1Sa 13 | TyvTUV | STEP | Саул үжен харлыында Израильдиң хааны болу берген. Ол Израильди дөртен ийи чыл башкарып келген . Саул 3 000 израильчини шилип алган:

‏ 1 Samuel 13

Филистимнерге удур дайынның эгелээни

1 Саул үжен харлыында Израильдиң хааны болу берген. Ол Израильди дөртен ийи чыл башкарып келген ^{▼▼ Бо домактың очулгазы бурунгу еврей чаңчылга даянып турар, еврей сөзүглелде ол саннар таварышпайн турар (Аж.-ч. 13:21 көр).}. Саул 3 000 израильчини шилип алган: 2 оларның ийи муңу Саул-биле кады Михмаска база Вефил даанга турган, а арткан муңу Ионафан-биле кады Вениаминниң черинде Гивага турган. Оон өске чонну Саул аал-оранынче чандырыпкан. 3 Гивага турган филистим доскуул шериин Ионафан чылча шаап каарга, ооң дугайында филистимнер дыңнап кааннар. А Саул: «Еврейлер дыңназын!» – дээш, бүгү чуртка мыйыс эдиски этсип ^b, кыйгы салыр элчилерни чорудупкан. 4 Филистим доскуул шериин Саулдуң чылча шаап каанын бүгү израиль чон дыңнап кааш, филистимнерниң Израильди көөр хөңнү чок апарганын билип кааш, Галгалда турар Саулче баар деп барган. 5 Филистимнер Израильге удур дайынга белеткени бергеннер: 3000 ^{▼▼ Өске бурунгу сөзүглелде «30 000» деп бижээн.} дайынчы терге, 6000 аъттыг шериг база далай эрииниң элезини дег хөй чадаг шериг чыглып алгаш ^d, Бет-Авенниң чөөн талазында Михмаска турлагжып алганнар.

6 Израильчилер нарын байдалдыг апарганын билген, чүге дээрге шерии дайзыннарга кыстырып эгелээн. Ынчангаш олар куйларга, шырыштарга, хая-даш аразынга, оңгарларга база чоогаларга чаштынып эгелээннер ^e. 7 А чамдык еврейлер Иордан хемниң ындында Гадтың база Галаадтың девискээринче кеже бергеннер. Саул ам-даа Галгалда артып калган, а ону эдерген бүгү шерии коргуп-сүртеп турган.

8 Самуилдиң болчап кааны чеди хүн дургузунда Саул манап келген ^f. Самуил Галгалга келбейн турган. Ынчан шерии Саулдан дезип чоруп эгелээн. 9 Саул: «Бүрүн өрттедир өргүлдерни база эп-найырал өргүлдерин бээр эккелиңер» – дээн. Ынчалдыр ол бүрүн өрттедир өргүлдү кылган. 10 Өргүлдүң сөөлгү ёзулалын кылып турда, Самуил чедип кээп-тир. Ынчан Саул ооң-биле мендилежир дээш, уткуштур үнүп келген.

11 Самуил: «Чүнү кылып алганың ол?» – деп айтырган.

Саул аңаа мынча деп харыылаан: «Шериглер мени каапкаш, тарап чоруп эгеледи, а силер болчашкан үевисте келбейн бардыңар. А филистимнер Михмаска чыглып эгеледилер. 12 Ынчан мен „Филистимнер Галгалда менче халдап кээр боор. А мен ам-даа Дээрги-Чаяакчыдан алгап-йөрээшкин айтырып албаан мен“деп бодааш, бүрүн өрттедир өргүл кылыр ужурга таварыштым».

13 Самуил Саулга мынча дээн: «Мугулай чүве кылган-дыр сен ^g. Дээрги-Чаяакчы Бурганыңның айтыышкынын күүсетпээн-дир сен. Бир эвес Ооң айтыышкынын күүсеткен болзуңза, Дээрги-Чаяакчы сээң Израильде чагыргаңны кезээ мөңгеде быжыглап каар ийик. 14 А ам сээң чагыргаң быжыг бооп шыдавас. Дээрги-Чаяакчы Бодунга сеткилинге кирер кижини тып алгаш ^h, ону Бодунуң чонунуң чагырыкчызы кылып каар. Чүге дээрге сен Дээрги-Чаяакчының айтыышкынын күүсетпээн-дир сен». 15 Ооң соонда Самуил Галгалдан Вениаминниң черинде Гиваже чорупкан.

Саул кады чораан улузун санап көөрге, 600 хире кижи болган чүве-дир. 16 Саул оглу Ионафан-биле база олар-биле кады арткан улус-биле Вениаминниң черинде Гивага турумчуп алганнар. А филистимнер Михмаска турлаг кылып, турумчуп алганнар. 17 Филистимнерниң турлаандан үш бөлүк шериг ол чуртту хоозурадыр сорулгалыг үнүпкен. Оларның бирээзи Офра баар оруктап Шуал девискээринче углапкан. 18 Өске бөлүк Бет-Орон оруу-биле чорупкан. А үшкүзү ээн кургаг черде Цевоим шынаазында кызыгаарже углапкан.

19 Ол үеде бүгү израиль черде дарганнар чок турган. Чүге дээрге еврейлерниң хылыш, чыда кылып аарындан филистимнер коргуп-сестип турганнар. 20 – 21 Кажан андазыннарының бистери, демир-хүүректери, айыырлары, балдылары дөгейленип каарга, израильчилер филистимнерге баар ужурлуг турганнар. Боттарының андазыннарының бистерин, демир-хүүректерин чидидерде, үштүң ийизи шекел мөңгүн, а балдыларын, мал сүрүкчүзүнүң херекселдериниң баштарын чидидерде, үштүң бири шекел мөңгүн төлээр турган. 22 Ынчангаш дайын үезинде Саул-биле арткан бүгү шериглерде хылыш-даа, чыда-даа чок болган. Хылыш болгаш чыда чүгле Саулда база ооң оглу Ионафанда бар болган чүве-дир.

Ионафанның эрес-дидим чоруу

23 Филистим шериглерниң бир бөлүү Михмас кежиинге чедип келген.