1Sa 23 | TyvTUV | STEP | Давидке: «Филистимнер Кеила хоорайже халдааш, ында тараа шаңнарын үптеп туруп берген-дир»

‏ 1 Samuel 23

Давидтиң Кеиланың чурттакчыларын камгалап кааны

1 Давидке: «Филистимнер Кеила хоорайже ^a халдааш, ында тараа шаңнарын үптеп туруп берген-дир» – деп дыңнадыпканнар. 2 Давид Дээрги-Чаяакчыдан: «Баргаш, ол филистимнерни базып каайн бе?» – деп айтырган. Дээрги-Чаяакчы: «Бар, филистимнерни базып каапкаш, Кеиланы камгалап каг» – дээн. 3 Ынчалза-даа Давид-биле кады чораан улус аңаа: «Бис мында, Иуданың черинде безин, коргуп тур бис. Кеилаже филистим шеригге удур канчап баар улус бис?» – дээн. 4 Ынчан Давид Дээрги-Чаяакчыдан база катап айтырарга, Ол: «Бар, Кеилаже чорувут. Мен филистимнерни сээң холуңга берип каар мен» – деп харыылаан. 5 Давид бодунуң улузу-биле Кеилаже чорупкаш, филистимнер-биле дайылдашкан. Оларны кыргып-хыдып каапкаш, мал-маганын сүрүп аппарган. Ынчалдыр Давид кеилажыларны камгалап каан.

6 Ахимелехтиң оглу Авиафар Кеилада Давидче дезип чоруурда ^b, эфодту ^c база ап алган чүве-дир. 7 Ол өйде Саулга Давидтиң Кеилада чедип келгенин дыңнадырга, ол: «Бурган ону ам-на мээң холумга киирип бергени ол-дур. Чүге дээрге ол хааглыг болгаш дүкчүглүг хоорайда бодун кажаалап алган-дыр» – дээн. 8 Саул бодунуң бүгү шериин Кеилаже баргаш, Давидти база ооң улузун бүзээлээринче кыйгырган.

9 Давид Саулдуң аңаа удур багай чүве бодап алганын билип кааш, Бурганның бараалгакчызы Авиафарга: «Эфодту бээр эккел» – дээн ^d. 10 Давид мынча дээн: «Дээрги-Чаяакчы, Израильдиң Бурганы! Сээң чалчаң мен Саул Кеилага удур келгеш, бо хоорайны мен дээш узуткаар деп турарын дыңнап кагдым. 11 Кеилажылар мени ооң холунга хүлээдир бе? Сээң чалчаңның дыңнааны дег, Саул бээр кээр-дир бе? Дээрги-Чаяакчы, Израильдиң Бурганы! Чалчаңга меңээ чугаалап берип көрем».

Дээрги-Чаяакчы: «Кээр» – деп харыылаан.

12 Давид: «Кеиланың чурттакчылары мени болгаш мээң улузумну Саулдуң холунга бээрлер бе?» – деп айтырган.

Дээрги-Чаяакчы: «Хүлээдир-дир» – дээн.

13 Ынчан Давид болгаш ооң улузу, 600 хире кижи ^e, Кеиладан баш углаан черже үнүп чорупкан. Саулга Давид Кеиладан дезип чорупкан деп дыңнадыптарга, ол ынаар чорбайн барган.

Давид Зиф ховузунда

14 Давид ээн кургаг Зиф ховузунда даглыг быжыглалдыг черлерге турумчуп алган ^f. Саул ону хүннүң-не дилеп турган, ынчалза-даа Бурган Давидти ооң холунга хүлээтпээн. 15 Давид Зиф ховузунда Хореш деп черге Саул ону дилеп турарын көрүп турган. 16 А Саулдуң оглу Ионафан Хореште Давидке келгеш, ону деткип, Бурганга идегээринче хей-аът киирипкен. 17 Ол Давидке мынча дээн: «Кортпа, мээң ачам Саулдуң холу сеңээ четпес. Сен Израильди чагырып хааннаар сен, а мен сээң адааңда ийи дугаар кижи боор мен. Мээң ачам Саул ону билир ^g». 18 Олар Дээрги-Чаяакчының мурнунга боттарының аразында дугуржулга кылып алганнар ^h. Давид Хорешке артып калган, а Ионафан чана берген.

19 Зифтиң чурттакчылары Гивада Саулга чедип келгеш: «Давид бистиң Хореш деп черивисте, Иесимоннуң мурнуу талазында Гахила бүүрелчининде быжыглалдыг черде чаштып турар ⁱ. 20 Ынчангаш, хаан, келгеш, күзелиңерни боттандырып болур силер. А бистиң херээвис ону хаанның холунга хүлээдип бээривис болур» – дээннер.

21 Саул оларга: «Мени кээргээниңер дээш, Дээрги-Чаяакчы силерге ачы-буян хайырлазын. 22 Баргаш, ам база катап хынаңар, ооң барган черин, ону көрген улусту билип алыңар. Оон башка ол кончуг кажар кижи дээрзин меңээ улус чугаалап турар-дыр. 23 Ооң чаштып турар черлерин шуптузун билип алыңар. Ыяк билип алгаш кээриңерге, мен силер-биле кады чоруптар мен. Бир эвес ол ында болза, мен ону Иуданың чериниң хөй муң улузунуң аразындан дилээр мен».

24 Олар тургаш, Саулду мурнай Зифче чорупканнар. А Давид ынчан бодунуң улузу-биле Иесимоннуң мурнуу талазында Аравада ээн кургаг Маон ховузунга турганнар ^j. 25 Саул бодунуң шерии-биле ону дилеп чорупканнар. Давидке ооң дугайында дыңнадыптарга, ол хаялыг черже үне бергеш, Маон ховузунга артып калган. Саул ону дыңнап кааш, Давидти сүрүп, Маон ховузунче чорупкан. 26 Саул дагның бир талазынга чорда, Давид бодунуң улузу-биле өске талазынга турган. Давид Саулдан дүрген дезе бээр деп чорда, Саул шерии-биле ону тудуп аар дээш, оларны оюп чоруп орган. 27 Ынчан Саулга медээчи кижи келгеш: «Дүрген дедир чедип келиңер. Черивисче филистимнер халдап келди» – дээн. 28 Саул Давидти сүрерин ара каапкаш, филистимнер-биле тулчур дээш дедир чедип келген. Ынчангаш ол черни Села-Гаммахлекот ^{▼▼ Села-Гаммахлекот – «Адырлыышкын хаязы» дээн ат.} деп адап каан чүве-дир.