Rom 9 | TukCyr16 | STEP

‏ Romans 9

Худайың сайлап-сечен халкы

1 – 2 Мениң улы гайгым, йүрегимде дынгысыз агырым бар. Мунуң хакыкатдыгына, ялан сөзлемейәндигиме Иса Месихиң адындан гүвә гечйәрин. Сөзлериме Мукаддес Рух аркалы ынсабым-да шаятдыр. 3 – 4 Хава, мен ганыбир доганларым болан ысрайыл халкының Иса Месихден айра дүшенинден, өзүмиң гаргыша галып, оларың хатырасына Месихден айра дүшмәге-де кайылдырын. Худай олары огуллыга алды, олара Өз шан-шөхратыны аян эдип, олар билен әхт баглашды. Ол Кануны ве ыбадатханадакы хызматы олара ынанды, вадаларыны хем олара берди. 5 Олар бейик ата-бабаларымызың неслидир. Иса Месих хем ынсан тебигаты боюнча олардан гелип чыкандыр. Бүтин барлыгың Хөкүмдары болан Худая бакы шөхрат болсун! Омын!

6 Мен Худай Өз вадасында тапылмады диемок. Себәби аслы ысрайыл боланларың бары хакыкы ысрайыл дәлдир. 7 ^aЫбрайымың неслинден боланларың-да бары онуң хакыкы перзенди дәлдир. Себәби Мукаддес Язгыларда: «Сениң адың Ысхагың несли аркалы довам эдер» дийип язылгыдыр. 8 Диймек, Ыбрайымың неслинден боланларың барына Худайың перзенди дийип болмаз. Диңе вада гөрә догланлар Ыбрайымың хакыкы несли хасапланяндыр. 9 ^bЧүнки: «Белленен вагтда доланып геленимде, Сараның бир оглы болар» дийлип вада берлипди. 10 Мундан башга-да, Ребеканың экизлери Ысав билен Якубы ятлалы. Оларың икиси-де бир атадан, ягны атамыз Ысхакдан доглупды. 11 – 12 ^cЙөне экизлер хениз догулманка, хениз яманлык я ягшылык этмәнкә, Худай Ребека «Улусы кичисине гул болар» дийип айдыпды. Бу сөзлер сайланып-сечилмәниң ынсан ишлерине дәл-де, диңе Чагырана баглыдыгыны мәлим этмек үчин айдылыпды. 13 ^dХава, Мукаддес Язгыларда: «Мен Якубы сайладым, эмма Ысавы рет этдим» дийип язылгыдыр. 14 Муңа нәме диели? Эйсем Худай адалатсызмыдыр? Элбетде, ёк! 15 ^eСебәби Ол Муса: «Мен ислән адамыма мерхемет, ислән адамыма хем рехим-шепагат эдерин» дийип айдыпды. 16 Шонуң үчин-де, сайланып-сечилме адамың ислегине я-да тагалласына дәл-де, Худайың мерхеметине баглыдыр. 17 ^fХудай Мукаддес Язгыларда Мүсүриң фараонына: «Мен Өз гүйҗүми сенде гөркезип, адымы тутуш дүнйә җар этмек максады билен сени патыша этдим» дийип айдыпды. 18 Шейлеликде, Худай исләнине рехим-шепагат эдйәр, исләниниң йүрегини гаталдяр.

19 Онда менден: «Эгер шейле болса, онда нәме үчин Худай адамлары язгаряр? Онуң ислегине гаршы чыкып билҗек бармы?» дийип сорамагың мүмкин. 20 ^gХей, адам, Худая геп гайтарар ялы, сен киммишиң? Хей-де ясалан зат өзүни ясандан: «Нәме үчин мени бейле ясадың?» дийип сорап билерми? 21 Эйсем күйзегәриң шол бир тоюндан ислән габыны: бирини той-байрамлар үчин, бейлекисини гүнделик ишлер үчин ясамага хакы ёкмы нәме? 22 Худай Өз гудратыны гөркезмек үчин, хеләкчилиге доглан адамларың үстүне газабыны дөкүп билйәр. Йөне Ол Өзүни газапландырян адамлара улы сабыр-такатлык эдйәндир! 23 Худай Өзүниң өңден шөхрат үчин тайярлап, мерхемет эденлерине Өз шөхратының байлыгыны билдирмек үчин шейле сабыр-такатлы боляндыр. 24 Худайың шейле мерхемет эденлериниң ве чагыранларының арасында диңе яхудылар дәл, эйсем башга миллетлер хем бардыр. Хава, буларың арасында биз хем бардырыс. 25 ^hХудай Хошея пыгамбер аркалы шейле диййәр: «Мениң халкым болмадыга „Халкым“диерин,
сөйгүли болмадыга „Сөйгүлим“диерин.
26 ⁱОлара: „Сиз Мениң халкым дәлсиңиз“дийлен ерде,
„Сиз дири Худайың огулларысыңыз“дийлер».

27 ^jИшая пыгамбер хем Ысрайыл барада шуны җар этди: «Ысрайыл халкы деңиз якасындакы чәге дей көп болса-да, диңе бирнәчеси халас боларлар. 28 Чүнки Реб Өз чыкаран хөкүмини тутуш ер йүзүнде тизара ве гутарныклы амала ашырар». ^{▼▼Кәбир голязмаларда 28‑нҗи аят шейле гөрнүшде гелйәр: Реб Өз чыкаран хөкүмини тизара ве гутарныклы догрулык билен ерине етирер, чүнки Ол ишини ер йүзүнде тиз амала ашырар.} 29 ^lИшая хем өңден шулары айдыпды: «Эгер Хөкмүрован Реб
зүрятларымызы аман галдырмадык болсады,
Содом ялы болардык,
Гомора меңзәрдик».

Ысрайылың имансызлыгы

30 Бу нәме дийилдиги? Худайың хузурында акланмага ымтылмадык миллетлер иман эдип, акландылар. 31 Ысрайыл халкы болса Мусаның Кануныны берҗай этмек аркалы акланмакчы болды, йөне муны башармады. 32 Нәме үчин? Себәби оларың ымтылышлары имана дәл-де, Кануна даянды. Олар «Бүдреме дашына» бүдредилер. 33 ^mХудай Мукаддес Язгыларда олара бу даш барада айдыпды: «Ине, Мен Сионда бүдреме Дашыны, йыкян Гая гойярын; Оңа бил баглан утандырылмаз».