1Cor 15 | TyvTUV | STEP | Ха-дуңма, мээң силерге медеглээним Буянныг Медээни сактып келиңер. Ону хүлээп алгаш, үндезин кылып алган силер.

1 Ха-дуңма, мээң силерге медеглээним Буянныг Медээни сактып келиңер. Ону хүлээп алгаш, үндезин кылып алган силер. 2 Силерге медеглээн чүүлүмден быжыг туттунар болзуңарза, Буянныг Медээниң ачызында камгалалды ап турар силер, а оон башка силерниң бүзүрелиңер хей черге баар ^a.

3 Бодумнуң база хүлээп алганым эң чугула өөредигни силерге дамчытканым бо: Бижилгениң баш удур чугаалаанын ёзугаар, Христос бистиң бачыттарывыс дээш өлген ^b. 4 Бижилгениң баш удур чугаалаанын ёзугаар, Ону ажаап каарга, Ол үшкү хүнде катап дирлип келген ^c. 5 Ол Кифа Пётрга, а ооң соонда он ийи элчинге көзүлген ^d; 6 дараазында беш чүс ажыг ха-дуңмага чаңгыс угда көзүлген (оларның хөй кезии ам-даа дириг хевээр, а чамдыызы мөчүй бергилээн); 7 ооң соонда Иаковка ^e, а ол ышкаш бүгү элчиннерге ^f; 8 адак соонда меңээ – элекке төрүттүнген барасканга дег ^g – көзүлген. 9 Мен хамык элчиннерниң эң бичиизи болгай мен ^h, христиан ниитилелди истеп-сүрүп турган болгаш ⁱ, безин чадаарда элчин деп адаттырарынга төлеп чок мен. 10 Ынчалза-даа мен Бурганның авыралы-биле, ам кандыг-дыр мен, ындыг кижи болганым ол-дур. Ооң меңээ көргүскен авыралы хей черге барбаан: мен өске элчиннерге көөрде, кызымак ажылдап келдим ^j, ылавылаарга, мен-даа эвес, а менде бар апарган Бурганның авыралы болбайн канчаар.

11 Ынчангаш силерге суртаалдаары-биле мээң-даа келгеним азы өске элчиннерниң-даа келгени хамаанчок. Бис шупту Христостуң катап дирилгенин суртаалдап турган бис, а силер аңаа бүзүрей берген силер.

Өлүглерниң катап дирлири

12 Бир-тээ бистиң суртаалдап турарывыс дег, Христосту өлүглер аразындан катап диргискен болганда, катап дирлири болдунмас дээрзин силерниң чамдыыңар канчап шынзыдарыл? ^k 13 Бир эвес өлүглер аразындан катап дирлири болдунмас болза, Христос база катап дирилбээн ышкажыл. 14 А Христос катап дирилбээн болза, бистиң суртаалывыс-даа, силерниң бүзүрелиңер-даа хей черге барган-дыр. 15 Ынчан артында-ла Бурганга хамаарыштыр меге херечилер боор бис. Чүге дээрге Бурганның Христосту өлүглерден катап диргискенин суртаалдап турар-дыр бис, ынчалза-даа өлүглерниң катап дирилбезин шынзыдар болза, Ол Ону катап диргиспээн боор ышкажыл. 16 Өлгеннерниң катап дирлири болдунмас болганда, Христос база катап дирилбээн боор-дур. 17 А бир эвес Христос катап дирилбээн болза, силерниң бүзүрелиңер хоозун-дур, бачыттарыңар база силерден чайлаваан хевээр-дир ^l. 18 Ынчаарга Христоска бүзүреп чорааш, мөчээн улус ^m кажан кезээде өлүп читкен боор-дур. 19 А Христоска идегеливис чүгле чырык черге амыдыралывыс-биле харылзаалыг болза, делегейде бистен кээргенчиг кымның-даа чогу ол-дур.

