1Sa 9 | TyvTUV | STEP | Вениаминниң аймаанга Кис деп бай-шыдалдыг кижи чораан чүве-дир. (Кистиң адазы – Авиил турган. Авиилдиң адазы – Церон, Цероннуң адазы – Бехорат, Бехораттың адазы

‏ 1 Samuel 9

Саулдуң Самуил-биле ужурашканы

1 Вениаминниң аймаанга Кис деп бай-шыдалдыг кижи чораан чүве-дир. (Кистиң адазы – Авиил турган. Авиилдиң адазы – Церон, Цероннуң адазы – Бехорат, Бехораттың адазы – Афия турган чүве-дир) ^a. 2 Кистиң Саул дээр хып дээн чалыы болгаш чараш оглу турган. Израиль чонда аңаа чедер чараш эр кижи турбаан чүве-дир. Ол чон аразындан бир баш бедик турган.

3 Бир катап Саулдуң ачазы Кистиң элчигеннери чиде берген. Кис оглу Саулга: «Бир чалчадан эдертип алгаш, барып элчигеннерни диле» – дээн. 4 Олар Эфрем дагларындан, Шалиша деп черден ^b дилээш, тыппааннар. Шаалим деп черде база чок болган. Вениаминниң черинден дилээш-даа, тыппааннар. 5 Цуф деп черге чедип келгеш, Саул кады чораан чалчазынга чугаалаан: «Дедир чоруулу. Ачам элчигеннерин тоовайн каапкаш, бис дээш сагыш човай берзе канчаар».

6 Чалчазы аңаа: «Бо хоорайда Бурганның алдарлыг бир кижизи бар-дыр ийин. Ооң чугаалаан чүвези албан бүде бээр кижи-дир ^c. Ам аңаа бараалы. Канчап билир, ол бистиң кайнаар баарывысты айтып бээр чадавас» – дээн.

7 Саул чалчазынга: «Ол кижиге барып болур-ла ыйнаан бис. А аңаа чүнү аппарып бээр бис? Бистиң хаптарывыста хүнезинивис төнген-дир. Бурганның кижизинге белек кылдыр чүнү бээр улус бис ынчаш?» – деп айтырган.

8 Чалчазы Саулга: «Менде дөрттүң бир кезии шекел мөңгүн бар, Бурганның кижизинге ону бериптер мен. Оон ол биске кайнаар баарывысты айтып бээр» – дээн.

9 (Израильге шаандан тура, кым-бир кижи Бургандан чүве айтырар дээн болза, «Өттүр көөр кижиге бараалы» дээр турган, чүге дээрге Бурганның медээчилерин шаанда «өттүр көөр кижилер» дээр турган-дыр.) 10 Саул чалчазынга: «Дыка-ла эки чугаалаар-дыр сен. Че, бараалы» – дээрге, Бурганның кижизиниң чурттап турары хоорайже чорупканнар. 11 Олар хоорайже баар орукка суг узуп аар дээн кыстарга таваржы бергеш: «Мында өттүр көөр кижи бар бе?» – деп айтырганнар.

12 Кыстар: «Бар – деп харыылааннар. – Ол силерниң мурнуңарда хоорайда. Далажыңар, ол мында чаа чедип келген, чүге дээрге бөгүн бедик черге чон өргүл кылыр деп турар ^d. 13 Хоорайга баргаш, аңаа ужуражып четтиге бээр силер. Ол ам-даа өргүлден чем амзаар дээш бедик черже үнмээн. Ол кижи келгеш, өргүлдү алгап-йөрээвээн шаанда, чон чемненип эгелевес ужурлуг. Чүгле ооң соонда чалаткан улус чемненип эгелээр. Барыңар, ам-даа аңаа ужуражып четтиге бээр силер».

14 Саул чалчазы-биле хоорайже чорупкан. А кажан олар хоорайже ханылап кирип орда, Самуил бедикче үнер дээш оларга уткуштур үнүп келген.

