1Ch 11 | TyvTUV | STEP | Бүгү израильчилер Хевронда Давидке чыглып келгеш: «Бо-дур, силерниң хан төрелиңер улус-тур бис

‏ 1 Chronicles 11

Давидтиң бүгү Израильдиң хааны апарганы

(2 Хаан. 5:1-3, 6-10)

1 Бүгү израильчилер Хевронда Давидке чыглып келгеш: «Бо-дур, силерниң хан төрелиңер улус-тур бис – дээннер. – 2 Шагдан бээр-ле, Саул хаан турар үелерде безин, израильчилерни дайын-чаага баштап турган кижи силер силер ^a. Дээрги-Чаяакчы Бурганыңар силерге: „Сен Мээң израиль чонумну кадарар сен ^b. Израиль чонумнуң чагырыкчызы сен болур сен“– деп чугаалап турду». 3 Израильдиң бүгү баштыңнары Хевронда хаанга чедип кээрге, Давид олар-биле Дээрги-Чаяакчының мурнунга керээ чарып алган. Олар Давидти Израильдиң хааны болур кылдыр Дээрги-Чаяакчының Самуилди дамчыштыр чугаалаан сөзүн ёзугаар чаап кааннар ^c.

4 Давид болгаш бүгү израильчилер Иерусалимче (азы Иевусче) чорупкан. Ол хоорайга тус черниң чурттакчылары иевустар турган ^d. 5 Иевустуң чурттакчылары Давидке: «Сен бээр кирбес сен» – дээннер. Ынчалза-даа Давид Сион шивээзин эжелеп алган. Ол болза Давидтиң Хоорайы-дыр ^{▼▼ Сион дагда турар Иерусалимниң эрги талазы. Ында шивээ болгаш хаанның ордузу бар турган.}. 6 Давид мынча дээн: «Кым улусту мурнай иевустарны чылча шаап каарыл, ол кижи шериг баштыңчызы болур». Саруйяның оглу Иоав кымны-даа мурнай Иевусче киргеш, шериг баштыңчызы апарган ^f. 7 Давид ол шивээге турумчуп алган, ынчангаш ону Давидтиң Хоорайы деп адаан. 8 Давид Милло шивээзинден эгелеп ^g, хоорайны долгандыр быжыг камгалал кылып алган. А хоорайның арткан кезээн Иоав чаарткан. 9 Давид улам-на күштүг бооп кел чыткан ^h, Аг-шериглиг Дээрги-Чаяакчы ооң-биле кады болуп турган.

Давидтиң маадырлары

(2 Хаан. 23:8-39; 1 Чыл. 27:1-15)

10 Дээрги-Чаяакчының израиль чонга чугаалаанын ёзугаар Давидти хаан болдуруп, бүгү израильчилер-биле кады ооң хааннаашкынын деткип турган кол дайынчылары бо-дур.

11 Давидтиң дайынчыларының даңзызы бо-дур: хакмон уктуг Яшавам ^{▼▼ Өске бурунгу сөзүглелде «Яшавам» эвес, а «Иесваал» деп атты бижээн.}, үжен шериг баштыңчызының аразында кол кижи. Ол 300 дайзынче чыдазын көдүргеш, оларны чаңгыс тулчуушкун үезинде өлүрүп каан. 12 Ооң соонда ахохи уктуг Додонуң оглу Элеазар турар, ол база үш маадырның аразында. 13 Ол Давид-биле кады филистимнерниң тулчуушкунче чыглып турган чери Фас-Дамимге турган. Ол кезек черге арбай тарып каан турган чүве-дир. Израиль шериг филистимнерден дезип эгелээрге, 14 олар шөлдүң ортузунга артып калгаш, ол кезек черни камгалап ап, филистимнерни чылча шаап кааннар. Ынчалдыр Дээрги-Чаяакчы улуг тиилелгени берген.