20 Ынчалза-даа Христос херек кырында өлүглер аразындан катап дирилген ⁿ. Ындыг чоруктуң Эгелекчизи ол болган! ^o 21 Чүге дээрге өлүмнүң чаңгыс кижи дамчыштыр келгени дег, өлүглерниң катап дирлири база чаңгыс Кижи дамчыштыр кээр ^p. 22 Өгбевис Адамның хайында шупту улустуң өлүрү дег, Христос-биле харылзаазының ачызында шупту улус катап дирлир. 23 Ынчалза-даа катап дирилгеннер ээлчег ёзугаар катап дирлир: баштай – Христос, ооң соонда – Ол ээп келгенде – Аңаа бүзүрээн улус ^q.

24 А ооң соонда төнчү кээр, Христос бүгү чагырыкчыларны, эрге-чагырганы азы кара күштерни базып ^r, чок кылгаш, Бодунуң Чагыргазын ^s Бурган Адага хүлээдип бээр. 25 Чүге дээрге Бурган Христостуң хамык дайзыннарын Ооң буттарының адаанга чагыртпаан шаанда, Ол чагырар ужурлуг ^t. 26 Узуткаттырып каар эң сөөлгү дайзын – өлүм боор. 27 Чүге дээрге Бурган бүгү чүүлдү Ооң буттарының адаанга чагырткан ^u. «Бүгү чүүлдү» чагырткан деп чугаалаза-даа, ол «бүгү чүүлдү» Христоска чагыртып каан Бурганның оон аңгы турары билдингир. 28 Ол бүгү чүүлдү Аңаа чагырткан соонда, Оглу Боду база бүгү чүүлдү Ооң чагыргазының адаанга берген Бурганга чагыртыр ^v. Ынчангаш Бурган Боду-биле бүгү өртемчейни бүргей аптар ^w.

29 А оон башка өлгеннер дээш, сугга суктуруп турар улус чүге ынчап турарыл? Өлүглер шуут катап дирилбес чүве болза, олар дээш сугга суктурган херээ чүл? 30 Бис база боттарывысты чүү дээш базым санында-ла айыылга таварыштырып турар бис? ^x 31 А мен, ха-дуңма, хүннүң-не өлүмче уткуй чиге көөр-дүр мен, бистиң Дээргивис Христос Иисустуң мурнунга силер дээш чоргааралым-биле ону бадыткап болур мен ^y. 32 Эфес хоорайга «араатан аңнар-биле» демисежип турган-дыр мен. Кижиниң угаап шыдаар харыы-биле бодаарга, оон кандыг ажык чедип алганым ол? Өлүглер катап дирилбес турган болза: «Даарта өлүп каар бис – ам дойлап, ижип-чип аалы!» ^z – дивес бе?

33 Мегеледип албаңар! «Бак эш-өөр эң эки аажы-чаңны үрээр». 34 Чогууру-биле сергей берип, бачыт үүлгедирин соксадыңар! Араңарда Бурган дугайында билиг чок улус бар-дыр. Ыяткаш, арныңар кыссын! ^aa

Катап дирлип келген чаа мага-бот

35 А бир-ле кижи айтырар боор: «Өлүг улус канчап катап дирлирил? Олар ээп кээрге, мага-боду кандыг боорул?» ^ab 36 Сээдеңиңни! Сээң тарып турар үрезиниң, өлбээн шаанда, тынгарлып, өзүп үнмес ^ac. 37 Тарыырда, бүдүн үнүштү эвес, а тас үрезинни – кызыл-тасты азы өске-бир үрезинни – черге хөмер болгай сен. 38 А Бурган ооң мага-бодун күзээн аайы-биле хевирлеп, үрезин бүрүзүнге хууда мага-ботту хайырлаар.

39 Амылыгларның мага-боттары дөгере дөмей болбас: кижиниң мага-боду мал-маганыындан, мал-маганныы – куштуундан, а куштуу – балыктыындан ылгалдыг. 40 А ол ышкаш дээрниң чырымалдарының мага-боттары болгаш черниң мага-боттары бар. Ынчаарга дээрниң мага-боттарының хевири бир янзы, а черниң мага-боттарының – өске янзы. 41 Хүннүң өндүр чайынналчаа бир янзы, айның болгаш сылдыстарның чайынналчаа өске янзы. Сылдыстар база чайынналчаа-биле аңгыланып турар.

