‏ Song of Solomon 5

Йигит:

1Эй, эзизим, гелинлигим, мен багыма гелйәрин;
мүрүм билен атырымы йыгнаян,
бал өйҗүгими, балымы иййән,
шерабымы, сүйдүми ичйән.
Гызың бойдашлары: Ийиң, эй, сөйгүли ярлар!
Эй, ышкың есирлери,
ийип-ичиң, ышкдан мес болуң!
Гыз: 2Мен укуда, йөне көңлүм оя.
Ине, бу ярымың овазы.
«Гапыны ач, эзизим, дилдарым мениң,
гөгерчиним, пәкизәм мениң!
Башым чыга эзилен,
сачым-да гиҗәниң немине».
3Эшигими чыкарыпдым
геейинми ене?
Аякларымы ювупдым
хапалайынмы ене?
4Элини гапы дешигинден узатды ярым,
ышкым оңа галкынды.
5Турдум ярыма гапы ачмага,
эллеримден дамды мүр,
бармакларымдан акды мүр
гулпуң тутаваҗына.
6Гапыны ачдым ярыма,
йөне гиден экен ол.
Овазына эзилди йүрегим.
Агтардым, тапмадым оны;
чагырдым, җогап бермеди.
7Шәхерде айланып йөрен гөзегчилер
маңа душдулар;
мени урдулар, яраладылар,
шәхер диварларының сакчылары
бүренҗегими башымдан айырдылар.
8Эй, Иерусалим гызлары!
Сизе ялбарярын,
ярымы гөрсеңиз айдың,
ышкдан хесерләндирин.
Гызың бойдашлары: 9Ярың бейлекилерден нәмеси артык,
эй, гөзеллер гөзели?
бизе ант ичериң ялы,
ярыңың бейлекилерден нәмеси артык?
Гыз: 10Акмеңиз, гүлгүне йүзлүдир, ярым,
он мүңлериң арасында сайланяр ол.
11Сап алтындыр башы,
сачлары буйра,
гарга дей гара.
12Онуң гөзлери булак башында сүйде ювнуп отуран гөгерчин ялы;
олар отурдылан гымматбаха дашлары ялы.
13Атыр сачян
гүлхана дей яңаклары,
мүр дамдырян
бәгүле огшаяндыр додаклары.
14Голлары йүзи сары якут
билен безелен тогалак алтындыр,
гөвреси гөк якуда гапланан
пил сүңкүдир.
15Аяклары сап алтын үстүнде отурдылан
мермер сүтүнлер дей,
гөрки Ливан дей,
сайлама кедр агачлары дей.
16Додаклары иң датлы,
катды-каматы овадан.
Бу мениң ярымдыр, достумдыр,
эй, Иерусалим гызлары!