‏ 1 Chronicles 23

Левиттерниң төрел бөлүктери

1Давид мага хандыр чурттап, назылап кырааш, оглу Соломонну Израильдиң хааны кылып кааш ^a, 2Израильдиң бүгү баштыңчыларын, Бурганның бараалгакчыларын болгаш левиттерни чыып алган. 3Үжен хардан өрү назылыг ^b левиттерни санап көөрге, оларның ниити саны 38 000 эр кижи болган. 4Олардан Дээрги-Чаяакчының өргээзинге янзы-бүрү ажылдар чорудары-биле 24 000 кижи томуйлап каан. Удуртукчу болгаш шииткекчилер – 6000 кижи, 5хаалга кадарар 4000 кижи база Дээрги-Чаяакчыга алдар-мактал тудуп, Давидтиң кылганы хөгжүм херекселдеринге ^c ойнаар – 4000 кижи болган.

6Давид оларны Левийниң оолдары – Гирсон, Кохат база Мерариниң аайы-биле ^d үш кол бөлүкке чарып каан чүве-дир.

7Гирсончулар – Лаедан биле Шимей ^e. 8Лаеданның оолдары: кол кижи Иехиил ^f, Зетам база Иоил – үш кижи. 9Шимейниң оолдары: Шеломит, Хазиил база Аран – үш кижи. Олар Лаеданның салгалдарының баштыңнары чүве-дир.
10Шимейниң оолдары: Яхат, Зиза, Иеуш болгаш Брия. Олар дөртелээ Шимейниң оолдары-дыр. 11Яхат кол кижи турган. Зиза – ийи дугаары. А Иеуш биле Брия хөй эвес ажы-төлдүг болгаш, чаңгыс төрел бөлүк кылдыр санаттырар апарган.

12Кохаттың оолдары: Амрам, Ицгар, Хеврон база Узиил – дөрт кижи ^g.
13Амрамның оолдары: Аарон биле Моисей ^h. Ааронну (бодун болгаш ооң оолдарын) Дээрги-Чаяакчыга бараан болзун дээш мөңгеде аңгылап каан турган ⁱ. Олар аажок ыдыктыг херекселдерни кадарар, Дээрги-Чаяакчының мурнунга чаагай чыттыг чүүлдер кыпсыр, Ооң ады-биле чонну алгап-йөрээр ужурлуг турган ^j. 14Моисей – Бурганның кижизи турган ^k. Ооң үре-салгалы анаа левиттер деп санаттырар.
15Моисейниң оолдары: Гирсам биле Элиезер ^l. 16Гирсамның оолдарындан: кол кижи Шевуил ^m. 17Элиезерниң оолдарындан: кол кижи Рехавия ⁿ. Элиезерниң оон өске оолдары турбаан-даа болза, Рехавияның оолдары дыка хөй болган чүве-дир.
18Ицгарның оолдарындан: кол кижи Шеломит.
19Хевроннуң оолдарындан: кол кижи Иерия, ийи дугаары Амария, үшкүзү Яхазиил, дөрткүзү Иекамам ^o.
20Узиилдиң оолдары: кол кижи Миха ^p, ийи дугаары Ишшия.

21Мерариниң оолдарындан: Махли биле Муши ^q. Махлиниң оолдарындан: Элеазар биле Кис. 22Элеазар оолдар чок тургаш, өлүп калган. Ол чүгле кыстарлыг турган. Кыстарын оларның төрелдери – Кистиң оолдары кадай кылдыр ап алган ^r.
23Мушиниң оолдарындан: Махли, Эдер база Иремот – үш кижи ^s.

24Левийниң төрел бөлүк аайы-биле салгалдары ол-дур. Левиттер деп санадып, баштыңнарының аайы-биле аттарын ададып, даңзыже киир бижиткен – чээрби хардан өрү назылыг ^t, Дээрги-Чаяакчының өргээзинде ажыл-албан чорудуп турар улус ол чүве-дир. 25Давид мынча дээн болгай: «Израильдиң Бурганы, Дээрги-Чаяакчы Бодунуң чонунга амыр-тайбың хайырлап ^u, Иерусалимде мөңгези-биле чурттай берген. 26Левиттер моон соңгаар Бурганга бараан болуру-биле ыдыктыг майгынны, аңаа хамааржыр эт-херекселди сөөртүп чорбас». 27Давидтиң сөөлгү чагыы-биле чээрби хардан өрү назылыг левиттерни ынчалдыр санаан чүве-дир.

28Левиттер Дээрги-Чаяакчының өргээзинде Аароннуң үре-салгалының чорудуп турар албан-ажылынга дузалажыр: өргээниң шөлдерин, шыгжаар өрээлдерин хайгаараар, бүгү ыдыктыг чүүлдерни арыг хевээр кылдыр кадагалаар база өске-даа ажылдарны кылчыр ^v. 29Олар Дээрги-Чаяакчыга салыр ыдыктыг хлеб дээш, далган-тараа өргүлү кылырда ажыглаар далган дээш, ажыткы чок боовалар дээш, быжырган, үс-биле холбашкан өргүлдер дээш база ол бүгүнүң хемчээли болгаш деңзизи дээш сагыш човаар. 30Олар эртенниң-не Дээрги-Чаяакчыга четтиргенин илередип, Ону алгап-мактаар ужурлуг. Ол ёзулалды кежээ база катаптаар. 31Амыр-дыш хүнүнде, ай чаазында база байырлалдарда Дээрги-Чаяакчыга бүрүн өрттедир өргүл кылып турар ^w. Олар чурум ёзугаар доктаадып каан саны-биле Дээрги-Чаяакчыга доктаамал бараан болур ужурлуг. 32Олар Ужуражылга майгынын болгаш ыдыктыг чүүлдерни кадагалап, ха-дуңмазы болур Аароннуң үре-салгалынга дузалажып, Дээрги-Чаяакчының өргээзинге боттарының хүлээлгелерин күүседип турар чүве-дир.