15 Дээрги-Чаяакчы Саулдуң кээриниң мурнунда хүн Самуилге мынча дээн чүве-дир: 16 «Даарта бо үеде Мен сенче Вениаминниң черинден бир кижи чорудуптар мен. Сен ону олива үзү-биле чаггаш, чагырыкчыңар бо деп, Мээң израиль чонумга айтып каг ^{▼▼ Хаан кылдыр, Бурганның бараалгакчызы азы медээчизи кылдыр шилиттинген улустуң бажын олива үзү-биле чаар турган (Лев. 8:12 көр).}. Ол Мээң чонумну филистимнерниң холундан камгалап каар. Мен чонумну көрүп тур мен, ооң ыы-сыызы Меңээ дыңналып турар-дыр ^f». 17 Самуил Саулду көрүп каарга, Дээрги-Чаяакчы аңаа: «Сеңээ Мээң чугаалап турганым кижи ол-дур. Ол Мээң чонумнуң чагырыкчызы болур» – дээн.

18 Саул хоорайның хаалгазынга турган Самуилге чоокшулап чедип келгеш, оон: «Өттүр көөр кижиниң бажыңы кайдал, меңээ айтып бериңерем» – деп айтырган. 19 Самуил Саулга: «Өттүр көөр кижи мен-дир мен. Бедик черже мээң мурнумга кылаштап үн. Аңаа баргаш, бөгүн силер мээң-биле кады чемненир силер. Даарта эртен сени чорударда, сээң сагыш-сеткилиңде чүү барыл, дөгерезин чугаалап бээр мен. 20 А үш хүн бурунгаар чиде берген элчигеннериң дээш сагыш човааш чоор сен: олар тыптып келгеннер. Израильде эң-не күзенчиг чүвени кымга бээр ужурлуг чүвел? Сеңээ база сээң адаңның төрел бөлүүнге эвес бе?» – дээн.

21 Саул оон: «Израильдиң аймактарының эң-не эвээш санныы болур Вениаминниң аймаандан укталган кижи эвес мен бе? ^g Мээң төрел бөлүүм Вениаминниң салгалдарының аразында эң-не чөгенчиг эвес чүве бе? ^h Меңээ чүге ынчаар чугаалап турарыңар ол?» – деп айтырган.

22 Самуил Саул биле ооң чалчазын ыдыктыг бедик черже эккелгеш, кол өрээлче киирип келгеш, ында олурган үжен хире чалатканнарның аразынга дөрге олуртуп каан. 23 Самуил чем кылыкчызынга: «Сеңээ „арттырып каг“деп чугаалааным аңгылап алганың чемни бо кижиге ап бер» – дээн.

24 Чем кылыкчызы ужа, дөңмекти Саулдуң мурнунга салып берген.

Самуил аңаа: «Бо эътти аалчылар чалаан үемде аңгылап, сеңээ арттырып каан чүве болгай. Мону чип көрем» – дээн. Ол хүн Саул Самуил-биле кады чемненген. 25 Дагдан хоорайже бадып келгеш, Самуил Саул-биле сери кырынга чугаалашкан ^{▼▼ Палестинага бажыңнар сери-крышалары ийленчек эвес, а калбак болур турган, а чурттакчы чон оларны дыштаныр чер база үстүкү каът кылдыр ажыглап турган.}. 26 Даң адып кээрге, Самуил сери кырында чыткан Саулду кыйгырып алгаш: «Тур че, сени үдеп каайн» – дээн. Саул туруп келгеш, Самуил-биле кады бажыңдан үнүп чорупкан. 27 Кажан олар хоорай кыдыынга чедип келгенде, Самуил: «Бисти мурнап бар чыдар кылдыр чалчаңга чугаала» – деп Саулга сүмелээн. Чалча мурнап чоруптарга, ол: «А сен ам доктаавыт, сеңээ Бурганның чугаалаан чүвезин дамчыдып берейн» – дээн.