дөрейән пикирлер адамы өлүме элтйәр. Мукаддес Рухдан дөрейән пикирлер болса яшайыш ве парахатлык берйәр. 7Ынсан хөвеслеринден дөрейән пикирлер Худая душмандыр. Себәби олар Худайың Канунына табын дәлдир, аслында табын болмагы башарян хем дәлдир. 8Шонуң үчин-де, ынсан хөвеслерине гөрә яшаянлар Худайың гөвнүнден туруп билмез. 9Эгер Худайың Рухы догрудан-да калбыңызда месген тутан болса, сиз ынсан хөвеслериниң ыгтыярында дәлсиңиз, сиз Мукаддес Рухуң ыгтыярындасыңыз. Кимде Месихиң Рухы болмаса, ол Месихе дегишли дәлдир. 10Эгер Иса Месих калбыңызда месген тутан болса, онда гүнә зерарлы өлмели болсаңыз-да, Мукаддес Рух сизе яшайыш берер, себәби сиз Худайың хузурында акланансыңыз. 11Эгер Иса Месихи өлүмден Дирелдениң Рухы калбыңызда яшаян болса, онда Ол калбыңызда яшаян Өз Рухы аркалы Иса Месихи дирелдиши ялы, сизиң-де паны тениңизи өлүмден дирелдер.

12Шоңа гөрә-де, эй, доганлар, биз инди ынсан хөвеслериниң талапларына гөрә яшамага борчлы дәлдирис. 13Эгер сиз ынсан хөвеслериниң талапларына гөрә яшасаңыз, өлерсиңиз. Эмма ынсан хөвеслериниң яман ишлерини Мукаддес Рухуң гүйҗи аркалы ёк этсеңиз, яшарсыңыз. 14Себәби Мукаддес Руха эерйәнлер Худайың перзентлеридир. 15Худай бизе Өз Рухуны берди. Ол муны гайтадан гул болуп, горкуда яшамагымыз үчин дәл, эйсем Онуң перзентлери болуп, Мукаддес Рух аркалы «Абба! ▼

▼Абба – арамейче бу сөз Атам диймеги аңладяр.

Атам!» дийип чагырмагымыз үчин амал этди. 16Мукаддес Рух бизиң рухумыз билен бирликде Худайың перзентлеридигимизе гүвә гечйәр. 17Шейлеликде, перзентлери болан болсак, онда мирасдүшеридирис. Худайың мирасдүшерлери болян болсак, онда Иса Месихиң хем мирасдашларыдырыс. Биз Иса Месихиң гөрен гөргүлерине шәрик болян болсак, онда Онуң шан-шөхратына хем шәрик боларыс.

Гөргүлер ве шөхрат

18Мениң пикиримче, шу вагткы гөргүлеримизи бизе аян болҗак гелеҗекки шөхрат билен деңешдирип-де болмаз. 19Худайың Өз перзентлериниң шөхратыны аян этҗек пурсадына бүтин ярадылыш хем сабырсызлык билен гарашяр. 20– 21Себәби ярадылыш өз ислеги боюнча дәл-де, Худайың ислеги боюнча пучлуга табын болупды. Инди болса Худайың перзентлериниң шан-шөхрата говшан пурсадында ярадылыш өзүниң хем чүйреме нәлетинден азат эдилип, шол шөхрата говшарын дийип умыт эдйәр. 22Биз бүтин ярадылышың шу вагта ченли ахы-нала чекип, бургы җебирлерини чекйәндигини билйәрис. 23Диңе бир ярадылыш дәл, эйсем гелеҗекдәки шөхратың кепили хөкмүнде Мукаддес Рухы алан биз хем ахы-нала чекйәрис. Себәби биз өзүмизиң огуллыга алнып, беденимизиң чүйремеден азат эдилмегине сабырсызлык билен гарашярыс. 24Биз халас эдиленимиз үчин, инди бу умыдымыз бардыр. Йөне гөзе гөрнүп дуран умыт асла умыт дәлдир. Гөрүп дуран задына умыт баглаян бармы нәме? 25Биз гөрмейән задымыза умыт баглап, шоңа сабырлылык билен гарашяндырыс. 26Мукаддес Рух хем эҗизлигимизде бизе көмек берйәр, себәби биз хатда нәхили ве нәме барада дилег этмелидигимизи хем билмейәрис. Эмма Мукаддес Рухуң Өзи сөз билен беян эдип болмаҗак иңңилдилер билен бизиң үчин төвелла эдйәр. 27Ынсан йүрегиниң җүммүшини билйән Худай Мукаддес Рухуң пикирлерине дүшүнйәндир. Себәби Мукаддес Рух Худайың ислегине гөрә Онуң халкы үчин ялбаряндыр. 28Биз Худайы сөййәнлер ве Онуң максадына гөрә чагырыланлар үчин хемме задың оларың пейдасына эдилйәндигини билйәрис.

29Чүнки Худай олары эзелден сайлап-сечди ве Оглуна меңзетмеги овалдан карар этди. Ол муны Иса Месихиң көп санлы доганларының арасында новбахар болмагы үчин амал этди. 30Худай эзелден сайлап-сеченлерини чагырды, чагыранларыны аклады, акланларыны шан-шөхрата беследи.

Худайың сөйгүси

31Булардан башга айдара зат галдымы? Худай бизлик болса, ким бизе гаршы чыкып билер? 32Худай хатда Өз Оглуны аяман, Оны бизиң гүнәлеримиз үчин өлүме табшыран болса, онда Онуң билен бирликде бейлеки затларың барыны хем эчилмезми нәме?! 33Худайың сайлап-сеченлерини айыпламага ким милт эдер? Хич ким, себәби олары Худайың хут Өзи аклаяр! 34Худайың халкыны ким хөкүм эдип билер? Хич ким, себәби өлүмден дирелен Иса Месих Худайың сагында отурып, бизиң үчин төвелла эдйәр. 35Биз гөргүдир мушакгатлары чекйәрис, ызарланмалара, ачлыга, мәтәчлиге дучар болярыс, ховп-хатара ве өлүм ховпуна сезевар эдилйәрис. Эйсем буларың бары бизи Иса Месихиң сөйгүсинден айрып билерми? Элбетде, ёк! Себәби Мукаддес Язгыларда шейле язылгыдыр: 36 ^c«Биз хер гүн Сениң үчин өлдүрилйәрис,
дамагы чалынҗак гоюн сайылярыс».

37Йөне биз өзүмизи Сөййән аркалы бу кынчылыкларың барыны еңйәрис. 38– 39Себәби мен не өлүмиң, не-де яшайшың, не перишделериң, не-де җынларың, не хәзирки, не гелеҗекки ягдайларың, не-де гүйчлериң, не белентлигиң, не-де чуңлугың – ярадылан затларың бириниң-де бизи Реббимиз Иса Месих аркалы аян болан Худайың сөйгүсинден айрып билмеҗекдигине берк ынанярын.