1Pe 2 | TyvTUV | STEP | Ындыг болганда, кандыг-даа бузуттуг-бак сагыштан: мегеден, ийи арынныг чоруктан, адааргалдан болгаш нүгүлден адырлып аар ужурлуг силер .

1 Ындыг болганда, кандыг-даа бузуттуг-бак сагыштан: мегеден, ийи арынныг чоруктан, адааргалдан болгаш нүгүлден адырлып аар ужурлуг силер ^a. 2 Чаа төрүттүнген чаштар дег, ылап шын арыг сүтче чүткүүр база ону эмгеш, камгалалды алыры-биле өзүп-мандыыр ужурлуг силер ^b. 3 Дээрги-Чаяакчының ачы-буянныын амзангырлап шенээн болгай силер ^c.

4 Улустуң херекчок дээш тоовааны, ынчалза-даа Бурганның шилип алганы үнелиг дириг Дашче чедип келиңер ^d. 5 Силер база дириг даштар бооп чедип келиңер ^e, Бурганның Сүлдезинге хамааржыр өргээни тударынга силерни ажыглазын. Силер орта Бурганның ыдыктыг бараалгакчылары бооп, Ооң Сүлдезинден келген, Бурганга таарымчалыг өргүлдерни Иисус Христосту дамчыштыр салып эгелээр силер ^f.

6 Чүге дээрге Бижилгеде:

«Көрүңер даан, Сионга дашты –
шилиттинген, улуг үнелиг, бажың таваанга эң чугула дашты салыр мен.
Аңаа бүзүрээн кижи бүрүзү бак атка кирбес» деп бижээн-дир ^g.

7 Силерге, Аңаа бүзүрээн улуска, ол Даш аажок үнелиг, а бүзүревээн улуска Ол

«Тудугжуларның херекчок дээш, октапканы,
ынчалза-даа эң чугула апарган даш» боор ^h.

8 Оон ыңай Ол

«Улустуң аңаа тептиккеш, кээп ужары моондак даш» боор ⁱ.

Бурганның сөзүн дыңнавас болгаш, улус аңаа тептиге бээр. Бурганның оларга онаап каан үүлези ындыг болган-дыр. 9 А силер болза – шилиттинген аймак ^j, Хаанның бараалгакчылары, Бурганга хамааржыр ыдыктыг чон ^k, Ооң кайгамчык ажыл-херектерин чарлаар дээш кыйгырткан улус силер. Ол силерни дүмбей караңгыдан Бодунуң кайгамчык чырыынче кыйгырып эккелген ^l. 10 Ооң мурнунда Бурганның чону деп санатпайн чораан силер, а ам Ооң чону апардыңар. Ооң мурнунда Бурганның ээ-хайыразын албайн чораан силер, а ам Ооң ээ-хайыразын алдыңар ^m.

Бурганның чалчалары

11 Ханы ынак эш-өөр, бо делегейде даштыкылардан, түр када турар улустан дег ⁿ, силерден дилеп тур мен: бодуңарның-на сагыш-сеткилиңерге удур демисежир бузуттуг-бак күзээшкиннерге алыспайн көрүңер ^o. 12 Бүзүревээн өске улус аразынга бодуңарны ак сеткилдиг ап чоруңар, ынчаарга силерни бузут үүлгедикчилери деп буруудадып турар улус, ачылыг ажыл-херээңерни көргеш, Бурганның чедип кээр хүнүнде Ону алдаржыда бээр апаар ^p.

13 Дээрги-Чаяакчыны бодааш, бүгү-ле кижи тургускан эрге-чагыргаларга чагыртыңар ^q. Дээди эрге-чагырга боор императорга-даа, 14 бузут үүлгедикчилерин кезедир, буян чедиргеннерни шаңнап-мактаар дээш ^r, ооң томуйлааны чазак-чагырга улузунга-даа чагыртыңар. 15 Сарыыл чок улустуң ужур-утка чок чугааларын, буян тарып тургаш, өжүр шаварыңарны Бурган күзеп турар. 16 Хостуг улус дег амыдыраңар ^s, ынчалза-даа хосталгаңарның бузутка хоргадал апаарындан кичээниңер, Бурганның чалчалары дег амыдыраңар ^t. 17 Шупту улуска чогуур хүндүткелден көргүзүңер, бүзүрээн ха-дуңмаңарга ынак болуңар, Бургандан коргуп, мөгейип чоруңар, императорну хүндүлеңер ^u.

Христостуң хилинчээниң үлегери

18 Чалчалар, дээргилериңерге хүндүткел көргүзүп, чагыртыңар ^v. Чүгле буянныг, чымчак ээлерге эвес, а кадыг-дошкун ээлерге база чагыртыңар. 19 Кандыг-бир кижи Бурганның күзел-соруун медереп билгеш, багай чүү-даа кылбаан хирезинде, хилинчекти шыдажып эртип турар болза, ооң ол чоруу Бурганга таарымчалыг боор ^w. 20 Буруулууңар ужун силерни кезедир болза, ону шыдажып эртип турарыңар дээш, силерни мактаан дүжүү чүл? Ынчалза-даа чөптүг херек ужун хилинчек көрүп турар болзуңарза, ол чорууң Бурганга таарымчалыг боор. 21 Бурганның силерни кыйгырган ужуру ол-дур ^x, чүге дээрге Христос Боду силер дээш хилинчек көрген база Ооң изин истезиннер дээш, үлегерин силерге арттырып каан ^y.

22 Ол кандыг-даа бачыт үүлгетпээн база
Ооң аксындан меге үнгенин кым-даа дыңнаваан ^z.

23 Христосту дорамчылап турда, Ол дорамчылал-биле харыылаваан ^aa. Хилинчек көрүп тургаш, Ол кымга-даа кыжанмаан ^ab, а чөптүг Шииткекчиге бүрүнү-биле ынанган ^ac. 24 Бистиң бачыт талазы-биле өлгеш ^ad, чөптүг-шынныг амыдыраарывыс дээш, Ол бачыттарывысты Бодунуң мага-бодунче чүктеп алгаш, шаажылал ыяжынче аппарган.

Силер Ооң балыгларының ачызында экирээн силер ^ae.

25 Силер оруундан азып-тенээн хойлар дег чордуңар ^af, ынчалза-даа силер ам Кадарчыңар болгаш амы-тыныңарның Кадагалакчызынче дедир ээп келген-дир силер ^ag.