1Ch 14 | TyvTUV | STEP | Тирниң хааны Хирам Давидче бодунуң элчилери-биле, аңаа орду тудуп берзин дээш дашчылар, бызаңчылар чорудупкан, олар пөш чудуктар эккелген.

‏ 1 Chronicles 14

Давид өг-бүлези-биле Иерусалимде

(2 Хаан. 5:11-16)

1 Тирниң хааны Хирам ^a Давидче бодунуң элчилери-биле, аңаа орду тудуп берзин дээш дашчылар, бызаңчылар чорудупкан, олар пөш чудуктар эккелген. 2 Ынчан Дээрги-Чаяакчы ону Израильдиң хааны кылдыр быжыглап каан деп Давид билип каапкан, чүге дээрге ооң чагыргазы Бурганның израиль чону дээш өрү көдүрүлген.

3 Давид Иерусалимге база кадайлар ап алган. Олардан Давидтиң өске оолдары, кыстары төрүттүнген. 4 Иерусалимге төрүттүнген ажы-төлүнүң аттары бо-дур ^b: Шаммуй, Шовав, Нафан, Соломон, 5 Ивхар, Элишуа, Элфелет, 6 Ногах, Нефег, Иафиа, 7 Элишама, Веелиада база Элифелет.

Филистимнерни тиилээни

(2 Хаан. 5:17-25)

8 Давид бүгү Израильдиң хааны апарган деп дыңнааш, шупту филистимнер ону дилеп эгелээннер. Давид ону дыңнааш, оларга удур үнүпкен. 9 Филистимнер Рефаим шынаазынга кээп турумчуп алганнар ^c. 10 Ынчан Давид Бургандан: «Филистимнер-биле тулчууйн бе? Оларны мээң холумга хүлээдип бээр сен бе?» – деп айтырган. Дээрги-Чаяакчы аңаа: «Бар. Оларны сээң холуңга хүлээдип бээр мен» – дээн. 11 Олар Ваал-Перацимге кээрге ^d, Давид оларны чылча шаап каапкан. Ол: «Бурган мээң холум-биле дайзыннарымны, сугнуң чууй шавары дег, ууй шаап кагды» – дээн. Ынчангаш ол черни Ваал-Перацим деп адап кааннар ^{▼▼ Ваал-Перацим – «Дээрги ууй шапкан» дээн.}. 12 Филистимнер ол черге боттарының бурганнарын каапкаш баарга, Давидтиң дужаалы-биле оларны өрттедипкеннер.

13 Филистимнер катап база ол шынаага кээп турумчуп алганнар. 14 Давид база катап Бургандан сүме айтырарга, Ол аңаа: «Оларже дорт үнме. Оюп чоруткаш, оларның артындан – бальзам ыяштарлыг талазындан халда. 15 Бальзам ыяштарның кырынга кылаш даажын дыңнап кааш-ла ^f, тулчуушкунну эгелээр сен – ол дааш дээрге филистим шеригни чылча шавар дээш, Бурган сээң мурнуңда чоруп орары ол-дур» – дээн. 16 Давид Бурганның чугаалааны ёзугаар кылган, ооң дайынчылары филистим шеригни Гаваондан Гезерге чедир чылча шаап каан. 17 Давидтиң ат-алдары бүгү чурттарга тарай берген. Дээрги-Чаяакчы ону бүгү чоннарның аразынга коргунчуг кижи кылып каан ^g.