1Ki 9 | TyvTUV | STEP | Кажан Соломон Дээрги-Чаяакчының өргээзин, хаанның ордузун база тудуксаан бүгү чүвезин тудуп доозуптарга,

‏ 1 Kings 9

Дээрги-Чаяакчының Соломонга база катап көзүлгени

(2 Чыл. 7:11-22)

1 Кажан Соломон Дээрги-Чаяакчының өргээзин, хаанның ордузун база тудуксаан бүгү чүвезин тудуп доозуптарга, 2 Дээрги-Чаяакчы аңаа, ооң мурнунда Гаваонга көзүлгени дег ^a, база катап көстүп келген. 3 Хаанга Ол мынча дээн: «Сээң мөргүлүң биле чалынган дилээңни дыңнап кагдым. Мен сээң тудуп кааның, Мээң адымга кезээ мөңгеде тураскааткан өргээни ыдыктап алдым. Мээң көрүжүм биле бодалдарым кезээде ынаар угланган болур ^b. 4 А сеңээ хамаарыштыр. Бир эвес сен Мээң мурнумга, бодуңнуң ачаң Давид ышкаш, арыг чүректиг, шынчы чурттаар болзуңза ^c; Мээң бүгү айтыышкыннарымны күүседип, Мээң дүрүм-хоойлуларымны сагыыр болзуңза, 5 сээң ачаң Давидке: „Израильдиң дүжүлгезин ээлээр салгакчы чок артпас сен“– деп аазааным дег ^d, сээң хаан дүжүлгеңни Израильге кезээ мөңгеде быжыглап каар мен.

6 А бир эвес израильчилер силер азы силерниң үре-салгалыңар Менден хая көрнүп, силерге Мээң бергеним айтыышкыннар, дүрүмнерни сагывас, күүсетпес болзуңарза, өске бурганнарга бараан болуп, мөгейип баар болзуңарза, 7 Мен израиль чонну силерге берген Мээң черимге турбас кылдыр узуткап каар мен ^e, Бодумнуң алдар-адымга дээш ыдыктап кааным бо өргээден ойталаар мен. Израиль ынчан бүгү чоннарга бужар үлегер-чижек, кочу-шоот апаар ^f. 8 Бо өргээ ам бедик-тир ^{▼▼ Өске бурунгу сөзүглелде «Бо өргээ бузундулар бооп хуулар» деп бижээн.}, ындыг-даа болза, ол үеде ооң чаны-биле эрткен кижи бүрүзү элдепсинер, кочулап сыгырар база: „Дээрги-Чаяакчы бо чуртту, бо өргээни чүге ынчаар аажылааны ол?“– деп айтырар ^h. 9 А улус: „Олар ада-өгбезин египет черден үндүре берген Бурганы Дээрги-Чаяакчыдан ойталааш, өске бурганнар эдерип, оларга бараан болуп, мөгейгени дээш, Дээрги-Чаяакчы ол улусче бо айыыл-халапты ыткан“– деп харыылаар».

Соломоннуң өске ажыл-херектери

(2 Чыл. 8:1-18)

10 Соломон ол ийи тудугну – Дээрги-Чаяакчының өргээзи биле хаанның ордузун – чээрби чыл иштинде тудуп дооскан соонда ⁱ, 11 Тирниң хааны Хирамга Галилея деп девискээрде турар чээрби хоорай берген, чүге дээрге Хирам Соломонга пөш, шиви ыяшты болгаш алдынны ооң күзээнин ёзугаар берип турган. 12 А Хирам Соломоннуң берген хоорайларын көөр дээш Тирден чедип кээрге, олар аңаа таарышпайн барган. 13 Ол: «Меңээ бо чүү адам хоорайлар бергениң ол, дуңмам?» – деп айтырган чүве-дир. Ынчангаш оларның турар черин Кавул ^{▼▼ Кавул – еврей дылда «Херекчок чүве-дир» дээн уткалыг сөс-биле дөмей дыңналыр ат (Иис. 19:27 көр).} деп адап каан. Ол черниң ады амдыгаа чедир ындыг бооп арткан. 14 Хирам оон хаанга 120 талант ^{▼▼ 120 талант – 3600 ажыг килограммга деңнежир.} алдын чорудуп берген.

15 Соломон албадалдыг ажылчын күш ажыглап тургаш ^l, Дээрги-Чаяакчының өргээзин, бодунуң ордузун ^m, Милло шивээни ⁿ, Иерусалимниң ханазын база Асор, Мегиддон болгаш Гезер хоорайларны тудуп каан. 16 (Египеттиң хааны фараон Гезерже халдааш, эжелеп алган чүве-дир. Фараон хоорайны өрттедипкеш, ооң хананей чурттакчыларын ^o кыра шаап каапкан болгаш ону бодунуң уруунга, Соломоннуң кадайынга ^p, өнчү кылдыр берипкен, 17 а Соломон Гезерни катап тудуп каан.) Оон ыңай Алдыы Бет-Орон ^q, 18 Ваалат болгаш ээн кургаг ховуга Тадмор хоорайларны быжыглап тудуп каан. 19 А ол ышкаш аъш-чем курлавыры шыгжаар бүгү хоорайларны база бодунуң дайынчы тергелерин болгаш аъттарын тургузар хоорайларны тудуп каан ^r. Соломон Иерусалимге, Ливанга болгаш чагырып турганы бүгү черлерге тудар дээн бүгү чүвезин тудуп каан.

20 Соломон амор, хет, ферез, хиввей болгаш иевус чоннарның артынчызын (олар шупту израиль уктуг эвес турган) – 21 оларның чуртка артып калган, израильчилерниң бүрүнү-биле узуткап шыдавааны үре-салгалын – кулдар ышкаш ажылдадып ажыглап турган, амдыгаа чедир ындыг бооп арткан. 22 А израильчилерни Соломон кул кылдыр ажыглаваан ^s. Олар ооң шериглери, дүжүметтери, нояннары, шериг баштыңнары, ооң дайынчы тергелериниң башкарыкчылары, аъттыг шерииниң удуртукчулары бооп турган. 23 Соломоннуң ажылдарының башкарыкчылары – ында ажылчын күштү хайгаарап турар 550 кижи база турган.

24 Фараоннуң уруу Давидтиң Хоорайындан Соломоннуң аңаа тудуп берген ордузунче көже берген ^t. Соломон ооң соонда Милло шивээзин быжыглап тудуп каан ^u.

25 Соломон чылда үш катап Дээрги-Чаяакчыга тудуп бергени өргүл салыр бедигээшке бүрүн өрттедир болгаш эп-найырал өргүлдери эккеп салып, Дээрги-Чаяакчының мурнунга чаагай чыттыг чүүлдер кыпсып турган. Бурганның өргээзин ол ынчалдыр тудуп дооскан.

26 Соломон оон ыңай эдом черде Эйлат хоорайның чанында Эцион-Гавер өртээлге ^v, Кызыл далайның эриинге корабльдар тудуп турган. 27 А Хирам хаан бодунуң эжиндирип билир далайжыларын Соломоннуң улузу-биле кады корабльдарга албан эрттирзин дээш чорудупкан ^w. 28 Олар Офирже эжиндирип чорупкаш ^x, ол черден 420 талант ^{▼▼ 420 талант – 12 600 ажыг килограммга деңнежир.} алдын эккелгеш, Соломон хаанга чедире бергеннер.