‏ 1 Chronicles 12

Давидтиң баштайгы талалакчылары

1Давид Кистиң оглу Саулдан чаштып турда, Циклагка келген ^a, аңаа дайын чорударынга дузалажыр дээн эрес-дидим дайынчыларның чамдыызы бо-дур. 2Олар – ча-биле чепсегленген, оң, солагай холдары-биле дажап, ча-согун-биле адып билир турган улус ^b – Вениаминниң аймаандан Саулдуң төрелдери чүве-дир: 3Гива чурттуг Шемааның оолдары Ахиезер (баштыңчы) биле Иоас; Азмаветтиң оолдары Иезиел биле Пелет; Анатот чурттуг Бераха биле Иеху; 4Гаваон чурттуг Ишмайя (ол дээрге үжен шериг баштыңчызының бирээзи база оларның даргазы); Гедера чурттуг Иеремия, Яхазиил, Иоханан база Иегозавад; 5Хариф чурттуг Элузай, Иремот, Веалия, Шемария база Шефатия; 6корах төрел бөлүктен Элкана, Ишияху, Азариил, Иоезер база Иошавам; 7Гедор чурттуг Иерохамның оолдары Иоела биле Зевадия.

8Гадтың аймаандан база Давидтиң ээн кургаг ховуда шивээзинче эрес-дидим, чыда болгаш дозуг-камгалалдыг дайынчылар шилчип келген. Олар арзылаң дег шириин шырайлыг ^c, дагларда те-чуңма дег кашпагай улус. 9Оларның баштыңчызы Эзер, ийи дугаарында Авдий, үшкүзү Элиав, 10дөрткүзү Мишманна, бешкизи Иеремия, 11алдыгызы Аттай, чедигизи Элиел, 12сескизи Иоханан, тоскузу Элзавад, 13онгузу Иеремия, он биргизи Махбанай. 14Ол гадчылар шериг баштыңчылары бооп турган: эң бичези чүс шериг баштаан, а эң улуу муң шериг баштап турган чүве-дир ▼

▼ Азы: «Эң бичези 100 шеригге дең, эң улуу 1000 шеригге дең».

. 15Олар Иордан хемни бир дугаар айда, ол эриин ажыр дажый бергенде ^e, кежип алгаш, шынааның бүгү чурттакчыларын чөөн болгаш барыын чүктерже тарадыр ойладыпканнар.

16Давидтиң шивээзинче Вениаминниң болгаш Иуданың аймактарындан чамдык улус чедип кээрге, 17Давид оларга уткуштур үнүп келгеш: «Бир эвес силер меңээ дузалажыр дээш келген болзуңарза, сеткил-чүрээм силер-биле тудуш чаңгыс болур. А бир эвес силер, кажан мээң холдарым күчүлээшкинден арыг турда, мени дайзыннарымга садар дээш келген болзуңарза, бистиң өгбелеривистиң Бурганы көргеш, шииткей аан» – дээн. 18Ынчан Бурганның Сүлдези үжен шеригниң баштыңчызы Амессайны бүргеп келген, ол мынча дээн: «Амыр-ла, Давид. Бис сээң-биле кады бис, Иессейниң оглу! Сеңээ болгаш сээң талалакчыларыңга чедиишкинни күзеп тур бис, чүге дээрге Бурганың сеңээ дузалажып турар болгай». Давид оларны хүлээп алгаш, бодунуң шериглериниң баштыңчылары кылып каан.

