1Sa 2 | TyvTUV | STEP | Анна мөргүвүшаан : «Дээрги-Чаяакчының ачызында чүрээм өөрүп тур, Ооң ачызында бажым көдүрлү берди. Мен ам дайзыннарым мурнунга мактанып болур мен , Сээң хайырлааның камгалалга өөрүп тур мен!

‏ 1 Samuel 2

Аннаның мактал ырызы

1 Анна мөргүвүшаан ^a:

«Дээрги-Чаяакчының ачызында чүрээм өөрүп тур,
Ооң ачызында бажым көдүрлү берди.
Мен ам дайзыннарым мурнунга мактанып болур мен ^b,
Сээң хайырлааның камгалалга өөрүп тур мен!
2 Дээрги-Чаяакчы дег ыдыктыг кым-даа чок ^c,
Сенден өске Бурган чок,
Бурганывыс дег өске Хая чок ^d.

3 Улуургак сөстер көвүдетпеңер!
Аксыңардан бардам сөстер үндүрбеңер!
Чүге дээрге Дээрги-Чаяакчы – бүгү чүвени билир Бурган,
Ол кижиниң ажыл-херээн сайгарып турар болгай.
4 Күштүглерниң чалары сыйлыгылап каар ^e,
а кошкактарның күжү немежир.
5 Тодуг-догаа чораан улус ам хырны дээш ажылдаар,
а аш чораан улус ам аштавас апаар;
үре-төл чок чораан херээжен чеди катап божуур ^f,
а хөй уругларлыг херээжен куруг артар ^g.

6 Дээрги-Чаяакчы өлүрүп-даа, диргизип-даа болур,
алдыы оранче киирип-даа, оон уштуп-даа болур ^h.
7 Дээрги-Чаяакчы улусту ядарадып-даа, байыдып-даа,
куду базып-даа, өрү депшидип-даа болур ⁱ;
8 доозундан ядыы кижини көдүрүп ^j,
түреңги кижини боктан уштуп,
ызыгууртаннар-биле кожа олуртуп,
дүжүлгениң алдарын өнчү кылдыр аңаа берип шыдаар ^k.
Дээрги-Чаяакчы өртемчейниң таваан салгаш,
аңаа чер-делегейни үндезилээн болгай ^l.

9 Аңаа бердинген улусту Дээрги-Чаяакчы
кээп дүжеринден камгалап-кадагалап турар ^m,
а бузуттуглар караңгыда чиде бээрлер ⁿ.
Кижи бодунуң күжү-биле чүнү-даа чедип албас болгай.
10 Дээрги-Чаяакчы Боду-биле сөс карышкан улусту узуткап кааптар,
оларже дээрден диңмирээн килеңин ыдар ^o.
Дээрги-Чаяакчы чер-делегейни ужу-кыдыынга чедир шын шиидер ^p,
Бодунуң шилип алган хаанынга күчү-күштү бээр,
ооң эрге-күжүн көдүрер» – деп чугаалаан.

11 Элкана Рамаже чана берген, а бичии оглун Илий бараалгакчының чанынга Дээрги-Чаяакчыга бараан болдурары-биле арттырып каан.

Илийниң оолдары

12 Илийниң оолдары дүржок улус турган ^q. Олар Дээрги-Чаяакчыны билбес турганнар. 13 Бурганның бараалгакчыларының чонга хамаарыштыр чуруму мындыг турган: кажан өргүлге мал эккээрге, ооң эъдин хайындырып турар үеде, Бурганның бараалгакчызының чалчазы үш адыр серээ тудуп алган чедип кээр. 14 Ол серээни пашче азы сакпыңче суккаш, аңаа чүү ылдыртынып кээр болдур, бараалгакчыга ап бээр турган. Силомга кээп турган бүгү израиль чон-биле олар ынчалдыр кылып турганнар. 15 А Илийниң оолдарының чалчазы өргүлдүң чаан өрттедириниң мурнунда-ла өргүл салыкчызынга келгеш: «Бурганның бараалгакчызы сээң хайындырган эъдиңни албас-тыр, аңаа шиштеп чиир кылдыр чиг эъттен бер» – дээр турган. 16 Бир эвес кандыг-бир кижи аңаа: «Баштай чагны чурум ёзугаар өрттедипсин ^r, ооң соонда эъттиң кандыызын күзээр сен, ону ап алгай сен аан» – дээн болза, ол: «Чок, ам бо дораан эккел. Бербес болзуңза, күш-биле хунаап аар мен» – дээр турган. 17 Дээрги-Чаяакчының мурнунга ол аныяктарның бачыды дыка улуг болган. Чүге дээрге олар Дээрги-Чаяакчыга салган өргүлдү хүндүлеп көрбээннер ^{▼▼ Азы: «Кижилерниң хөңнүн калдырып, оларны ческиндирип турган».}

18 А ам-даа бичии турган Самуил лён эфод ^{▼▼ Эфод – Бурганның бараалгакчылары кедер онзагай хеп (Хост. 28:6 көр).} кедип алгаш, Дээрги-Чаяакчыга бараан болуп турган. 19 Авазы аңаа бичии шыва тоннар даарап алгаш, чылдың-на чогуур үезинде ачазы-биле кады өргүл кылып келгенде, оглунга хепти эккеп берип турган чүве-дир. 20 Илий Элкана биле ооң кадайын алгап-йөрээп: «Дээрги-Чаяакчыдан дилеп алгаш, Аңаа хүлээдип берипкениң оглуңнуң орнунга Ол сээң бо кадайыңга сеңээ ажы-төл божуп бээрин хайырлаар болзун!» – дээн. Ооң соонда олар чана берген. 21 Дээрги-Чаяакчы Аннаже ээ көрүнген болгаш, ол ооң соонда үш оолду база ийи кысты божаан. А бичии Самуил Дээрги-Чаяакчының хайгааралының адаанда өзүп орган ^u.

