1Ki 12 | TyvTUV | STEP | Ровоам Сихем хоорайже чорупкан, чүге дээрге бүгү израильчилер ону хаан кылып аар дээш аңаа чыылган турган.

‏ 1 Kings 12

Израильчилерниң Ровоамга удур үймээни

(2 Чыл. 10:1—11:4)

1 Ровоам Сихем хоорайже ^a чорупкан, чүге дээрге бүгү израильчилер ону хаан кылып аар дээш аңаа чыылган турган. 2 Наваттың оглу Иеровоам ^b Соломон хаандан дезип чорутканы Египетке тургаш, ол дугайында дыңнап каан болгаш Египеттен чанып келген ^{▼▼ Өске бурунгу сөзүглелде «Египетке артып калган» деп бижээн.}. 3 Израильчилер айбычылар чорудупкаш, Иеровоамны кыйгыртып аарга, ол бүгү израиль чон-биле кады Ровоамга чедип келген. 4 Олар: «Сээң ачаң биске аар чүък чүдүрүп каан-дыр ^d, сен ам ачаңның биске албадап онааган күш четтинмес ажылын база биске чүдүрүп каан аар чүъгүн чиигедип бер. Бис ынчан сеңээ бараан болур бис» – дээннер.

5 Ровоам: «Ам барыңар, үш хонгаш, катап чедип кээр силер» – деп харыылаан.

Чон оон тарап чоруй барган. 6 А Ровоам хаан ачазы Соломон дириг чорда, аңаа бараан болуп турган кырганнар-биле сүмележип эгелээн. Ол: «Бо чонга чүү деп харыылаайн, кандыг сүме кадар силер?» – деп айтырган.

7 Кырганнар: «Бир эвес сен бөгүн бо чонга чалча апарып, оларга бараан болуп, ээлдек-эвилең чугаалашкаш, сеткилин хандырар харыы бээр болзуңза, олар кезээде сээң чалчаларың болур» – деп харыы бергеннер.

8 Ынчалза-даа хаан кырганнарның берген сүмезин хүлээп албайн, ооң-биле кады өскен, аңаа бараан болуп турган аныяк оолдар-биле база сүмелешкен. 9 Ровоам: «Кандыг сүме силер кадар силер? Меңээ: „Сээң ачаңның биске чүдүрүп каан чүъгүн чиигет“– деп турар бо чонга канчаар харыылаалы?» – деп айтырган.

10 Ооң-биле кады өскен аныяк оолдар: «Сеңээ: „Сээң ачаң биске аар чүък чүдүрүп каан-дыр, а сен ону чиигедип көр“– деп турар бо чонга: „Мээң биче салаам ачамның белинден чоон. 11 Мээң ачам силерге аар чүък чүдүрүп каан, а мен ону оон-даа аар кылып каар мен. Ачам силерни кымчы-биле кезедип турган, а мээң кеземчем скорпионнуң шагар дылы дег болур“– дээр сен» – деп харыылааннар.

12 Үш хүн эрте бээрге, Иеровоам болгаш бүгү чон Ровоам хаанның: «Үш хонгаш, катап чедип кээр силер» – деп дужааганын ёзугаар олче эглип келген. 13 Хаан чонга кадыг-дошкун харыы берген ^e. Ирейлерниң каткан сүмезин херекке албайн, 14 аныяк оолдарның сүмелээнин ёзугаар: «Мээң ачам силерге аар чүък чүдүрүп каан-дыр, а мен ону оон-даа аар кылып каар мен. Ачам силерни кымчы-биле кезедип турган-дыр, а мээң кеземчем скорпионнуң шагар дылы дег болур» – дээн.

15 Хаан шак ынчаар чонну дыңнавайн барган. Силом чурттуг Ахияны дамчыштыр Наваттың оглу Иеровоамга Бодунуң чугаалаан сөзү боттанзын дээш ^f, Дээрги-Чаяакчының ынчаар болур кылып кааны ол-дур. 16 Бүгү израиль чон хаан оларны дыңнавайн барганын көргеш, аңаа: «Давид-биле бир баг болган бис бе, Иессейниң оглу-биле бир аай чүвүс барыл? Израильчилер, аалдарыңарже ээп чангылаңар! ^g Давидтиң салгалы бодунуң төрел бөлүүн чагырзын!» – деп харыылаан. Израильчилер оон аалдарынче тарай берген. 17 А Ровоам чүгле Иудеяның хоорайларында чурттаан израильчилерни чагырып арткан.

