‏ 1 Chronicles 5

Рувимниң үре-салгалы

1Израильдиң дун оглу Рувимниң үре-салгалы бо-дур. Рувим – дун оглу ^a. Ынчалза-даа кажан ол ачазының орун-дөжээн бужартатканының соонда ^b, улуу болур эргезин Израильдиң оглу Иосифтиң оолдарынга берипкен ^c. Ынчангаш Рувимниң ады төрел аймактар даңзызында улуу кылдыр кирбейн турар. 2Иуда бодунуң акы-дуңмаларының аразында эң күш-шыдалдыг-даа болза, Израильдиң чагырыкчызы оон үнген-даа болза ^d, улуу болур эрге ооңуу болбайн, Иосифтиң аймаанче шилчий берген.

3Израильдиң дун оглу Рувимниң оолдары: Энох, Фаллу, Хецрон болгаш Харми ^e.

4Иоилдиң үре-салгалы: Шемайя, Шемайяның оглу Гог, Гогтуң оглу Шимей, 5Шимейниң оглу Миха, ооң оглу Реайя, ооң оглу Ваал, 6Ваалдың оглу Беэра. Беэра дээрге рувимчилерниң нояны турган. Ону ассирий хаан Тиглат-Пилесер ^f тудуп аппарган. 7– 8Ооң төрелдери, төрел бөлүк аайы-биле, оларның ада-өгбелер даңзызы ёзугаар мындыг турган: кол кижи Иеиел, ооң соонда Захария база Бела. (Беланың адазы Азаз, Азазтың адазы Шема, Шеманың адазы Иоил). Беланың улузу Ароерден Невога база Ваал-Меонга ^g чедир чурттап чораан. 9А чөөн талазынче олар ээн кургаг ховунуң Евфрат хемче шөйүлген эң-не ужунга чедир чурттап чорааннар. Чүге дээрге галаад черге ^h оларның мал-маганы дыка хөй турган. 10Саул хаанның үезинде олар агар аймак-биле ⁱ дайылдажып, ону тиилеп каан. Олар майгыннарынга Галаадтың чөөн талазында бүгү девискээрге чурттай бергеннер.

Гадтың үре-салгалы

11Гадтың үре-салгалы рувимчилер-биле дужааштыр васан черге, Салхага чедир чурттап чораан ^j. 12Васанда оларның кол кижизи Иоил турган, Шафан ийи дугаары, ооң соонда – Иаанай биле Шафат. 13Оларның чеди акы-дуңмазы төрел бөлүктер аайы-биле мындыг аттарлыг: Михаил, Мешуллам, Шева, Иорай, Иаакан, Зия болгаш Евер. 14Олар шупту Хурийниң оглу Авихаилдиң үре-салгалы-дыр. (Хурийниң адазы Яроах, Яроахтың адазы Галаад, Галаадтың адазы Михаил, Михаилдиң адазы Иешишай, Иешишайның адазы Яхдо, Яхдонуң адазы Буз.) 15Гуниниң оглу Авдиилдиң оглу Ахи бодунуң төрел бөлүүнде кол кижи турган. 16Гадчылар Галаадка, Васанга болгаш аңаа хамааржыр хоорай, суурларга база Шарон оргулаажының ^k одар-белчиирлериниң эң-не кыдыг кызыгаарларынга чедир чурттап чорааннар. 17Олар шупту Иудеяның хааны Иоафамның үезинде ^l база Израильдиң хааны Иеровоамның үезинде ^m чизеледип чораан.

18Рувимчилер, гадчылар болгаш Манассияның аймааның чартыы – хылыш, дозуг-камгалал тудуп, ча адып билир дуржулгалыг, эрес-дидим дайынчылар. Дайынче үнүп шыдаар 44 760 эр улус бар турган. 19Олар агар, иетур, нафиш болгаш надав аймактар-биле дайылдажып үнүпкеш, 20дузаламчыны алганнар. Бурган агарлар болгаш оларның бүгү талалакчыларын израильчилерниң холунга хүлээдип берген, чүге дээрге израильчилер дайын үезинде Оон дуза дилеп чаннып турганнар. Олар Бурганга ынаныр боорга, Ол мөргүлүнге харыылаан. 21Израильчилер дайзыннарының мал-маганын эжелеп алган: 50 000 тевени, 250 000 шээр малды, 2000 элчигенни. 100 000 кижини база тудуп алган. 22Өлүрткен дайзыннар дыка хөй болган, чүге дээрге ол дайын Бурганның күзели-биле болган. Израильчилер ол аймактарның черлеринге туттуруушкун үезинге ⁿ чедир чурттааннар.

Иорданның ындында Манассияның аймааның чартыы

23Манассияның аймааның чартыы ол черге Васандан Ваал-Эрмонга чедир, Сенирге база Эрмон дагга ^o чедир чурттап чораан. Олар хөй турган. 24Оларның төрел бөлүктериниң кол улузу бо-дур: Эфер, Иший, Элиил, Азриил, Иеремия, Годавия болгаш Иагдиил – күш-шыдалдыг, ат-алдарлыг, боттарының төрел бөлүктериниң баштыңнары.

25Ынчалза-даа манассияжылар боттарының ада-өгбелериниң Бурганынга өскерлип, Ооң оларның мурнундан узуткап кааны ол черниң чоннарының бурганнары-биле самыырап эгелээн. 26Ынчан Израильдиң Бурганы Ассирияның хааны Фулду (азы Тиглат-Пилесерни) ^p оларга удурландырарга, ол хаан рувимчилерни, гадчыларны болгаш манассияжыларның ол чартыын оларның черинден туттуруп алгаш барган. Оларны Халахче, Хаворже, Аруже база Гозан хемче көжүрүпкен ^q – олар бо хүннерге чедир ында чурттап чоруур.