19Манассияның аймаандан база чамдык улус Давидтиң талазынче шилчип келген. Ол үеде Давид филистимнер-биле кады Саулга удур дайылдажыр дээш үнүпкен турган чүве-дир. (Херек кырында Давид филистимнерге дузалашпаан, чүге дээрге филистим чагырыкчылар «Ол дээргизи Саулдуң талазынче шилчий бергеш, боттарывыстың бажывысче суг кудар» деп сүмелешкеш, ону чорудупкан.) ^f 20Кажан Давид Циклагче ээп чанып орда, Манассияның аймаандан дараазында улус ооң талазынче шилчип келген: Аднах, Иозавад, Иедиаил, Михаил, Иегозавад, Элиуй болгаш Цилтай. Олар Манассияның муң шериг баштыңчылары, 21шупту эрес-дидим дайынчылар-дыр. Олар Давидке ооң шериин баштаарынга ▼

▼ Азы: «Давидке удур келген дээрбечи бөлүктү базарынга».

дузалажып эгелээн, ооң шериг баштыңчылары апарган. 22Ынчалдыр Давидке хүннүң-не дузалажыр улус кээп-ле турган, түңнелинде ооң шерии Бурганның аг-шерии дег хөй апарган.

Шериглериниң Давидти хаан кылып аары-биле чыылганы

23Давид Хевронга турда, Дээрги-Чаяакчының сөзүн ёзугаар ^h, Саулдуң эрге-чагыргазын хүлээдир дээш келген шериглерниң саны бо-дур:

24Иуданың аймаандан – дайылдажырынга белен, чыдалыг болгаш дозуг-камгалалдыг 6800 кижи.

25Симеоннуң аймаандан – 7100 эрес-дидим дайынчы.

26Левийниң аймаандан – 4600 кижи. 27Аароннуң төрел бөлүүнүң баштыңы Иодай, ооң-биле кады 3700 кижи. 28Эрес-дидим аныяк Садок ⁱ база ооң төрел бөлүүнден 22 ноян.

29Саулдуң төрелдери болур Вениаминниң аймаандан – 3000 кижи. Оларның хөй кезии ол үеге чедир Саулга болгаш ооң салгалдарынга шынчы арткан турган.

30Эфремниң аймаандан – боттарының төрел бөлүктеринде ат-сураглыг 20 800 эрес-дидим дайынчы.

31Манассияның аймааның чартыындан – 18 000 кижи. Оларны Давидти хаан болдурарынга киришсин дээш, адап тургаш келдирткен.

32Иссахарның аймаандан – 200 мерген угаанныг баштың кижи келген. Олар дээрге Израиль кажан, чүнү кылза дээре дээрзин билир улус – а баштыңнарның бүгү ха-дуңмалары оларның сөзүн тооп дыңнаар турган.

33Завулоннуң аймаандан – дайылдажырынга белен кылдыр бүгү тала-биле чепсегленген 50 000 шериг демнии-биле Давидке чедип келгеннер.

34Неффалимниң аймаандан – 1000 баштыңчы; олар-биле кады чыдалыг болгаш дозуг-камгалалдыг 37 000 кижи.

35Данның аймаандан – дайылдажырынга белен 28 600 кижи.

36Асирниң аймаандан – дайылдажырынга белен 40 000 дайынчы.

37Иордан хемниң ындыындан – Рувимниң, Гадтың аймактарындан база Манассияның аймааның чартыындан бүрүн чепсегленген 120 000 кижи келген.

38Ол шериглер шуптузу дайынчы ёзу-биле, Давидти бүгү Израильдиң хааны кылып каар дээш, изиг күзели-биле Хевронга чедип келгеннер. Өске-даа бүгү израильчилер чаңгыс үн-биле Давидти хаан болдуруксап турганнар. 39Давидтиң чанынга ол дайынчылар үш хүн иштинде дойлап келгеннер, чүге дээрге ха-дуңмалары оларны аъш-чем-биле хандырган чүве-дир. 40Иссахарның, Завулоннуң база Неффалимниң черлеринден безин оларның чоок улузу хөй аъш-чемни: далганны, фига чимизин, үзүмнү, араганы, олива үзүн элчигеннерге, тевелерге, мулдарга, шарыларга чүдүрүп эккелген, бода, шээр малды база сүрүп эккелген, чүге дээрге израиль чон өөрүп-байырлап турган.