‏ 1 Kings 21

Навуфейниң виноград шөлү

1Элээн үе эрткенде, дараазында болуушкуннар болган. Изреел хоорай чурттуг Навуфей деп кижи ол хоорайга, Самарияның хааны Ахавтың ордузунуң чанынга, виноград тараан шөлдүг турган. 2Ахав Навуфейге: «Виноградың шөлү мээң ордум чанында-дыр, ону меңээ берип көрем ^a – огород кылып аайн. Орнунга мен сеңээ оон-даа эки виноград шөлү бээр мен азы, күзээр болзуңза, өртээн мөңгүн-биле төлеп берейн» – дээн.

3А Навуфей: «Ада-өгбемден дамчып келген өнчүмнү сеңээ бериптеримни Дээрги-Чаяакчы болдурбазын!» – деп харыылаан ^b.

4Ахав ордузунче дүвүрелге алзып, хөңнү баксырап чана берген ^c, чүге дээрге Изреел чурттуг Навуфей аңаа: «Ада-өгбемден дамчып келген өнчүмнү сеңээ бербес мен» – дээн болган. Ол чем чииринден ойталап, орнунга хая көрнүп чыдып алган. 5Хаанның кадыны Иезавел ооң өрээлинче кирип келгеш: «Чүге мынчаар дүвүреп турарың ол? Чүге чем чиведиң?» – деп айтырган.

6Ахав аңаа: «Чүге дээрге мен Изреел чурттуг Навуфейге: „Виноградың шөлүн меңээ садып көрем азы, күзээр болзуңза, ооң орнунга өске виноград шөлүнден берейн“– дидим. А ол: „Мен сеңээ виноградым шөлүн бербес мен“– дээр-дир» – деп харыылаан.

7Иезавел кадын аңаа: «Ол канчап турарың ол, сени Израильдиң хааны дээр-даа аргажок-тур! Туруп, чемненип ал, оожургап көр! Изреел чурттуг Навуфейниң виноград шөлүн мен сээң холуңга киирип бээйн» – дээн.

8Кадын Ахавтың адындан чагаалар бижээш ^d, оларны ооң таңмазы-биле диизелээш, Навуфей-биле кады чаңгыс хоорайга чурттап турган чоннуң баштыңнарынче болгаш ызыгууртаннарже чорудупкан. 9Чагааларга ол мынча деп бижээн:

«Шээрлээшкин хүнүнден чарлаңар, Навуфейни чон аразынга хүндүлүг черже олуртуп калыңар. 10А аңаа дужааштыр ийи дүржок кижиден олуртуп калыңар. Олар аңаа удур херечилеп, Навуфейниң Бурганны база хаанны бак сөглеп турганын чугаалазын ^e. Ооң соонда ону хоорайдан үндүре бергеш, даш-биле соп өлүрүп калыңар».

11Навуфейниң хоорайынга чурттап турган чоннуң баштыңнары болгаш ызыгууртаннар Иезавелдиң бижип, чоруткан чагааларында оларга дужааганын ёзугаар кылып эгелээннер. 12Олар шээрлээшкин чарлааш, Навуфейни чон мурнунда хүндүлүг черге олуртуп кааннар. 13Оон ийи дүржок кижи кээп, аңаа дужааштыр олуруп алгаш, чон мурнунга ону буруудадып: «Навуфей Бурганны база хаанны бак сөглеп турду» – дээн. Улус ону хоорайдан үндүре бергеш, даш-биле соп өлүрүп каан.

14Олар оон Иезавелге «Навуфейни даш-биле соп кааптарга, ол өлүп калды» деп медээ чедирер айбычылар чорудупкан. 15Навуфейни даш-биле соп өлүргенин дыңнап кааш, Иезавел Ахавка: «Барып, Изреел чурттуг Навуфейниң сеңээ садарындан ойталаан виноград шөлүн бодуңга ап ал. Ол кижи ам чок апарган, өлүг-дүр» – дээн.

16Ахав Навуфейниң өлгенин дыңнап кааш, ооң виноград шөлүн бодунга барып ап аар дээш чорупкан.

17Дээрги-Чаяакчы Бодунуң сөзүн Тешви чурттуг Илияга ^f ажыдып, мынча деп чугаалаан: 18«Израильдиң хааны, Самарияда чагырып турар Ахавка уткуштур чорувут. Ол хаан ам Навуфейниң виноград шөлүн ээлеп аар дээш чеде берген турар-дыр. 19Аңаа Дээрги-Чаяакчының чугаалаан чүвезин дамчыт: „Сен кижи өлүрүп кагдың, а ам ооң өнчүзү болур черни база ээлеп ап тур сен бе?“Ооң соонда Дээрги-Чаяакчының чугаалаан чүвезин уламчылап дамчыт: „Ыттар Навуфейниң ханын чылгап турган черге сээң ханыңны база ыттар чылгаар! ^g“»

20Илия Ахавче чорупкан. Ахав Илияга: «Мээң дайзыным, сен мени тып алдың!» – дээн.

«Тып алдым – деп, демгизи харыылаан, – чүге дээрге сен Дээрги-Чаяакчының мурнунга бодуңну бузут-бактыг чүве кылыры-биле садыптың. 21Дээрги-Чаяакчы мынча дээн: „Мен сенче айыыл-халап ыдар мен, сени өрттедиптер мен. Ахавтың үре-салгалында эр кижи бүрүзүн – кул-даа, хостуг-даа кижини ▼

▼ Азы: «Аныяк-даа, улуг-даа кижини».

– кыра шаап каар мен ⁱ. 22Сээң ук-салгалыңны Наваттың оглу Иеровоамның салгалы-биле база Ахияның оглу Ваасаның салгалы-биле дөмейлештир аажылаар мен ^j, чүге дээрге сен Мени килеңнеттиң, Израильди бачытче киирип кагдың“. 23А Иезавелге хамаарыштыр Дээрги-Чаяакчы мынча дээн: „Иезавелди ыттар Изреелдиң ханазының баарынга чип кааптар ^k. 24Ахавка хамааржыр улустан хоорайга өлүп каар кижини ыттар чиптер, а хову-шөлге өлүп каар кижини дээрниң куштары соктап чиптер ^l“».

25(Кадайы Иезавелге күткүттүргеш ^m, Дээрги-Чаяакчының мурнунга бузут-бактыг чүве кылыры-биле бодун садыпкан Ахав ышкаш кижи туруп-даа көрбээн. 26Ол хаан кедергей бужар чүүлдер кылып, Дээрги-Чаяакчының израильчилерниң мурнундан сывыртапканы амор чон ышкаш ⁿ, дүрзү-бурганнарга мөгейип турган чүве-дир.)

27Ахав ол сөстерни дыңнап кааш, кедип чораан хевин ора тыртып каапкаш, качыгдалдың самдар хевин кедип алгаш, шээрленип эгелээн. Ол качыгдал хевин ужулбайн удуп, муңчулуп чоруп турган.

28Дээрги-Чаяакчы Бодунуң сөзүн Тешви чурттуг Илияга ажыдып: 29«Ахавтың Мээң мурнумга канчаар томаарый бергенин көрдүң бе? Мээң мурнумга томаарааны дээш, ол дириг чорда, Мен олче айыыл-халап ытпас мен, ынчалза-даа ооң оглунуң назынында Ахавтың үре-салгалынче айыыл-халап ыдар мен ^o» – деп чугаалаан.