18 Ровоам хаан чонче ажылчын күш даргазы Адонирамны ^h айбылап чорудупкан, ынчалза-даа бүгү израильчилер ону даш-биле өлүр соп каапкан. А Ровоам дайынчы тергезинче дүвү-далаш үне халааш, Иерусалимче дезе берген. 19 Израильчилер ынчалдыр Давидтиң салгакчыларынга удур амгы үеге чедир үймээн үндүрүп турар.

20 Бүгү израильчилер Иеровоамның ээп келгенин дыңнап кааш, ону хуралче кыйгырып алгаш, бүгү Израильдиң хааны кылып алганнар ⁱ. Давидтиң салгалынга чүгле Иуданың аймаа шынчы бооп арткан.

21 Соломоннуң оглу Ровоам Иерусалимге келгеш, Израильдиң чонунга удур дайылдажып, бодунга хаанныг чагырганы эгидип аарын шиитпирлээш, Иудеяның бүгү чонундан база Вениаминниң аймаандан 180 000 шилиндек шеригни чыып алган. 22 Ынчалза-даа Бурган Бодунуң кижизи Шемайяга ^j сөзүн ажыдып: 23 – 24 «Соломоннуң оглу, Иудеяның хааны Ровоамга, Иуда биле Вениаминниң бүгү аймак-чонунга база арткан чонга Дээрги-Чаяакчының чугаалаан чүвезин дамчыт: боттарыңарның ха-дуңмаңар израильчилер-биле чаалажып барбаңар. Шуптуңар бажыңнарыңарже чана бериңер, чүге дээрге ол бүгү Мээң күзел-соруум ёзугаар болган-дыр» – дээн.

Олар Дээрги-Чаяакчының сөзүн тооп дыңнааш, ооң аайы-биле чана бергеннер.

Иеровоамның чонну дүрзү-бурганнарга мөгееринче кииргени

25 Иеровоам Эфрем дагларында Сихем хоорайны ^k быжыглай тудуп алгаш, аңаа чурттай берген. Ол оон чоруткаш, Пенуэл хоорайны ^l быжыглай тудуп алган.

26 Иеровоам сеткил-сагыжында мынча деп бодаан: «Чагырга Давидтиң салгалынче катап база шилчий берип боор-дур. 27 Бир эвес бо чон Иерусалимде Дээрги-Чаяакчының өргээзинче өргүл салып баарын уламчылаар болза ^m, ооң сеткил-чүрээ бодунуң дээргизи, Иудеяның хааны Ровоамче эгли бээр. Олар мени өлүрүп кааш, Иудеяның хааны Ровоамче эгли бээрлер».

28 Улузу-биле сүмелешкеш, хаан ийи алдын бугажык кылып алгаш ⁿ, чонга: «Ам Иерусалимче барган херээңер чок-тур; израиль чон, сени египет черден үндүре берген Бурганың ^{▼▼ Азы: «Бурганнарың».} бо-дур» – дээн ^p.

29 Ынчангаш оларның бирээзин Вефил хоорайга, а өскезин – Дан хоорайга тургузуп каан. 30 Ол чорук бачытка чедирген. Чон бугажыкка мөгеер дээш Данга чедир безин барып эгелээн.

31 Иеровоам мөгейиишкин кылыр бедик черлер тудуп, чон аразындан Левийниң салгакчыларынга хамаарышпас улусту Бурганның бараалгакчылары кылдыр томуйлап каан. 32 Ол сес айның он беште Иудеяда демдеглеп турар байырлал ышкаш байырлал доктааткаш ^{▼▼ Моисейниң хоойлузун ёзугаар израиль чон чеди айның он бештен эгелээш, Чадырлар байырлалын демдеглеп, байырлаар ужурлуг турган (Лев. 23:34 көр).}, Вефилде өргүл салыр бедигээшке – кылып алган бугажыктарынга – өргүлдер салып турган. Ол Вефилге тудуп алганы бедик черлерге бараан болзун дээш, Бурганның бараалгакчыларын томуйлап каан. 33 Израильчилерге байырлал доктаадып берип, бодунуң туразы-биле шилип алган хүнү – сес айның он беште Иеровоам Вефилде тудуп алганы өргүл салыр бедигээшче чаагай чыттыг өргүл салыры-биле чоокшулап келген.