Song of Solomon 6
Гызың бойдашлары: 1Ярың нирә гитди, эй, гөзеллериң гөзели?Хайсы яна йөнелди ол?
Оны ызлалы сениң билен.
Гыз: 2Ярым өз багына,
атыр сачян гүлханасына,
багларда сүрүсини бакмага,
чигилдемлер йыгмага гитди.
3Ярым мениңки, мен онуңкы;
сүрүсини чигилдемлериң арасында бакяр ол.
Йигит: 4Эй, дилдарым,
Тирса шәхери дей гөзелсиң сен,
хошройсың Иерусалим дей,
туглы гошун дей шөвкетли.
5Гөзлериңи менден сов,
мен олара бенди!
Гилгат дагындан инип гелйән
гечи сүрүсине огшаяр сачың.
6Гыркылып,
сувдан чыкып гелйән
гоюн сүрүсине огшаяр дишлериң.
Әхлиси экизлидир,
ялкы дәлдир олар.
7Бүренчекде гизленен яңаклар
энара меңзейәр.
8Шаның алтмыш аялы бар хем сегсен гырнагы,
гызлар-да сан-саҗаксыздыр.
9Гөгерчинимиң, пәкизәмиң болса деңи-тайы ёк,
энесиниң эзиз гызы ол,
найбашысы ол.
Гызлар оны гөрүп, оңа багтлы дийдилер;
ша аялларыдыр гырнаклары оны өвдүлер.
10Шапак дей ялпылдаян,
Ай дек гөзел, Гүн дей парлаян,
туглы гошун дей шөвкетли ким бу?
11Җүлгәниң хасылына серетмәге,
үзүм багларының гунчаларыны,
нарларың гүллерини гөрмәге
хоз багына гитдим.
12Билмән галдым, ислег-хыҗувым мени нәдип
шанлы халкымың сөвеш арабаларына мүндүрди.
Copyright information for
TukCyr16