Mark 2:23-28
Сабат гүни барада совал
(Матта 12:1-8; Лука 6:1-5)
23Бир Сабат гүни Иса бугдайлыгың арасындан гечип барярды. Онуң шәгиртлери ёлда баряркалар, бугдай башларыны ёлмага башладылар. 24Фарисейлер Иса: «Серет, нәме үчин олар Сабат гүни гадаган иши эдйәрлер?» дийдилер. 25 aИса олара: «Давут билен янындакылар ач хем мәтәч галанларында, сиз Давудың нәме эдендигини асла окамадыңызмы? 26Ол баш руханы Абиятарың дөврүнде Худайың өйүне гирип, Хөдүр чөреклерини ийди, янындакылара хем берди. Бу олар үчин гадаганды, диңе руханылара ругсат берленди» дийип җогап берди. 27Соңра Иса олара: «Адам Сабат гүни үчин дәл-де, Сабат гүни адам үчин ярадылды. 28Шонуң үчин Ынсан Оглы хатда Сабат гүнүниң-де хөкүмдарыдыр» дийди. Mark 3:1-6
Иса Сабат гүни шыпа берйәр
(Матта 12:9-14; Лука 6:6-11)
1Башга бир гүн Иса ене синагога гитди. Ол ерде эли шел ачан бир адам барды. 2Кәбир адамлар Исаны айыплаҗак болуп, Сабат гүни бу адама шыпа берермикә дийип, Оны аңтаярдылар. 3Иса эли шел ачан адама: «Ериңден тур-да, орта чык!» дийди. 4Онсоң олардан: «Канун боюнча Сабат гүни ягшылык этмек догрумы я-да яманлык? Бириниң җаныны халас этмек догрумы я-да өлдүрмек?» дийип сорады. Олардан сес чыкмады. 5Иса төверегиндәкилере гахар билен бакып, оларың доңйүрекдигине гынанды. Яңкы адама: «Элиңи узат!» дийди. Ол хем элини узатды велин, эли долы сагалды. 6Фарисейлер дашары чыкып, Исаны нәдип ёк этмелидиги барада Хиродың тарапдарлары билен маслахат гечирдилер.
Copyright information for
TukCyr16