1Cor 3 | TyvTUV | STEP | Ынчаарга, ха-дуңма, мен силерге, Сүлдеге башкарткан улуска дег, чугаалап шыдавас турдум, а биеэги кижи бүдүжүнүң күзээшкиннеринге алыскан улуска дег, Христос-биле харылзаалыг чаш төлдерге дег, чугаалап турдум.

‏ 1 Corinthians 3

Улус-биле эвес, чүгле Бурган-биле мактаныңар

1 Ынчаарга, ха-дуңма, мен силерге, Сүлдеге башкарткан улуска дег, чугаалап шыдавас турдум, а биеэги кижи бүдүжүнүң күзээшкиннеринге алыскан улуска дег, Христос-биле харылзаалыг чаш төлдерге дег, чугаалап турдум. 2 Мен силерни кадыг чем-биле эвес, а сүт-биле чемгерип турдум, чүге дээрге кадыг чем чиир харыыңар чок турду, ам безин ындыг хевээр-дир силер ^a. 3 Бачыттыг бүдүжүңерге чагыртыр хевээр-дир силер. Араңарга адааргал, алгыш-кырыш ам-даа бар турда ^b, биеэги бүдүжүңерниң күзээшкиннеринге алыскан улус боор эвес силер бе ^c, бодуңарны бүгү бо делегейниң улузу дег ап чоруур эвес силер бе? 4 Бирээңер: «Павелдиң талалакчызы мен», а өскеңер: «Аполлостуң талалакчызы мен» – деп турар болза, өске бүгү улус дег болбаан силер бе?

5 Ынчаарга Аполлос деп кымыл? ^d А Павел деп кымыл? Олар чүгле бараан болган улус-тур. Оларның ачызында Христоска бүзүрээн силер, Дээрги-Чаяакчы оларның кайызынга-даа тускай ажыл-херекти дааскан ^e. 6 Мен үрезин тарыдым, Аполлос ону суггарып турган ^f, а Бурган өстүрүп каан ^g. 7 Тараан болгаш суггарган кижиде онза чүү-даа чок ^h, чүгле өстүрүп каан Бурганда чугула ужур-утка бар-дыр. 8 Тарып турар кижи биле суггарып турар кижи чаңгыс сорулгалыг, оларның кайызы-даа кылган ажыл-херээнге дүүштүр шаңнал алыр ⁱ. 9 Бис Бурган-биле кады чаңгыс ажыл-херек кылып турар бис ^j, а силер – Ооң шөлү, Ооң тудуу силер ^k.

10 Мен, мерген угаанныг тудугжу дег, Бурганның меңээ хайырлаан авыралы-биле үндезинни салып кагдым ^l, а ооң кырынга аңгы кижи тудуп үндүрер. Ындыг-даа болза, кижи бүрүзү канчаар тудуп үндүреринче кичээнгей салзын. 11 Кым-даа салып каан үндезинден аңгы чаа үндезин салып шыдавас, а ол үндезинивис – Иисус Христос-тур ^m. 12 Кандыг-бир кижи шак ол үндезинге тудуп үндүрүп тура, алдын, мөңгүн, үнелиг эртине даштар азы ыяш, сиген, саваң ажыглап боор. 13 Кымның-даа ажыл-херээ илдең апаар, Христостуң ээп кээр хүнү ⁿ бүгү чүүлдү көскү кылыптар ^o, чүге дээрге Бурганның оду-биле шылгай бээр. Кижи бүрүзүнүң кандыг ажыл-херек бүдүргенин ол от шылгаар ^p. 14 Кандыг-бир кижиниң бүдүрген ажыл-херээ – туткан тудуу шылгалданы эрте берзе, ол кижи шаңнал алыр. 15 А бүдүрген ажыл-херээ өрттенип калза, ол когарап үнер. Ындыг болза-даа, ол кижи камгалал алыр, чүгле оозу, оттан ушта тырткан дег ^q, арга чадаарда камгалал болур.

16 Бурганның өргээзи бооп турарыңарны база Бурганның Сүлдези араңарда амыдырай бергенин билбезиңер ол бе? ^r 17 Бурганның өргээзин узуткап турар кижи бар болза, Бурган ол кижини узуткаар, чүге дээрге Бурганның өргээзи ыдыктыг, а силер дээрге ол өргээ-дир силер ^s.

18 Бодуңарга бодуңар дуурайлатпаңар. Кайы-бирээңер бо делегейниң улузунуң билиишкини-биле мерген угаанныг мен деп бодап турар болза, херек кырында мерген угаанныг боор дээш, ол кижи «мелегей» апарзын. 19 Бо делегейниң улузунуң мерген угааны – Бурганның мурнунга мелегей чүүл-ле болгай ^t. Бижилгеде мынча деп бижээн-дир:

«Ол мерген угаанныг дирткеннерни
оларның-на кажары-биле тудар» ^u.

20 А оон ыңай:

«Дээрги-Чаяакчы мерген угаанныгларның бодалдары
чүгле хей-бус дээрзин билир» ^v.

21 Ынчангаш кым-даа улус-биле мактанмазын, чүге дээрге бүгү чүве силернии-дир: 22 Павел, Аполлос, Кифа Пётр азы бо делегей-даа, амыдырал азы өлүм-даа, амгы азы келир үе-даа – ол бүгү силернии-дир, 23 а боттарыңар Христоска хамааржыр силер ^w, а Христос – Бурганга.