1Cor 2 | TyvTUV | STEP | Ха-дуңма, мен силерге кээримде, Бурганның чажыдын каас-коя, чечен чугаа-биле, онзагай мерген угаан-биле суртаалдаар бодап келбээн мен .

‏ 1 Corinthians 2

Павелдиң Коринфиге ооң мурнунда суртаалдааны

1 Ха-дуңма, мен силерге кээримде, Бурганның чажыдын ^{▼▼ Өске бурунгу сөзүглелдерде «Бурганның чажыды» эвес, а «Бурган дугайында херечилел» деп бижээн.} каас-коя, чечен чугаа-биле, онзагай мерген угаан-биле суртаалдаар бодап келбээн мен ^b. 2 Силер-биле кады тургаш, Иисус Христостан аңгыда, Ооң белдир-ыяшка өлүмүнден аңгыда, чүнү-даа билбес болурун шиитпирлээн мен ^c. 3 Мен силерге сулараан ^d, аажок коргуп-сирилээн чедип келдим. 4 А мээң медеглээн сөзүм биле суртаалым мерген угаан болгаш бүзүренчиг сөстер-биле эвес, а Сүлдениң күчүзүн бадыткааны-биле салдарлыг бооп турган ^e. 5 Ынчангаш силерниң бүзүрелиңер кижиниң мерген угаанынга эвес, а Бурганның күчү-күжүнге үндезилеттинген-дир ^f.

Бурганның мерген угааны Ооң Сүлдезин дамчыштыр илереттинген

6 Ындыг болза-даа, бис мерген угаанны бүзүрел талазы-биле өзүп чедишкен улус аразынга суртаалдап турар бис ^g. А ол мерген угаан – бо делегейниң эрге-чагыргазын ышкынар четкен чагырыкчыларының мерген угааны эвес-ле болгай. 7 Ооң орнунга Бурганның амдыгаа чедир чажыт турган мерген угаанын суртаалдап турар бис ^h. Ол мерген угаанны Бурган бисти өндүр бедик байдалче киирер дээш, өртемчейни чаяарының бетинде-ле баш удур шилип алган. 8 Бо делегейниң чагырыкчыларындан кым-даа ону билип шыдаваан ⁱ, оон башка олар өндүр улуг Дээргивисти хере шаппас ийик. 9 Харын Бижилгеде ол дугайында мынчаар бижээн:

«Бурганга ынак улуска Ооң белеткеп каан чүүлүн карак-даа көрбээн,
кулак-даа дыңнаваан база кижиниң угааны-даа билип шыдаваан» ^j.

10 А Бурган биске ол чүүлдү Сүлдени дамчыштыр илередип берген ^k, чүге дээрге Сүлдениң шинчилеп билбес чүвези чок, Ол Бурганның бодалдарының ханы дүвүн бүрүнү-биле билир ^l. 11 Кижиниң чүрээнде сүлдезинден аңгыда, ооң бодалдарын кым билирил? ^m Шак-ла ынчаар Бурганның Сүлдезинден аңгыда, Ооң бодалдарын кым-даа билбес. 12 А бис бо делегейге хамааржыр сүлдени хүлээп албаан бис. Харын Бурганның Сүлдезин хүлээп алган бис ⁿ, ынчангаш Ооң биске хайырлаан чүүлдерин билип ап шыдаар бис. 13 Ол дугайында кижиниң мерген угааны өөреткен сөстер-биле эвес ^o, а Сүлдениң биске шиңгээттиргени сөстер-биле суртаалдап турар бис. Сүлдеден келген алыс шынны Сүлдениң өөреткени сөстер-биле ^p чугаалап турарывыс ол ^{▼▼ Азы: «Сүлдеден келген алыс шынны Сүлдеге башкарткан улуска тайылбырлап турарывыс ол».}.

14 Кижи бүдүжүнүң аайы-биле чурттап чоруур кижи Бурганның Сүлдезиниң илереткен чүүлүн хүлээп албас ^r. Ол ону мелегей чүүл деп санаар база угаап шыдавас, чүге дээрге ол чүүлдү чүгле Сүлдениң дузазы-биле угаап билип боор. 15 Сүлдеге башкарткан кижи бүгү чүүлдү өттүр билип шыдаар, а ооң бодун кым-даа өттүр билип шыдавас.

16 «Кым Дээрги-Чаяакчының угаанын билип ап,
Аңаа арга-сүме берип шыдааныл?» ^s

А биске Христостуң угаанын берип каан.