‏ 1 Samuel 16

Самуилдиң Давидти хаан болур кылдыр чаап кааны

1Дээрги-Чаяакчы Самуилге мынча дээн: «Израильдиң хааны кылдыр Мээң хүлээп албааным Саул дээш кажанга чедир муңгарап кээр сен? Бодуңнуң мыйыс саваңны олива үзү-биле долдуруп алгаш, чорувут ^a. Мен сени Вифлеем чурттуг Иессейже чорудуп тур мен, чүге дээрге ооң оолдарының аразындан Мен Бодумга хаанны көрүп алдым».

2Самуил: «Мен канчап чоруптар мен? Саул ону дыңнап кааш, мени өлүрүп кааптар болгай» – дээн.

Дээрги-Чаяакчы: «Инектен ап алгаш: „Дээрги-Чаяакчыга өргүл кылыр дээш чедип келдим“– деп чугаалааш, 3Иессейни өргүл ёзулалынче чалап ал. Чүнү кылырын айтып бээримге, сен Мээң айтып бергеним кижини чаап, демдектеп каар сен» – деп чугаалаан.

4Дээрги-Чаяакчы чүү дээнил, Самуил шак-ла ынчалдыр кылган. Кажан ол Вифлеемге чедип кээрге, хоорайның баштыңнары аңаа уткуштур девидеп үнүп келгеш: «Эп-найыралдыг келдиңер бе?» – деп айтырганнар. 5Ол: «Ийе, Дээрги-Чаяакчыга өргүл кылыр дээш эп-найыралдыг келдим. Ыдыктанып-арыгланып алыңар ^b, мээң-биле кады өргүл ёзулалынга киржиңер» – дээн. Иессейни база ооң оолдарын ыдыктап кааш, оларны өргүлче чалаан.

6Олар чедип кээрге, Самуил Элиавты ^c көрүп кааш, «Дээрги-Чаяакчының шилип алган кижизи бо болгай аан» деп бодаан. 7Ынчалза-даа Дээрги-Чаяакчы Самуилге мынча дээн: «Ооң даштыкы хевиринче болгаш дурт-сынының узунунче көрбе. Ону Мен хүлээп албаан мен. Мен кижилер дег эвес мен. Кижилер улустуң арын-шырайынче көөр, а Дээрги-Чаяакчы улустуң чүрээнче көөр ^d». 8Иессей Авинадавты Самуилге кыйгырып эккеп бээрге, оозу: «Дээрги-Чаяакчы бо кижини шилип албаан-дыр» – дээн. 9Иессей Самуилге Шамманы ^e эккээрге: «Дээрги-Чаяакчы мону база шилип албаан-дыр» – дээн. 10Шак ынчалдыр бодунуң чеди оглун чедирерге, Самуил Иессейге: «Бо оолдардан Дээрги-Чаяакчы кымны-даа шилип албаан-дыр» – деп чугаалаан.

11Ынчан Самуил Иессейден: «Оолдарыңар шуптузу мында бе?» – деп айтырган.

Иессей: «Бичези база бар. Ол хой кадарып чоруй барган-дыр» – деп харыылаан.

Самуил: «Ону сүрдүрүп эккелем. Ол бээр чедип келгиже, бис чемненмес бис» – дээн. 12Иессей биче оглун сүрдүрүп эккелген. Ол кызыл-сарыг баштыг, чараш карактарлыг, чараш шырайлыг оол болган. Дээрги-Чаяакчы Самуилге: «Ол-дур. Тургаш, ону чаап каг» – дээн. 13Самуил олива үстүг мыйысты алгаш, ону акылары көрүп турда, чаап каан ^f. Ол хүнден эгелээш, Дээрги-Чаяакчының Сүлдези Давидти бүргеп алгаш ^g, оон адырылбаан. А Самуил ооң соонда Рамаже чорупкан.

Давидтиң Саулга бараан болуп эгелээни

14А Саулдан Дээрги-Чаяакчының Сүлдези адырлы берген. Ону Дээрги-Чаяакчының ыдыпканы каржы сүнезин аажок дүвүреди берген ^h. 15Саулдуң дүжүметтери аңаа мынча дээн: «Дээрги-Чаяакчыдан келген каржы сүнезин силерни аажок дүвүредип турар-дыр. 16Бистиң дээргивис, бодуңарның мурнуңарда турар чалчаларыңарга, бистерге, чадаганга тергиин ойнаар уран хөгжүмчү кижиден тып эккээр кылдыр дужаалдан берип калыңар. Кажан каржы сүнезин Бургандан чедип кээрге, ол кижи хөгжүмге ойнап тургаш, силерни оожургадыр».

17Саул дүжүметтеринге: «Тергиин ойнаар уран хөгжүмчү кижиден меңээ тып эккеп бериңер» – деп чугаалаан ⁱ.

18Ынчан ооң дүжүметтериниң бирээзи: «Мен Вифлеем чурттуг Иессейниң бир оглун көрген мен. Ол хөгжүмге ойнап билир, эрес-дидим болгаш дайылдажып билир, сөскүр-дылгыр, көрүштүг кижи; Дээрги-Чаяакчы ооң-биле кады чоруур» – дээн.

19Саул бодунуң төлээлерин дамчыштыр Иессейже: «Хой кадарып турар оглуң Давидти менче чорудувут» – деп сөгледипкен.

20Иессей хлебти, көгээржикке араганы элчигенге чүдүргеш, бир анай бергеш, оглу Давидти Саулче чорудупкан. 21Давид Саулга чедип келгеш, аңаа бараан болуп эгелээн. Ол Саулга дыка таарышкан болгаш, ооң чепсек тудукчузу болу берген. 22Саул Иессейже: «Давид меңээ бараан болуп тургай аан, чүге дээрге ол мээң ээ көрүүшкүнүмнү чедип алган-дыр» – деп сөгледипкен. 23Кажан Бурганның чорутканы сүнезин Саулду эргип кээрге, Давид хөгжүмге ойнап эгелээр. Ынчан Саулга чиик болгаш эки апаар, каржы сүнезин оон ойлап чоруй баар болган.