Matthew 12:1-14
Сабат гүни барада сораг
(Марк 2:23-28; Лука 6:1-5)
1Арадан көп вагт гечмәнкә, бир Сабат гүни Иса бугдайлыгың арасындан гечип барярды. Онуң шәгиртлери аҗыгып, бугдай башларыны ёлуп иймәге башладылар. 2Муны гөрен фарисейлер Оңа: «Серет, Сениң шәгиртлериң Сабат гүни гадаган иши эдйәрлер» дийдилер. 3 aИса олара шейле җогап берди: «Давут билен янындакылар ач галанларында, сиз Давудың нәме эдендигини окамадыңызмы? 4Ол Худайың өйүне гирип, Хөдүр чөреклерини ийди, янындакылар хем ийдилер. Бу олар үчин гадаганды, диңе руханылара ругсат берленди. 5 bЭйсем, сиз ыбадатханада Сабат гүнүниң кадаларыны бозсалар-да, руханыларың гүнәсиз сайыландыгыны Төвратда окамадыңызмы? 6Мен сизе шуны айдайын: бу ерде ыбадатханадан-да бейик Бири бар. 7 cСиз: „Мен гурбанлык дәл-де, рехим-шепагат ислейәрин“диен сөзүң манысыны билседиңиз, гүнәсизлери хөкүм этмездиңиз. 8Чүнки Ынсан Оглы хатда Сабат гүнүниң-де хөкүмдарыдыр».Эли шел ачан адам
(Марк 3:1-6; Лука 6:6-11)
9Иса ол ерден гитди ве оларың синагогасына гелди. 10Ол ерде эли шел ачан бир адам барды. Исаны айыплаҗак болуп, Ондан: «Канун боюнча Сабат гүни хасса шыпа бермек болярмы?» дийип сорадылар. 11Иса олара: «Эгер бир гойнуңыз болуп, ол-да Сабат гүни чукура гачса, хайсыңыз оны чыкарып алмарсыңыз? 12Ынсан гоюндан хас гымматлыдыр! Шонуң үчин Сабат гүни ягшылык этмек боляр» дийип җогап берди. 13Онсоң Иса яңкы адама: «Элиңи узат!» дийди. Ол узадан бадына, онуң нәсаг эли эдил бейлеки эли ялы сагалды. 14Фарисейлер дашары чыкып, Исаны нәдип ёк этмелидиги барада маслахатлашдылар.
Copyright information for
TukCyr16