‏ 1 Chronicles 16

1Бурганның аптаразын эккелгеш, Давидтиң аңаа белеткеп кааны ^a майгынының ортузунга салып кааш, Бурганга бүрүн өрттедир болгаш эп-найырал өргүлдерин кылганнар. 2Бүрүн өрттедир болгаш эп-найырал өргүлдерин кылып дооскаш, Давид чонну Дээрги-Чаяакчының ады-биле алгап-йөрээп каан. 3Ооң соонда ол бүгү израильчилерге – эр-даа, херээжен-даа кижи бүрүзүнге бир хлеб, бир борбак эът база бир үзүмнүг боова үлеп берген.

4Ыдыктыг аптараның мурнунга Израильдиң Бурганы Дээрги-Чаяакчыга алдаржыдып, четтиргенин илередип база Ону мактап бараан болур кылдыр Давид дараазында левиттер томуйлап каан ^b: 5Асафты ^c удуртукчузу кылгаш, ооң соонда Захарияны, Иеиелди, Шемирамотту, Иехиилди, Маттафияны, Элиавты, Ванеяны, Овед-Эдомну база Иеиелди. Олар чанзыга болгаш чадаганга ойнаар ужурлуг. А Асаф кимвалдарга ойнаар. 6Ванея биле Яхазиил бараалгакчылар Бурганның чагыг-керээзиниң аптаразының мурнунга доктаамал труба этсир.

Бурганны мактаан ыры

(Ыд. ыр. 104:1-15; 95:1-13; 105:1, 47-48)

7Ол хүн Давид Асафка болгаш ооң ха-дуңмазынга Дээрги-Чаяакчыны алдаржыдып ырлажыр даалга бир дугаар берип каан турган:

8Дээрги-Чаяакчыга өөрүп четтириңер,
Ооң адын адап, мактаңар,
өске чоннарга Ооң ажыл-херектерин медээлеңер; ^d
9Ону алгап ырлаңар, Аңаа ырлап бериңер;
Ооң кылган бүгү кайгамчык чүүлдерин чугаалап бериңер ^e.
10Ооң ыдыктыг ады дээш чоргаараңар;
Дээрги-Чаяакчыже чүткүп чоруур улустуң
сеткил-сагыжы өөрүп-хөглезин.
11Күчүлүг Дээрги-Чаяакчыны эдериңер,
Ооң-биле үргүлчү кады турар дээш чүткүңер ^f.

12– 13Дээрги-Чаяакчының чалчазы Израильдиң үре-салгалы,
Иаковтуң салгалы, Бурганның шилип алган улузу!
Ооң кылган кайгамчык чүүлдерин, Ооң көскү демдектерин,
Ооң аксындан үнген шын шииткелдерин сактып чоруңар ^g.
14Ол дээрге бистиң Бурганывыс, Дээрги-Чаяакчы-дыр:
бүгү чер-делегейде Ооң шын шииткелдери бар ^h.

15Ооң берген чагыг-керээзин – чоннуң муңгу салгалынга чедир ⁱ
чагаан сөзүн кезээ мөңгеде сактып чоруңар.
16Ол ону Авраам-биле чаргаш,
Исаакка Бодунуң даңгыраан берген ^j.
17Ол ону Иаковка дүрүм-хоойлу кылдыр доктааткаш,
Израильге мөңге чагыг-керээ кылдыр быжыглаан:
18«Сеңээ өнчү кылдыр ханаан черни бээр мен» ^k.

19Өгбелериңер аажок эвээш санныг, көңгүс хөй эвес турда,
олар Ханаанга өскээртен келген улус турда ^l,
20олар бир чондан өске чонче,
бир күрүнеден өске аймактың күрүнезинче көжүп чоруп турда,
21Бурган оларны дарлаар арганы кандыг-даа кижиге бербейн,
хааннарны олар дээш чемелеп ^m:
22«Мээң шилип алган улузумга дегбеңер,
Мээң медээчилеримге ⁿ багай чүве кылбаңар!» – деп турган.

