1Pe 5 | TyvTUV | STEP | Христостуң хилинчээниң херечизи , Ооң ажыттынып кээр ужурлуг өндүр-чаагайын үлежиксээн кордакчы болгаш удуртукчу болур мен ам силерниң араңарда удуртукчу улуска дараазында чүүлдерни чугаалап тур мен.

‏ 1 Peter 5

Бурганның кодан хойлары

1 Христостуң хилинчээниң херечизи ^a, Ооң ажыттынып кээр ужурлуг өндүр-чаагайын үлежиксээн кордакчы ^b болгаш удуртукчу болур мен ам силерниң араңарда удуртукчу улуска дараазында чүүлдерни чугаалап тур мен. 2 Сагыш салыры-биле силерге арттырып каан Бурганның кодан хойларын кадарыңар ^c. Ону албадаткан дег эвес, а эки тура-биле кылыңар – бараан болуушкунуңар ындыг болурун Бурган күзеп турар. Хуу ажык-кончаа сүрбеңер ^d, а бараан боор дээн изиг күзелиңерден ажылдаңар. 3 Силерге бүзүреп дааскан улусту дарлай бербеңер ^e, харын коданыңарга үлегер болуңар ^f. 4 Дээди Кадарчы чедип кээрге ^g, кажан-даа оңмас чаагай шаңналды алыр силер ^h

5 Башкартып чоруур улус, силер база удуртукчуларны шак ынчаар дыңнаңар ^{▼▼ Азы: «Аныяк улус, силер база шак ынчаар улуг улусту дыңнаңар».}. Шуптуңар бот-боттарыңар мурнунга томаарыңар, чүге дээрге

«Бурган адыыргак улуска удурланыр,
а томаарааннарга ээ көрүүшкүнүн хайырлаар» ^j.

6 Ынчангаш Бурганның күчүлүг холунуң адаанга боттарыңарны томаартыңар, Ооң доктааткан үези кээрге, Ол силерни өрү көдүрер. 7 Хамык сагыш човаашкыннарыңарны Олче чая кааптыңар, чүге дээрге Ол силер дээш сагыш салып чоруур ^k. 8 Серемчилелдиг болгаш хынамчалыг болуңар ^l. Силерниң дайзыныңар – эрлик, хөректенген арзылаң дег, «Кымны сыырыптар чоор» деп, долгандыр чимзенип чоруп турар ^m. 9 Бүзүрелиңер быжыг болуп, эрликке удур туржуңар ⁿ, чүге дээрге бүгү делегейде бүзүрээн ха-дуңмаңар шак-ла ындыг хилинчекти шыдажып эртип турарын бодап чоруңар ^o. 10 Элээн үе иштинде хилинчек көөр-даа болзуңарза, мону сактып чоруңар: элбек авыралдыг Бурган силерни Христос Иисусту дамчыштыр мөңге өндүр бедик байдалды Ооң-биле үлежиринче кыйгырган ^p. Ол силерни катап тургузар база күш болгаш шыдамык чорукту силерге бээр. 11 Бүгү эрге-чагырга ^{▼▼ Өске бурунгу грек сөзүглелде бо сөстерге «Алдар» деп сөстү немээн.} кезээ мөңгеде Аңаа доктаазын! Аминь ^r.

Түңнел байыр чедириишкиннери

12 Бо кыска чагааны Бурганга шынчы деп санаарым эживис Силаның ^s дузазы-биле силерге бижидим. Чагаам сагыжыңарны часкарарын база Бурганның авыралы алыс шынныг деп херечилээрин күзеп тур мен. Ол авырал ачызында чаныш-сыныш чок туржуңар! 13 Бурганга силер ышкаш шилиттирген Вавилонда ^{▼▼ Вавилон – Пётр бо сөс-биле эрте-бурунгу Вавилон хоорайны эвес, а Римни ынчаар ойзу адап турары ылап хире.} христиан ниитилел, а оон ыңай оглум Марк ^u силерге байыр чедирип тур. 14 Бот-боттарыңарны Христостуң ынакшылы илерээр ошкаашкын-биле мендилеңер ^v.

Христоска хамааржыр шуптуңарга амыр-тайбың доктаазын! ^{▼▼ Өске бурунгу сөзүглелдерде бо шүлүк «Аминь» деп сөс-биле төнген.}