‏ 1 Kings 3

Соломон хаанның мерген угаан дилээн мөргүлү

(2 Чыл. 1:7-12)

1Соломон Египеттиң хааны фараон-биле төрелдежип, ооң уруун кадай кылдыр ап алган ^a. Хаан бодунуң ордузун ^b, Дээрги-Чаяакчының өргээзин ^c болгаш Иерусалимни долгандыр хананы ^d тудар бетинде, кадынын Давидтиң Хоорайынга ^e чурттадып каан.

2А чон биеэги хевээр мөгейиишкин кылыр бедик черлерге өргүл салып турган, чүге дээрге Дээрги-Чаяакчының адынга тураскааткан өргээ ам-даа туттунмаан турган чүве-дир. 3Соломон бодунуң ачазы Давидтиң изин истеп, Дээрги-Чаяакчыга ынак турган, ындыг-даа болза, ол база демги-ле бедик черлерге Аңаа өргүл салып, чаагай чыттыг чүүлдер кыпсып турган ^f.

4Бир катап хаан өргүл салыр дээш Гаваон хоорайже чорупкан, чүге дээрге кол бедик чер аңаа турган чүве-дир ^g. Соломон ол бедигээшке бүрүн өрттедир муң өргүлдү салган. 5Гаваонга Дээрги-Чаяакчы дүне када Соломоннуң дүжүнге кирген ^h. Бурган: «Сеңээ чүнү берейн, дилеп ал» – дээн.

6Соломон: «Сен Бодуңнуң чалчаң, мээң ачам Давидке, ооң Сеңээ бердингени дээш, Сээң мурнуңга чөптүг-шынныг болгаш ак сеткилдиг болганы дээш, өндүр улуг энерелиң көргүстүң. Сен аңаа өндүр улуг энерелиңни хевээр арттырып, ам ынчалдыр бүткени дег, ооң дүжүлгезинге саадапкан оолду аңаа хайырладың. 7Дээрги-Чаяакчы Бурганым, ам Сен Бодуңнуң чалчаң мени ачам Давидтиң орнунга хаан кылып кагдың. А мен болза бичии оол-дур мен ⁱ, албан-хүлээлгемни канчаар күүседирин билбес-тир мен. 8Сээң чалчаң мен Сээң шилип алган чонуң аразында-дыр мен. Ол дээрге санаары-даа, эргий көөрү-даа болдунмас хөлүн эрттир хөй чон-дур ^j. 9Ынчангаш Бодуңнуң чалчаңга Сээң чонуңну шын шиидер база эки-бакты ылгап шыдаар кылдыр угаанныг чүректен хайырлап көр ^k. Чүге дээрге Сээң бо хөй санныг чонуңну кым башкарып шыдаарыл?» – дээн.

10Дээргиге Соломондан ындыг дилег кирери таарымчалыг болган. 11Бурган аңаа мынча дээн: «Сен ынча деп дилээш, бодуңга узун назынны-даа, байлакшылды-даа дилеведиң, дайзыннарың өлүмүн-даа дилеведиң, а шын шииткел кылып билир боору-биле угаан-сарыыл диледиң. 12Ындыг болганда, Мен сээң дилээңни хандырар мен. Сеңээ мерген угаанныг, сарыылдыг чүректи хайырлаар мен, сээң мурнуңда-даа сен ышкаш угаан-сарыылдыг кижи турбаан, сээң сооңда-даа сеңээ дөмейлежир кижи турбас ^l. 13Оон туржук, Мен сеңээ дилевээн-даа чүвеңни: байлакшыл биле алдар-атты бээр мен ^m. Ынчангаш назының дургузунда хааннар аразында сээң-биле эннежир хаан турбас. 14Бир эвес сен ачаң Давидтиң кылып турганы дег, Мээң оруктарым эдерип, Мээң дүрүмнерим, айтыышкыннарымны күүседип, сагыыр болзуңза, Мен сеңээ узун назынны хайырлаар мен ⁿ».

15Соломон ынчан оттуп келгеш, дүш көргенин билип каан. Ол Иерусалимче ээп келгеш, Дээргиниң ыдыктыг аптаразының мурнунга туруп алгаш, бүрүн өрттедир өргүлдерни база эп-найырал өргүлдерин эккеп салган. Оон ол бодунуң бүгү дүжүметтеринге дой кылган ^o.

Соломон хаанның маргышты мерген угаанныг шиитпирлээни

16Бир катап хаанга ийи самыын-садар херээжен келгеш, ооң мурнунга туруп алган. 17Оларның бирээзи мынча дээн: «О, мээң дээргим! Бо херээжен-биле чаңгыс бажыңда чурттап тур мен. Ооң чанынга тургаш, божуп алдым, 18а ооң соонда соңгузу хүнде ол база божуп алган. Бис кады турдувус, бис ийиден аңгыда, бажыңга өске кым-даа турбаан.

19Дүне када бо херээженниң чаш оглу өлүп калган, чүге дээрге авазы удуп чыда, чаш оглун думчуктур базып алган.

20Дүне када ол туруп келгеш, чалчаңар мен удуп чыдырымда, оглумну ап алгаш, хөрээнге чыпшыр чыттыргаш, бодунуң өлүг оглун мээң хөрээмге чыпшыр салып каан болду. 21Эртен оглумну эмзирер дээш оттуп кээримге, ол өлүг чыдыр. Топтап көргеш, мээң божаан оглум эвес деп билип кааптым».

22Өске херээжен: «Чок! Дириг оол мээңии-дир, а өлүг оол – сээңии-дир!» – дээн.

А бирги херээжен: «Чок! Өлүг оол сээңии-дир, а дириг оол – мээңии-дир!» – дээр болган. Олар хаанның мурнунга ынчаар маргыжып туруп берген.

23Хаан: «Бирээңер: „Мээң оглум дириг, а сээңии өлүг“– деп турар, а өскеңер: „Чок! Сээң оглуң өлүг, а мээңии дириг!“– деп турар...» – дээн.

24Ооң соонда хаан: «Хылыштан эккелиңер» – дээн. Хаанга хылышты эккеп берген. 25Ынчан ол: «Дириг чаш оолду ийи чара одура шапкаш, бир чартыын бо херээженге, өске чартыын – дуу херээженге бериптиңер!» – деп дужааган.

26Оглу дириг турган херээжен, бодунуң чаш төлүн аажок кээргей бергеш, хаанга: «О, дээргим! Бо чаш оолду дуу херээженге бериптиңер, ону өлүрбейн-не көрүңер!» – дээн.

А өске херээжен: «Сээңии-даа эвес, мээңии-даа эвес болзун. Оолду одура шааптыңар!» – дээн.

27Хаан ынчан: «Дириг чаш төлдү өлүрбейн, бирги херээженге бериптиңер, ооң авазы ол-дур» – деп доктааткан.

28Хаанның үндүрген шииткелин дыңнааш, бүгү Израиль ону ханы хүндүлеп эгелээн, чүге дээрге аңаа шынныг шииткел үндүрерде хереглээр Бурганның мерген угаанын хайырлаан болган ^p.