22 Илий назыдап кырып калган. Ол оолдарының израиль чонну канчаар аажылап турарын, оларның Ужуражылга майгынының кирер эжииниң аксында ажылдап турар херээженнер-биле ^v холбажып турарын дыңнап турган. 23 Илий оолдарынга: «Силер чүге бак үүлгедиглер кылып турар силер? Мен бүгү чондан силерниң дугайыңарда багай чүве дыңнап тур мен. 24 Соксаңар, оолдарым, мен эки эвес медээлер дыңнап тур мен. Силер Дээрги-Чаяакчының чонун будап турар-дыр силер. 25 Бир эвес бир кижи өске кижиге удур бачыт кылган болза, ол кижи дээш Бурганга мөргүп болур. А бир эвес бир кижи Дээрги-Чаяакчыга удур бачыт үүлгеткен болза, ол кижиге болчуп, кым мөргүп шыдаарыл?» – деп чугаалап турган. Ынчалза-даа оолдары ачазын дыңнавайн турганнар, чүге дээрге Дээрги-Чаяакчы оларны узуткап кааптар деп шиитпирлеп алган чүве-дир ^w. 26 А Самуил улам-на өзүп орган болгаш, Дээрги-Чаяакчының база чоннуң сеткилинге кирери дам барып турган ^x.

Илийниң салгалдарынга шииткелди чарлааны

27 Илийге Бурганның бир кижизи чедип келгеш ^y, аңаа мынча дээн: «Дээрги-Чаяакчының сөзү бо-дур: „Мен сээң төрел бөлүүңге олар Египетке, фараоннуң чуртунга чурттап чорда, Мени билир кылып кагбаан ийик мен бе? ^z 28 Сээң төрел бөлүүңнү израиль чоннуң бүгү аймактарының аразындан Бодумга бараалгакчылар кылдыр шилип алган мен ^aa. Мен силерни Мээң өргүл салыр бедигээжимче үнер, Мээң мурнумга айдызаар, эфод хепти* кедер кылдыр шилип алган мен. Мен израильчилерниң бүгү өргүлдерин Меңээ салырын сээң төрел бөлүүңге дагзып каан мен. 29 А силер чүге Мээң оран-савамга эккээрин дужааган янзы-бүрү өргүлдеримни таптап турар силер? Чүге сен оолдарыңны Менден артык хүндүлеп турар сен? Чүге Мээң израиль чонумнуң эккелген эң-не дээре дээн өргүлдерин сыырып, шартайтыр семирип турар силер?“ 30 Ынчангаш Дээрги-Чаяакчы, Израильдиң Бурганы мынча дээн: „Сээң салгалың болгаш сээң төрел бөлүүң кезээ мөңгеде Меңээ бараан болурун аазап чораан болгай мен ^ab. Ындыг-даа болза, моон соңгаар ындыг болбас. Мени алдаржыдып чоруур улусту алдаржыдар мен ^ac, а Мээң ат-алдарымны базар улус куду көрдүртүр! ^ad 31 Көөр-даа сен, сени болгаш сээң төрел бөлүүңнүң кижилерин күш чок кылып каарым үе кээр ^ae. Сээң салгалың аразындан кырыырынга чедир кым-даа чурттавас. 32 Мээң оран-савамга кайы хире түрегдээрлерин көөр сен. Израиль чонга шупту чүве аайлажыр-даа болза, сээң салгалың аразындан кырыырынга чедир кым-даа, кажан-даа чурттавас. 33 Ынчалза-даа Мен өргүл бедигээжинден сээң улузуңнуң шуптузун узуткавас мен. Ол бүгүнү көргеш, сээң карактарың оду өжүп, сагыш-сеткилиң хилинчектени бээр; сээң бүгү салгалың ортумак назынында-ла өлгүлеп каар. 34 Сеңээ бадыткал демдээ бо-дур: ийи оглуң – Офни биле Финеес – чаңгыс хүнде өлүрлер ^af.

35 Бодумга бердинген бараалгакчыдан томуйлап аар мен ^ag. Ол Мээң сагыш-сеткилимни билир болгаш, бүгү чүвени Мээң күзелим-биле кылыр. Ооң салгалын быжыг кылып каар мен. Ол бараалгакчым бүгү назынында Мээң шилип алыр кижимге бараан болур. 36 Сээң салгалыңдан дириг артканнар шуптузу чаңгыс көпеек база кескинди хлеб дээш аңаа сөгүрүп: ‘Дайнам хлеб тып чиири-биле Бурганның бараалгакчызының дузалакчызы болуп ажылдаарын чөпшээреп көрүңер’ – деп чаннып кээрлер“».