1Ch 18 | TyvTUV | STEP | Элээн үе эрткенде, Давид филистимнерни чылча шаап, томаарткаш, Геф хоорайны болгаш аңаа хамааржыр хоорай, суурларны эжелеп алган.

‏ 1 Chronicles 18

Давидтиң дайынчы чедиишкиннери

(2 Хаан. 8:1-14)

1 Элээн үе эрткенде, Давид филистимнерни чылча шаап, томаарткаш, Геф хоорайны болгаш аңаа хамааржыр хоорай, суурларны эжелеп алган. 2 Оон ыңай Давид моавтарны база чылча шапкан. Моавтар Давидтиң үндүт төлээр чалчалары апарган.

3 Цованың хааны Адраазар Евфрат хемниң унунга бодунуң чагыргазын тургузуп аар дээш кел чорда, Давид ону Хамат хоорай чанынга чылча шаап каан ^a. 4 Давид ол хаанның 1000 дайынчы тергезин, 7000 аъттыг, 20 000 чадаг шерии тудуп алган. Ол дайынчы тергелиг аъттарның балдырларының сиирлерин үзе кезип каапкан ^b, олардан чүгле чүс аътты бодунга арттырып алган ^{▼▼ Азы: «Ол дайынчы тергелерни узуткап каапкан, олардан чүгле чүс терге бодунга арттырып алган».}. 5 Цованың хааны Адраазарга дузалажыр дээш Дамаскыда чурттап турар арамей чон чедип кээрге, Давид 22 000 арамейни чылча шаап каан. 6 Давид арамей хоорай Дамаскыга камгалал шериин тургузуп каан, ынчалдыр арамейлер Давидтиң үндүт төлээр чалчалары апарган. Давид кайнаар-даа баарга, Дээрги-Чаяакчы аңаа тиилелге берип турган. 7 Давид Адраазарның улузундан алдын дозуг-камгалалдарын ап алгаш, оларны Иерусалимге эккелген ^d. 8 Адраазарның Тивхат болгаш Кун деп хоорайларындан Давид дыка хөй хүлер ап алган. (Ол хүлерден Соломон «далай» дээр чунар саваны, Бурганның өргээзиниң адагаштарын база хүлер эт-херекселди кылып каан.) ^e

9 Давид Цованың хааны Адраазарның бүгү шериин чылча шаап каан деп, Хаматтың хааны Тоу дыңнап каапкан. 10 Адраазар-биле дайылдашкаш, ону чылча шапканы дээш Давид хаанга байыр чедирип, ону алгап-йөрээри-биле Тоу хаан бодунуң оглу Гадорамны ^{▼▼ Өске бурунгу сөзүглелдерде «Иорам» деп бижээн.} олче чорудупкан, чүге дээрге Тоу Адраазар-биле дайылдажып турган. Гадорам белек кылдыр янзы-бүрү алдын, мөңгүн база хүлер савалар эккелген. 11 Давид хаан ол саваларны бүгү өске чоннардан – эдом, моав, аммон, филистим болгаш амалик чоннардан ап алганы алдын-мөңгүнү-биле кады Дээрги-Чаяакчыга тураскааткан ^g.

12 Саруйяның оглу Авесса Дус шынаазынга 18 000 эдом шеригни чылча шапкан. 13 Ол эдом черге камгалал шериин тургузуп каан, ынчалдыр эдом чурттуглар шуптузу Давидтиң чалчалары апарган ^h. Давид кайнаар-даа баарга, Дээрги-Чаяакчы аңаа тиилелге берген.

Давидтиң чоок дүжүметтери

(2 Хаан. 8:15-18; 20:23-26)

14 Давид хаан бодунуң чонун шын шиидип, олар дээш чөптүг чорукту тургузуп, бүгү Израильди чагырып-башкарып турган. 15 Саруйяның оглу Иоав шериглер даргазы турган ⁱ. Ахилудтуң оглу Иосафат төөгү бижээчизи турган ^j. 16 Ахитувтуң оглу Садок ^k база Авиафарның оглу Авимелех ^{▼▼ Өске бурунгу сөзүглелде «Ахимелех» деп бижээн.} – Бурганның бараалгакчылары ^m, а Шауша – бижээчи турган. 17 Иодайның оглу Ванея ⁿ керет, пелет уктуг шериглерниң ^{▼▼ Кереттер болгаш пелеттер – хаанның камгалакчылары турган өске аймак-сөөктүг шериглер чадавас (1 Хаан. 30:14; 2 Хаан. 8:18 көр).} баштыңчызы турган. А Давидтиң оолдары хаанның дужаалдарының күүселдезин хандырар кол кижилер турган.