1 Samuel 21
Бурганның бараалгакчызының Давидке дузалааны
1Оон чоруткаш, Давид Нов хоорайда a Бурганның бараалгакчызы Ахимелехке чедип келген. Ахимелех Давидти дүвүрел-биле уткуп алгаш: «Чүге чааскаан сен? Чүге сээң-биле кым-даа келбеди?» – деп айтырган. 2Давид Бурганның бараалгакчызы Ахимелехке: «Хаан меңээ даалга бергеш: „Сени чүү дээш чорутканымны, кандыг даалга бергенимни кым-даа билбес болзун“дээн, ынчангаш улузумну бир черде арттырып кагдым. 3Силерде кандыг чем барыл? Беш хлебтен берип көрүңерем азы оон аңгы кандыг-даа чемден болза» – дээн. 4Бурганның бараалгакчызы Давидке: «Менде анаа хлеб чок, чүгле ыдыктап каан хлеб бар. Бир эвес сээң улузуң херээженнер-биле холбашпаан болза, чиирлер-ле ыйнаан» – дээн ▼▼ Ыдыктыг хоойлу ёзугаар чоокку үеде херээжен-биле холбашкан эр кижи арыг эвес апаар, а арыг эвес улус ыдыктаан чем чип болбас турган (Хост. 19:15; Лев. 15:18 көр).
. 5Давид Бурганның бараалгакчызынга: «Дүүн-даа, бурунгу хүн-даа бистиң-биле херээженнер турбаан. Мээң үнүпкеним хүнден бээр оолдарның савалары арыг. Бир эвес орук арыг эвес-даа болза, саваларда хлебтер арыг артып каар ▼▼ Бо шүлүктүң утказы эки билдинмес. Болгу дег өске утказы мындыг: «Ооң мурнунда дег, дайынчы аян-чорук үезинде мээң улузум херээженнерге дегбес. Анаа аян-чорук үезинде безин оларның мага-боттары арыг болур улус чүве. А бөгүн олар кажандан-даа артык арыг».
» – деп харыылаан. 6Бурганның бараалгакчызы аңаа Дээрги-Чаяакчының мурнундан ап каапкан ыдыктыг хлебтерни берген, чүге дээрге ында өргүл хлевинден өске хлеб чок турган d. Эрги хлебтерниң орнунга ыдыктыг черге чаа быжырган хлебтерни салыр турган. 7(Ол хүн аңаа Дээрги-Чаяакчының мурнунга Саулдуң дүжүметтериниң бирээзи, кадарчыларының даргазы эдом аймак-сөөктүг Доик деп кижи саадай берген турган чүве-дир.) e 8Давид Ахимелехтен: «Силерде чыда азы хылыш бар бе? Мен бодум хылыш-даа, өске кандыг-даа чепсек ап албаан-дыр мен, чүге дээрге хаанның даалгазы кончуг далаштыг болган» – деп айтырган. 9Бурганның бараалгакчызы: «Эла шынаазынга сээң тиилеп кааның филистим Голиафтың хылыжын хепте ораап каан чыдыр-ла, дуу эфод f артында. Оон өске мында кандыг-даа чепсек чок» – дээн. Давид: «О, оон артык хылыш кайын тыптыр! g Ону меңээ берип көрүңерем» – дээрге, ону ап берген. Давидтиң филистим черге чаштынганы
10Давид барып, Саулдан ол-ла хүн дезип чоруткаш, Геф хоорайның хааны Анхуска чедип келген h. 11Дүжүметтери Анхуска: «Бо дээрге дуу чурттуң хааны Давид эвес-тир бе? „Саул муң-муң, Давид түмен-түмен кижини тиилеп каан“ i деп ооң дугайында ырлажып, самнап турган эвес ийик бе?» – деп чугаалааннар. 12Ол сөстер Давидтиң сагыш-сеткилин хөлзедипкен, Гефтиң хааны Анхустан ол дыка коргуп турган. 13Ынчангаш кажан ону тудуп аарга, ол улустуң мурнунга арын-шырайын өскертип алгаш, солуу кижи өттүнүп, хоорайның хаалгазынга чүве чуруп, салынче чараазын бадырып шаг болган j. 14Анхус бодунуң дүжүметтеринге: «Көрзүңерзе, ол солуу кижи ышкажыл. Ону чүге бээр эккелдиңер? 15Бистиң черивисте солуу улус чок деп бодадыңар бе? Мээң мурнумга ол үеннезин дээш эккелдиңер бе? Таанда-ла ол мээң бажыңымче кирери ол бе?» – дээн.
Copyright information for
TyvTUV