1 Samuel 8
Израиль чоннуң боттары хаанныг болуксааны
1Самуил назыдап кырааш, бодунуң оолдарын Израильдиң баштыңчылары кылып каан. 2Ооң улуг оглунуң ады Иоил, ийи дугаар оглунуң ады Авия чүве-дир. Олар чонну Беэр-Шевадан баштап турган. 3Ынчалза-даа Самуилдиң оолдары ачазының изин истевээн. Олар ажык-кончаа сүрер, хээли алыр болгаш шын эвес шиидер болганнар a. 4Израильдиң баштыңнары шупту чыглып алгаш, Рамада Самуилдиң бажыңынга чедип келгеннер. 5Олар Самуилге келгеш: «Силер назыдап кырып калдыңар, а оолдарыңар силерниң изиңер истевээннер-дир. Өске бүгү чоннарда ышкаш, бисти башкарар хаандан томуйлап калыңар» – дээннер b. 6Оларның «Бисти башкарар хаандан томуйлап калыңар» деп дилээнге Самуил таарзынмаан. Самуил Дээрги-Чаяакчыга мөргүүрге, 7Дээрги-Чаяакчы аңаа мынча дээн: «Чон сеңээ чүү дээрил, оларны дыңна. Олар сенден эвес, харын оларны чагырбазын дээш, Менден ойталап турар-дыр. 8Мен оларны Египеттен үндүрүп эккелгеним хүнден эгелээш, бо хүнге чедир олар Мени каапкаш, өске бурганнарга бараан болуп келгеннер. Ам олар сээң-биле база ынчаарлары ол-дур. 9Ынчангаш оларның чугаазын дыңна. Чүгле хаанның оларны канчаар аажылаарын шыңгыы сагындырып каг». 10Хаан томуйлап каарын дилеп турган чонга Самуил Дээрги-Чаяакчының бүгү сөстерин дамчыдып берген. 11Ол мынча дээн: «Силерни башкарып чагырар хаанның силерни аажылаары мындыг болур c: силерниң оолдарыңарны былаап алыр d – чамдыызын ол дайынчы тергелерге олуртуп каар, өскелеринге аът мундурар, бир чамдыктарын ооң чуузазын үдеп чоруур чалчалар кылып алыр; 12оларның чамдыызын муң шериг баштыңнары кылгаш, өскелерин бежен шериг баштыңнары кылып каар; чамдыктары хаанның шөлдерин болбаазырадыр, тараазын ажаар, ок-чемзээн дарганнаар, чамдыызын чуузалар херекселдери кылыр кижилери кылып каар. 13Хаан силерниң уругларыңарны былаап алыр, олар хаанның аъш-чемин кылыр, далганын быжырар, чаагай чыттыг үстерин кылыр кижилери болур. 14Силерниң шөлдериңерни база эң-не эки виноградтыг, олива ыяштарлыг садтарыңарны алгаш e, бодунуң дүжүметтеринге бериптер. 15Тарааңарның болгаш чимистериңерниң дүжүдүнүң онгу кезээн алгаш, бодунуң нояннарынга база дүжүметтеринге бериптер. 16Силерниң эр, херээжен кулдарыңарны, эң-не дээре дээн оолдарыңарны база элчигеннериңерни бодунга алгаш, оларны ажыктыг кылдыр албадап ажылдадыр. 17Шээр малыңарның онгу кезээн алгаш баар; боттарыңар аңаа кулдар болур силер. 18Ынчан силер хааныңар аажызындан уё-човууруңар төп, ыглажыр силер. А ол үеде Дээрги-Чаяакчы силерге харыылавас f». 19Ынчалза-даа чон Самуилди тооп дыңнавайн: «Чок, биске хаан херек! 20Ынчан бис өске бүгү чоннар ышкаш болур бис: бистиң хаанывыс бисти башкарар, дайын-чааже ол бисти баштаар» – дээн. 21Самуил чоннуң чугаазын шуптузун дыңнап алгаш, Дээрги-Чаяакчыга дамчыдып берген. 22Дээрги-Чаяакчы Самуилге: «Оларны дыңнап, хаандан томуйлап каг» – дээн. Самуил ооң соонда израильчилерге: «Ындыг-дыр, ам шупту хоорайларыңарже чангылай бериңер» – дээш, оларны чорудупкан.
Copyright information for
TyvTUV