15 Бир катап үжен шериг баштыңчызының аразындан ол үш маадыр хаяда Одоллам куюнга Давидке чедип келген ^j. Ол үеде филистимнерниң турлаа Рефаим шынаазынга турган ^k. 16 (Давид быжыглалдыг шивээге, а филистимнерниң доскуул чери – Вифлеемге турган). 17 Давид суг ижиксей бергеш: «Вифлеемниң хаалга аксында кудуктуң суун меңээ кым-бир кижи эккеп берген болза» – дээн. 18 Ынчан ол үш маадыр филистимнерниң турлаан таварып эрткеш, Вифлеемниң хаалга аксында кудуктуң суун ускаш, Давидке эккеп бергеннер. Ынчалза-даа Давид сугну ижеринден ойталаан, ону Дээрги-Чаяакчыга өргүл кылдыр төпкеш ^l, 19 мынча дээн: «Чок, мен ону ижип болбас мен, Бурганым! Бо улустуң ханын мен ижип шыдаар деп мен бе? Олар боттарының амы-тынын харамнанмайн чорааш, ону эккелдилер ышкажыл». Ынча дээш, ол сугну ишпейн барган. Шак ындыг чоруктарны ол үш маадыр кылып чораан чүве-дир.

20 Иоавтың акызы Авесса ^m ол үш маадырның даргазы турган. Ол 300 дайзынны бодунуң чыдазы-биле узуткап кааш, демги үш маадыр-биле деңге алдаржый берген. 21 Авесса ол үш маадырдан ийи катап сураглыг апаргаш, оларның баштыңчызы болган, ынчалза-даа үш маадырның санынче кирбээн.

22 Иодайның оглу, Кавцеилден ⁿ келген эрес-дидими-биле сурагжаан Ванея турган ^o. Ол арзылаң дег күштүг ийи моав кижини өлүрүп каан ^{▼▼ Өске бурунгу сөзүглелде «Ариил деп моав кижиниң ийи оглун» деп бижээн.}. Оон аңгыда хар чаап турган үеде, оңгарже киргеш, аңаа арзылаң база өлүрген. 23 Оон ыңай Ванея узуну беш кыры египет кижини база өлүрүп каан. Египет кижиниң холунда чыданың чоону пөс-таавычыларның өзек ыяжы дег турган, ындыг-даа болза, Ванея анаа даянгыыш тудуп алган чеде бергеш, египет кижиниң чыдазын былаап алгаш, ол-ла чыдазы-биле ону өлүрүп каан ^q. 24 Иодайның оглу Ванея ындыг чорук кылган кижи-дир. Ол база демги үш маадыр дег алдаржый берген. 25 Ванея үжен шериг баштыңчызының аразындан сураглыг турган, ынчалза-даа демги үш маадырның санынче кирбээн. Давид ону бодунга чоок дүжүмет кылып алган.

26 Өске эрес-дидим дайынчылар бо-дур: Иоавтың дуңмазы Асаил ^r, вифлеемчи Додонуң оглу Элханан, 27 Гарод чурттуг Шаммот, Пелон чурттуг Хелец, 28 Текоя чурттуг Иккештиң оглу Гира, Анатот чурттуг Авиезер, 29 Хуша чурттуг Сивхай, Ахох чурттуг Илай, 30 Нетофа чурттуг Магарай, Нетофа чурттуг Баананың оглу Хелед, 31 Вениаминниң черинде Гива чурттуг Рибайның оглу Иттай, Пирафон чурттуг Ванея, 32 Нахле-Гааш чурттуг Хурай, Арава чурттуг Авиел, 33 Бахарум чурттуг Азмавет, Шаалбон чурттуг Элияхба, 34 Гизон чурттуг Гашемниң оолдары, Гарар чурттуг Шагениң оглу Ионафан, 35 Гарар чурттуг Сахарның оглу Ахиам, Урнуң оглу Элифал, 36 Махера чурттуг Хефер, Пелон чурттуг Ахия, 37 Кармил чурттуг Хецро, Эзбайның оглу Наарай, 38 Нафанның дуңмазы Иоил, Гагрийниң оглу Мивхар, 39 аммон аймак-сөөктүг Целек, Беерот чурттуг Нахарай (ол Саруйяның оглу Иоавтың ок-чепсек тудукчузу турган), 40 итра уктуг Гира биле Гареб, 41 хет аймак-сөөктүг Урия ^s, Ахлайның оглу Завад, 42 Шизаның оглу Адина (ол дээрге Рувимниң аймаанда баштың кижи, ооң-биле кады үжен шериг турган), 43 Мааханың оглу Ханан, Мифан чурттуг Иосафат, 44 Аштерот чурттуг Озия, Ароер чурттуг Хотамның оолдары Шама биле Иеиел, 45 Шимриниң оглу Иедиаил база ооң Тиц чурттуг дуңмазы Иоха, 46 Махавим чурттуг Элиел, Элнаамның оолдары Иеривай биле Иошавия, Моав чурттуг Ифма, 47 Мецовая чурттуг Элиел, Овид болгаш Иаасиил.