1Ki 4 | TyvTUV | STEP | Соломон хаан бүгү Израильди чагырып турган.

‏ 1 Kings 4

Соломоннуң дээди дүжүметтери болгаш тус чер чагырыкчылары

1 Соломон хаан бүгү Израильди чагырып турган. 2 Ооң дээди дүжүметтери бо-дур: Садоктуң салгакчызы Азария – Бурганның бараалгакчызы ^a; 3 Шишаның оолдары Элихореф биле Ахия – бижээчилер; Ахилудтуң оглу Иосафат – төөгү бижикчизи ^b; 4 Иодайның оглу Ванея – шериг баштыңчызы ^c; Садок биле Авиафар – Бурганның бараалгакчылары ^d; 5 Нафанның оглу Азария – тус чер чагырыкчыларының даргазы; Нафанның оглу Завуд – Бурганның бараалгакчызы, хаанның өңнүү ^e; 6 Ахисар – орду хайгааракчызы; Авданың оглу Адонирам – ажылчы күш даргазы ^f.

7 Соломон бүгү Израильди башкарып турар он ийи тус чер чагырыкчылыг турган. Олар хаанга болгаш ооң чоок улузунга аъш-чем чорудуп бээр хүлээлгелиг чүве-дир. Кайызы-даа курлавыр аъш-чем-биле чылдың бир айында хандырылганы харыылаар ужурлуг турган. 8 Оларның аттары бо-дур:

Бен-Хур – Эфрем дагларында;

9 Бен-Декер – Макац, Шаалбим, Бет-Шемеш, Элон болгаш Бет-Ханан хоорайларда;

10 Бен-Хесед – Арубот деп черде, аңаа Сохо биле бүгү хефер чер хамааржып турган;

11 Бен-Авинадав – бүгү Нафат-Дор деп черде ^g (ооң кадайы Соломоннуң уруу Тафат турган);

12 Ахилудтуң оглу Баана – Таанах, Мегиддон хоорайларда ^h болгаш Изреел хоорайдан ⁱ кудулдур, Цартанның чоогунда чыдар бүгү Бет-Санда база Бет-Сандан Авел-Мехола хоорайга чедир, Иокмеам хоорайның безин ындынга чедир;

13 Бен-Гевер – Галаадтың Рамот хоорайда ^j; Манассияның оглу Иаирниң Галаадта хоорай-суурлары ^k, Васан деп черде Аргов девискээр – долгандыр ханаларлыг, ханаларында хүлер дээктерлиг алдан хоорай ^l аңаа хамааржып турган;

14 Гиддонуң оглу Ахинадав – Маханаим хоорайда;

15 Ахимаас – Неффалимниң черинде (ол Соломоннуң уруу Васематты кадай кылдыр ап алган);

16 Хушайның оглу Баана – Асирниң черинде болгаш Ваалотта;

17 Паруахтың оглу Иосафат – Иссахарның черинде;

18 Эланың оглу Шимей – Вениаминниң черинде;

19 Урийниң оглу Гевер – галаад черде (амор чоннуң хааны Сигоннуң черинде база Васанның хааны Огтуң черинде) ^m чагырыкчы турган. Ол черлерниң кайызы-даа чаңгыс чагырыкчылыг турган.

Соломоннуң байлак-чаагай күрүнези

20 Иудея биле Израильдиң чону далай эриинде элезин дег хөй бооп ⁿ, дойлап, хөглеп чурттап турган. 21 Соломон Евфрат хемден эгелээш, филистим черге чедир база Египет-биле кызыгаарга чедир ^{▼▼ Өске бурунгу сөзүглелде «Филистим черде хемден эгелээш, Египет-биле кызыгаарга чедир» деп бижээн.} бүгү күрүнелерни чагырып турган ^p. Ол күрүнелер албан-үндүт төлеп ^q, Соломонга ооң бүгү назынының дургузунда бараан бооп келгеннер.

22 Соломонга хүннүң-не эккеп дужаар ужурлуг аъш-чем бо-дур: үжен кор ^{▼▼ 30 кор – 6000 ажыг литрге деңнежир.} ишти эң-не эки шынарлыг далган болгаш алдан кор ишти анаа далган; 23 тургузу семиртир азыраан он инек, одар-белчиирге оъттап турган чээрби инек, чүс хой; ол ышкаш ивилер, чээреннер, сайгактар болгаш семиртир азыраан куштар.

24 Чүге дээрге Соломон Евфрат хемниң барыын талазында, Типсахтан Газа хоорайга чедир турар бүгү күрүнелерни чагырып, чоок-кавыда бүгү чурттар-биле тайбың харылзаазын тудуп алган турган ^s. 25 Ооң бүгү назынының дургузунда Иудея биле Израиль соңгу чүкте Дан хоорайдан эгелээш, мурнуу чүкте Беэр-Шева хоорайга чедир кижи бүрүзү бодунуң виноградын, фига ыяжын болбаазырадып, айыыл чок, тайбың чурттап келген ^t.

26 Соломон дайынчы тергеге сугар аъттар баглап, тургузар 40 000 черлиг, 12 000 аъттыг шериглиг ^{▼▼ Азы: «12 000 аъттыг».} турган ^v. 27 Тус чер чагырыкчыларының кайызы-даа бодунуң харыылаар айында Соломон хаанга болгаш хаан-биле кады чемненип турар улуска херек бүгү аъш-чемни эккеп дужаап, чүү-даа чүве четчир болзун дээш, хайгаарап турган. 28 Олар оон ыңай доктаадып каан черже дайынчы тергеге сугар болгаш өске-даа аъттар чиир арбай биле сигенни кайызы-даа бодунуң ээлчээнде чедирип берип турган.

Соломоннуң алдаржаан мерген угааны

29 Бурган Соломонга мерген угаанны, чүве эндевес ханы угаанны болгаш далай эриинде элезин дег хемчээл чок улуг угаан-сарыылды хайырлаан. 30 Соломоннуң мерген угааны Чөөн чүктүң база Египеттиң бүгү улузунуң мерген угаанын ажып турган ^w. 31 Ол бүгү улустан, ооң иштинде зерах уктуг ^x Эфандан база Махолдуң Еман, Халкол, Дарда деп оолдарындан артык мерген угаанныг турган. Ооң алдар-ады бүгү чоок-кавы чоннарга тарай берген. 32 Ол 3000 хире угаадыглыг чугаа чугаалаан ^y, 1005 ыр чогааткан ^z. 33 Ол үнүштер дугайында, Ливан сынның пөштеринден эгелээш, ханаларда үнүп келген иссоп деп чадаң үнүшке чедир, чугаалап шыдаар чораан; дириг амытаннар, куштар, соястаарлар болгаш балыктар дугайында база чугаалап шыдаар чораан. 34 Соломоннуң мерген угаанын дыңнаар дээн улус бүгү чоннардан база чер-делегейде ооң дугайында дыңнаан бүгү күрүнелерден кээп турган ^aa.