1Cor 11 | TyvTUV | STEP | Христостуң үлегер-чижээн эдерип чоруурум дег, мени өттүнүп көрүңер .

‏ 1 Corinthians 11

1 Христостуң үлегер-чижээн эдерип чоруурум дег, мени өттүнүп көрүңер ^a.

Бурганны алдаржыдып тура, кижиниң бажын шывар-шыппазы

2 Мени сактып артканыңар дээш база силерге дамчытканым өөредигни олчаан эдерип чорууруңар дээш, силерни мактап каайн. 3 Ынчалза-даа мону билип аарыңарны күзеп тур мен: Христос эр кижи бүрүзүнге «баш» боор ^b, эр кижи – херээжен кижиге «баш» боор ^c, а Бурган – Христоска «баш» боор ^d. 4 Ынчангаш бажын шып алгаш, мөргүүр азы өттүр билип медеглээр эр кижи бүрүзү «бажын» бак атка киирер. 5 А бажын шып албайн, мөргүүр азы өттүр билип медеглээр херээжен кижи ^e бүрүзү бодунуң «бажын» бак атка киирер. Ол бажын тазарты чүлүп алган херээженге дөмей. 6 Херээжен кижи бажын шывар хөңнү чок болза, шуут дөңгүр баштыг-даа боору аңаа хамаанчок ^f. А херээжен кижиге бажын таартыры азы дөңгүрертирери бужар чорук боор төлээде, ол бажын шып алзын.

7 Эр кижи бажын шыппас ужурлуг, чүге дээрге ол – Бурганның овур-хевири болгаш, Ону алдаржыдып турар-дыр. А херээжен кижи – эр кижини алдаржыдып турар ^g. 8 Херээжен кижиден эр кижи эвес, а эр кижиден херээжен кижи тывылган ^h. 9 Бурган херээжен кижиге кылдыр, эр кижини эвес, а эр кижиге кылдыр, херээжен кижини чаяап каан ⁱ. 10 Ындыг болганы дээш база дээрниң төлээлери дээш, херээжен кижи бажын шып алган чоруур ужурлуг ^{▼▼ Бо шүлүктүң утказы эки билдинмес. Ооң сөс сүрүп очулдурган утказы мындыг: «Ол дээш база дээрниң төлээлери дээш, херээжен кижи бодунуң бажының кырынга эрге-чагыргалыг турар ужурлуг».}. 11 Ындыг болза-даа, Дээрги-Чаяакчыга башкарты бергенде, эр кижиге хамаарышпас херээжен-даа, херээжен кижиге хамаарышпас эр-даа турбас ^k. 12 Харын херээжен кижиниң эр кижиден тывылганы дег, эр кижи база херээжен кижиден төрүттүнер, а бүгү улус Бургандан чаяаттынган.

13 Боттарыңар бодап-даа көрүңер даан, бажын шып албаан херээжен кижи Бурганга мөргүүр болза, ужурга тааржыр бе? 14 Эр кижи узун баш дүгү өстүрер болза, ооң ат-алдары баксыраарын ёзу-чурум силерни өөретпейн турар бе? 15 А херээжен кижиге бажының дүгү узун боору – ат-алдар-дыр, чүге дээрге узун баш дүгүн чайгаар бүткен шывыг кылдыр аңаа берген-дир ^l. 16 Чамдык улус бо айтырыг талазы-биле маргыжыксай бээри чадапчок, ындыг-даа болза, бисте-даа, Бурганга бүзүрээннер ниитилелдеринде-даа ындыг чаңчылдан өске чаңчыл чок.

Дээрги-Чаяакчының кежээки чемин шын эвес ажыглаары

17 Оон ыңай чугаалаар бодаан чүүлүмге силерни мактапкы дег чүм-даа чогул, чүге дээрге силерниң чыыштарыңарга ажыктыг эвес, а хоралыг тала чая база бээр-дир. 18 Хамыктың мурнунда, христиан ниитилел бооп, чыглып кээриңерге, араңарга аңгылажыышкын турар дээр-дир, ол чугааларның кезик-чамдыызынга бүзүрээр-дир мен ^m. 19 Чугаажок, силерниң араңарга аңгыланчыр чорук турбайн канчаар. Бурганга шылгаттырган улус ынчан силерниң араңарга илдең апаар ⁿ. 20 Ынчаарга шупту кады чыглып-даа турзуңарза, ол чыыжыңарны Дээрги-Чаяакчының кежээки чеми деп черле болбас-тыр. 21 Чүге дээрге кижи бүрүзү бодунуң эккелген кежээки чемин чип кириптер, түңнелинде чамдыыңар аштап артар, а өскелериңер эзиртир ижип алган боор-дур. 22 Ижип-чиир дээр болзуңарза, бажыңнарыңар чок чүве бе? Азы Бурганга бүзүрээннер ниитилелин херекке албайн, ядыы-түреңги улусту куду көрүп тур силер бе? ^o Ол дээш, силерге чүү дээйн? Мактаар мен бе? Чок, мактавас мен!

23 Силерге дамчыдып бергеним өөредигни мен бодум Дээрги-Чаяакчыдан алган болгай мен ^p: Дээрги Иисус Ону садыпкан дүне хлебти тудуп алгаш, 24 Бурганга өөрүп четтирген соонда, ону үзе тырткаш, мынча дээн болгай: «Бо дээрге силер дээш берип турарым Мээң мага-бодум-дур. Ону Меңээ тураскаал кылдыр ынчаар кылып чоруңар» ^q. 25 А кежээки чем соонда дашканы база көдүргеш, мынча дээн болгай: «Бо дашка дээрге Мээң ханым-биле чардынар чаа чагыг-керээ-дир ^r. Ону ижип турар саныңарда-ла, Меңээ тураскаал кылдыр ынчаар кылып чоруңар». 26 Бо хлебти чип база бо дашканы чооглап турар саныңарда-ла, Дээрги Иисус ээп келбээн шаанда, Ооң өлүмүн медеглеп турарыңар ол-дур.

27 Ынчангаш бодун төлептии-биле алдынмайн, ол хлебти чип турар азы Дээргиниң дашказындан чооглап турар кижи Дээргиниң мага-боду болгаш ханынга удур ^s бачыт үүлгеткен дээш буруулуг боор. 28 Кижи бүрүзү бодун баштай шүгдүнүп алзын, ол ынчан хлебти чип, дашканы чооглап боор. 29 Бир эвес силерниң кайы-бирээңер Дээргиниң мага-боду деп чүл ол дээрзин билбейн турар болза, ол ижип-чип тура, бодун шииткелге онаар. 30 Ол чылдагаан-биле силерниң араңарда шыдал-шинек чок, аарыг улус хөй бооп турар база эвээш эвес улус өлү бергилээн. 31 А бир эвес боттарывысты шүгдүнгеш, шииткей көрүп турган болзувусса, ол шииткелге онаашпас ийик бис. 32 А Дээрги-Чаяакчы бисти ам шиидип, кезедип тура ^t, бүгү бо делегей-биле кады бисти кезээ мөңгеде шиитпес дээш, кижизидип турары ол.

33 Ынчангаш, ха-дуңма, кады чемненири-биле чыылганыңарда, бот-боттарыңарны хүндүткелдиг манап алыңар. 34 Кайы-бирээңер аш болза, ол кижи бажыңынга чемненип алзын, оон башка Дээрги-Чаяакчының шииткели чыыжыңарга дүжер. Арткан херектерни силерге чеде бергеш, сайгарып, чурумчудар мен.