23Бүгү чер-делегей, Дээрги-Чаяакчыны алгап ырла,
хүннүң-не Ооң камгалалын медээлеңер!
24Шупту чоннарга – Ооң алдарын,
бүгү аймактарга – Ооң кылган кайгамчык чүүлдерин чугаалап чедиңер ^o.
25Дээрги-Чаяакчы өндүр улуг база макталга төлептиг ^p,
өске бурганнардан артык коргунчуг болгай ^q.
26Өске чоннарның бурганнары шуптузу хоозун дүрзүлер-дир,
а Дээрги-Чаяакчы дээрлерни чаяаган болгай ^r.
27Чайынналчак мактал-хүндү – Ооң мурнунда,
күчү-күш болгаш өөрүшкү – Ооң турар черинде.

28Чоннарның аймактары, Дээрги-Чаяакчыны мактаңар,
Ооң алдары биле күчү-күжүн мактаңар; ^s
29Дээрги-Чаяакчының алдарлыг адын алгаңар,
өргүлдериңер ап алгаш, Ооң мурнунче кирип келиңер.
Дээрги-Чаяакчы Бодунуң ыдыктыг өргээзинге турда,
Аңаа мөгейиңер.
30Бүгү чер-делегей, Ооң мурнунга коргуп сириле!
Ол өртемчейни быжыг үндезинде тургузуп каан –
тендиш дивес-тир.

31Дээрлер өөрүп-хөглезин, чер-делегей өөрүп-байырлазын ^t.
Чоннар аразынга: «Дээрги-Чаяакчы хааннап турар!» дишсиннер ^u.
32Далай болгаш ону долган бүгү чүве шимээргеп доюлзун ^v,
хову-шөлдер болгаш ында амыдыраан бүгү чүве өөрүзүн.
33Арга-эзимде ыяштар Дээрги-Чаяакчының мурнунга өөрүп ырлашсын,
Ол чер-делегейни шын шиидер дээш кел чыдар болгай ^w.

34Дээрги-Чаяакчыга өөрүп четтириңер;
Ол ачылыг-дыр, Ооң энерели кезээ шагда үстүп төнмес-тир ^x.
35Мынча деп мөргүңер:
«Камгалакчы Бурганывыс, бисти камгалап көр;
Сээң ыдыктыг адыңны мактаар кылдыр,
Сээң мактал-хүндүң-биле чоргаарланыр кылдыр,
өске чоннар аразындан бисти бөлүп чыып,
олардан камгалап көр».
36Израильдиң Бурганынга – Дээрги-Чаяакчыга
кажан-даа, кезээ мөңгеде алдар! ^y

Ынчан бүгү чон: «Ындыг-ла болзунам!» – деп чугаалааш, Дээрги-Чаяакчыны мактаан.

Бурганга доктаамал бараан болуушкун

37– 38Давид Дээрги-Чаяакчының чагыг-керээзиниң аптаразының мурнунга доктаамал, хүннүң-не бараан болур кылдыр Асафты болгаш ооң ха-дуңмаларын ^z, Овед-Эдомну болгаш ооң төрел бөлүүнден алдан сес кижини аңаа арттырып каан. Идифуннуң оглу Овед-Эдом база Хоса хаалгачылар турган. 39А Садок бараалгакчыны болгаш ооң төрелдери – Бурганның бараалгакчыларын ^aa Гаваонда бедик черде ^ab турар Дээрги-Чаяакчының майгынынга тургузуп каан. 40Олар Дээрги-Чаяакчыга, Ооң Израильге чагаан хоойлузунда бижип каанын ёзугаар, өргүл салыр бедигээшке эртен-кежээ бүрүн өрттедир өргүлдерни доктаамал кылыр ужурлуг ^ac. 41Оон ыңай энерели кезээ шагда үстүп төнмес Дээрги-Чаяакчыны алдаржыдар кылдыр Еманны ^ad, Идифунну база адап шилиттинген өске-даа улусту томуйлап каан. 42Еман биле Идифун ^ae трубаларга, кимвалдарга болгаш Бурганны алдаржыдар өске хөгжүм херекселдеринге ыыткыр ойнап турган. А Идифуннуң оолдары хаалга кадарып турган.

Нафанның өттүр билген медеглели

(2 Хаан. 6:19—7:17)

43Хамык улус бажыңнарынче тарап чана берген, Давид база өг-бүлезин алгап-йөрээп каар дээш чанып келген чүве-дир.