42 Өлүглер катап дирлирге ^ad, база шак ындыг боор: черге ирип-чыдыыр мага-ботту ажаап каар, а оортан ирип-чыдывас мага-бот көдүрлүр ^ae. 43 Черге дүрзүзү бак мага-ботту ажаап каар, а оортан каас-чараш мага-бот көдүрлүр. Черге кошкак мага-ботту ажаап каар, а оон күштүг мага-бот көдүрлүр. 44 Довуракка чер кырынга амыдыраарынга таарыштырган мага-ботту ажаап каар, а оон дээрге амыдыраарынга таарыштырган мага-бот көдүрлүр.

Черге таарыштырган мага-бот бар болганда, дээрге хамааржыр мага-бот база бар-дыр. 45 Бижилгеде: «Баштайгы кижи боор Адам амылыг апарган» деп бижээн-даа болгай ^af. А сөөлгү Адам ^{▼▼ Сөөлгү Адам/ийиги Кижи – Дээрги Иисус Христосту ынча деп турары ол (Рим. 5:14, 18 көр).} мөңге амыдыралдың үнер дөзү апарган. 46 Амыдырал баштай дээрге эвес, а черге боттаныр, а ооң соонда – дээрге боттаныр. 47 Баштайгы кижи черден келген, дой-довурактан чаяаттынган ^ah, а ийиги Кижи* дээрден келген ^ai. 48 Черниң кижизи кандыгыл, чер кырында өске улус база шак ындыг. Дээрниң Кижизи кандыгыл, дээрниң улузу база шак ындыг. 49 Черниң кижизиниң овур-хевирин дөзеп алганывыс дег ^aj, дээрниң Кижизиниң овур-хевирин база дөзеп аар бис.

50 Ынчангаш силерге чугаалап тур мен, ха-дуңма: эът-бот болгаш хандан бүткен улус Бурганның Чагыргазын салгап ап шыдавас. Ол ышкаш ирип-чыдый бээр чүүл ирип-чыдывас чүүлдү салгап ап шыдавас. 51 Дыңнаңар, мен силерге чажыт илередийн: шуптувус өлү бербес бис, ындыг болза-даа, Бурган шуптувусту өскертиптер ^ak. 52 Сөөлгү труба эдиптери билек ^al, карак чивеш аразында, көңгүс хензиг өйде өскерлир бис. Ол эдиптерге-ле, өлүг улус ирип-чыдывас апарган туруп кээр, бис база өскерлир бис ^am. 53 Ирип-чыдыыр чүүл ирип-чыдывас чүүлдү «кедип аар», а өлүп-чидер чүүл өлүм чок чүүлдү «кедип аар» ^an. 54 А кажан ол бүгү боттаны бээрге, Бижилгеде:

«Өлүм тиилеттирип бастырган-дыр!» ^ao
55 «О өлүм, сээң тиилелгең кайыл?
О өлүм, сээң шагар дылың кайыл?» ^ap ^{▼▼ Өске бурунгу сөзүглелдерде бо сөстер эвес, а «О өлүм, сээң шагар дылың кайыл? О тамы, сээң тиилелгең кайыл?» деп сөстер бижээн.} деп бижээн сөстер бүде бээр ^ar.

56 А өлүмнүң шагар дылы – бачыт-тыр, бачыттың күжү – ыдыктыг хоойлуда-дыр ^as. 57 Ынчалза-даа Бурганга өөрүп четтирээли, Ол Дээргивис Иисус Христосту дамчыштыр тиилелгени биске хайырлады! ^at 58 Ынчангаш, эргим ха-дуңмам, туруштуг болгаш чайгылыш чок бооп көрүңер. Дээрги-Чаяакчының даандырган ажыл-херээнге бүгү бодуңарны бараалгадыңар. Дээрги-Чаяакчы дээш кылган ажыл-херээңер хилис барбазын билир-ле болгай силер.