1Pe 3 | TyvTUV | STEP

‏ 1 Peter 3

Бурганга бүзүрээн өг-бүле улус

1 – 2 Шак ынчаар, херээжен улус, ашактарыңарга чагыртыңар ^a. Оларның чамдыызы Бурганның сөзүн тооп дыңнавас-даа болза, силерниң Бурганны хүндүлээр, арыг амыдыралыңар көргеш, артык чугаа-сөзүңер чокка-ла, Ооң улузу апаар кылдыр бодуңарны ап чоруңар ^b. 3 Силерниң чаражыңар чаъжыңарны аянчыдыр өрүп, салганыңарда эвес, алдын каасталгаларыңар болгаш каас-коя хевиңерде эвес. 4 Бурган харын кижиниң томаанныг болгаш оожум аажызының оңмас иштики чаражын аажок үнелээр ^c. 5 Бурганга идегээр ыдыктыг херээженнер эрткен үелерде боттарын ынчалдыр каастап, ашактарынга дыңнангыр болуп келген. 6 Чижек кылдыр, Авраамны дыңнап, ону «дээргим» деп адап чораан Сарраны сактып келиңер ^d. Коргуп-дүвүревейн, буяндан тарып чорзуңарза, Сарраның уруг-дарыы апарган боор силер.

7 А ашактар силер, база шак ынчаар, кадайларыңар дээш сагыш човап, оларны билип көрүңер: олар силерден кошкак, уян дээрзин утпаңар ^e. Кадайларыңарны хүндүлеңер, чүге дээрге олар Бурганның авыралының ачызында мөңге амыдыралды силер-биле деңге салгап алган. Ынчалдыр чурттаар болзуңарза, мөргүлдериңерге кандыг-даа шаптык турбас.

Бурганга шынчы болганы дээш хилинчек көөрү

8 Түңнелинде силер араңарда эп-найыралдыг чурттап ^f, бот-боттарыңар дээш сагыш аарып, бот-боттарыңарга, бүзүрээн ха-дуңмаңарга дег, ынак, кээргээчел база биче сеткилдиг ^{▼▼ Өске бурунгу сөзүглелдерде бо сөстерге «Чымчак сеткилдиг» деп сөстү немээн.} бооп көрүңер. 9 Силерге чедирген хора дээш хора-биле, дорамчылал дээш дорамчылал-биле харыылаваңар ^h. Ооң орнунга силерни бак көрген улуска Бурган ачы-буянын көргүссүн дээш, оларны алгап-йөрээп мөргүңер ⁱ. Бурган силерни шак ындыг амыдыралче кыйгырган, ынчаар чурттааш, Ооң ачы-буянын алыр силер.

10 Амыдыралындан таалал ап, аас-кежиктиг хүннер көрүксээн кижи
кара сагыштыг, меге сөстер эдеринден кичээнип,
аксын ажытпас ужурлуг.
11 Ол бузуттан чайлаар, буян тарыыр база
амыр-тайбыңны дилеп, олче чүткүүр ужурлуг.
12 Чүге дээрге Дээрги-Чаяакчының карактары чөптүг-шынныг улусче көрнүр,
Ооң кулактары оларның дуза дилээн кышкызын дыңнаар,
а бузут үүлгедикчилеринче Ол сүртедир көөр ^j.

13 Буян тарыырынче чүткүлдүг болзуңарза, кым силерже бузут халдадырыл? 14 А чөптүг-шынныг чорук дээш хилинчек көрүп-даа турзуңарза ^k, херек кырында амыр-чыргалдыг силер. Олардан шуут коргуп-сүртевеңер ^{l
,} ^{▼▼ Азы: «Оларның коргар чүвезинден коргуп-сүртевеңер» (Иса. 8:12 көр).}. 15 Чүректериңерге Дээрги-Чаяакчы Христостуң ыдыктыын хүндүлеңер ⁿ. Силерниң Аңаа идегелиңер дугайында айтырыг салган улуска харыы бээринге кезээде белен болуңар ^o. 16 Чүгле ол харыыны эвилең-ээлдек, дыңнакчыларга хүндүткелдиг бериңер. Арын-нүүрүңер арыг болзун: Христоска башкарткан эки амыдыралыңарны бак сөглеп турар улус ^p, ол нүгүлү дээш ыядып, арны кыссын ^q. 17 Бурганның күзел-соруу ындыг болганда, бузуттуг эвес, а буянныг херек дээш хилинчек көргени дээре ^r. 18 Чүге дээрге Христос, бистиң бачыттарывыс дээш, чаңгыс удаа хилинчек көрген болгай ^s. Ол, кем чок Боду, кем-буруулуг улустуң орнунга, силерни Бурганче эккээр дээш, хилинчек көрген. Ооң мага-бодун өлүрүп кагза-даа, Сүлдези-биле Ол тынгарлып келген.

19 – 20 Христос ынчалдыр чоруткаш, эрте-бурун шагда – Ной өгбениң үезинде Бурганны дыңнавайн баргаш, хоругдаткан сүнезиннерге суртаал кылган. Ной бажың-хеме тудуп турар өйде ^t, Бурган оларны шыдамыккай кезетпейн келген улустуң сүнезиннери ол. А бажың-хемеже каш борбак, чүгле сес санныг кижи кирген ^u, олар суг аайы-биле камгалал алган. 21 Ол суг дээрге ам-даа силерни камгалап турар сугга суктурарын үлегерлей көргүскени-дир. Сугга суктурары – мага-боттуң хирин чууру эвес, а арыг арын-нүүрлүг чурттаарын Бурганга аазаары-дыр ^v. Иисус Христостуң катап дирилгенин дамчыштыр ол чорук силерни камгалаар ^w. 22 А Христос дээрже көдүрлүп үнгеш ^x, Бурганның оң талазында турар боорга ^y, Аңаа дээрниң төлээлери, эрге-чагырга ээлери, күштери чагыртып турар ^z.