1Ch 13 | TyvTUV | STEP | Давид муң, чүс шериг баштыңчылары база бүгү өске-даа баштыңнар-биле сүмелешкеш,

‏ 1 Chronicles 13

Ыдыктыг аптараны Иерусалимге эккээрин оралдашканы

(2 Хаан. 6:1-11)

1 Давид муң, чүс шериг баштыңчылары база бүгү өске-даа баштыңнар-биле сүмелешкеш, 2 бүгү израиль ниитилелге мынча дээн: «Бир эвес силерге таарымчалыг болза, бир эвес бистиң Бурганывыс Дээрги-Чаяакчы күзээр болза, бүгү израиль девискээрлерде дөргүл-төреливиске, оларның иштинде одар-белчиирлиг хоорайларда чурттап турар бараалгакчыларга база левиттерге, шупту биске чыглып кээр кылдыр дыңнадыптаалыңарам. 3 Ынчангаш Бурганывыстың аптаразын бодувусче ап алыылыңар, чүге дээрге Саулдуң үезинде Ооң күзел-соруун айтырар аргавыс чок турган-дыр».

4 Бүгү чон ооң-биле чөпшээрешкен, чүге дээрге ол херек шупту улуска чөптүг ышкаш болган. 5 Ынчалдыр Давид Бурганның аптаразын Кириат-Иаримден эккеп аары-биле Египетти кызыгаарлап турар Шихор хемден Лево-Хаматка чедир бүгү израильчилерни чыып алган. 6 Давид болгаш бүгү израиль чон Иудеяда Ваалче (азы Кириат-Иаримче) ^a ында турар Бурганның аптаразын алыр дээш чорупкан ^b. Ол дээрге Дээрги-Чаяакчы саадаан, Ооң ады-биле адаан, херувимнер дүрзүлери турар ыдыктыг аптара чүве-дир ^c. 7 Бурганның аптаразын дугуйлуг чаа тергеге салгаш, Авинадавтың бажыңындан үндүрүп эккелгеннер. Тергени сөөрткен шарыларны башкарып чорааннар – Уза биле Ахио. 8 А Давид болгаш бүгү израиль чон Бурганның мурнунга бар шаа-биле хөглеп, ырлажып, янзы-бүрү хылдыг, кагар, база үрер хөгжүм херекселдеринге ойнап чорааннар.

9 Хидоннуң тараа шаңынга чоокшулап келгенде, тергени сөөртүп чораан шарылар бүдүрүй бээрге, ыдыктыг аптара ийленип, аңдарлы бээр часкан. Ону тудар дээш, Уза холун сунупкан ^d. 10 Дээрги-Чаяакчы Узага ыдыктыг аптарага дээпкени дээш, ажына берген. Ынчангаш Дээрги-Чаяакчы ону ол-ла черинге – Бодунуң мурнунга өлүрүп каан. 11 Дээрги-Чаяакчы Узаже халдаарга, Давид хорадай берген. Ол черни бо хүннерде-даа Парец-Уза ^{▼▼ Парец-Уза – «Узаже халдааны» дээн.} деп адаар. 12 Ол хүн Давид Бургандан корга бергеш, мынча дээн: «Бурганның аптаразын канчап бодумче аппаар мен?» 13 Давид ыдыктыг аптаразын бодунуң хоорайынче аппарбаан, ону Гефтен келген Овед-Эдом деп кижиниң бажыңынче чорудупкан.

14 Бурганның аптаразы гефчи Овед-Эдомнуң бажыңынга, өг-бүлезинге үш ай иштинде турган. Дээрги-Чаяакчы Овед-Эдомнуң өг-бүлезинге болгаш ооң шупту чүвезинге ачы-буян хайырлаан ^f.