1Sa 25 | TyvTUV | STEP | Самуил өлүп калган. Бүгү израильчилер чыглып келгеш, ол дээш качыгдап ыглашканнар. Ону Рамага, бодунуң бажыңының чанынга ажаап кааннар . А Давид ээн кургаг Фаран ховузунче дүжүп бадып келген .

‏ 1 Samuel 25

Самуилдиң өлгени

1 Самуил өлүп калган. Бүгү израильчилер чыглып келгеш, ол дээш качыгдап ыглашканнар. Ону Рамага, бодунуң бажыңының чанынга ажаап кааннар ^a. А Давид ээн кургаг Фаран ховузунче дүжүп бадып келген ^b.

Навалдың харамы база Авигеяның мерген угаанныы

2 Маон хоорайга хөлчок бай-шыдалдыг бир-ле кижи чурттап чораан. Ооң ээлээн чери Кармил хоорайга турган. Ол 3000 хойлуг, 1000 өшкүлүг чүве-дир. Хой-өшкүзүн ол Кармилге кээп кыргып турган. 3 Ол кижиниң ады – Навал, ол Халевтиң төрел бөлүүнге хамааржыр ^c. А кадайының адын Авигея дээр. Ол херээжен угаанныг болгаш чараш, а ашаа каржы-дошкун болгаш чаңы багай кижи турган чүве-дир.

4 Давид ээн кургаг ховуга тургаш, Навал хоюн кыргып турар деп дыңнаан. 5 Давид он кижини чорудуп, оларга мынча дээн: «Кармилче баргаш, Навалга барып, мээң адымдан байыр чедириңер. 6 Аңаа: „Экии! Сеңээ, сээң өг-бүлеңге, бүгү-ле улузуңга менди-чаагай болурун күзедим. 7 Бөгүн мен сээң малың кыргып турар деп дыңнадым. Силерниң кадарчыларыңар бистиң-биле кады чорда, оларны хомудатпаан бис. Кармилге турда, оларның чүзү-даа читпээн. 8 Чалчаларыңдан айтырып көр даан, олар сеңээ чугаалап-ла бээрлер ыйнаан. Ынчангаш бо оолдарга энерелиң көргүзер боор сен, чүге дээрге бис сеңээ эки хүнде чедип келген бис. Бодуңнуң чалчаларың биске, оглуң Давидке чүнү берип шыдаар сен, шааң-биле берип көрем“– дээр силер».

9 Давидтиң улузу Навалга баргаш, ол сөстерни чугаалааш, харыызын ыыт чокка манап турганнар. 10 Навал Давидтиң чалчаларынга: «Иессейниң оглу Давид деп кым чүвел ол? Амгы үеде боттарының дээргилеринден дезип чоруп турар кулдар-ла хөй апарган-дыр. 11 Мен бодумнуң хоюм кыргып турар улузумга бээр дээн хлевимни, суумну база эъдимни кайыын-даа келгенин билбезим, танывазым улуска бериптер кижи мен бе?» – деп харыылаан ^d.

12 Давидтиң чалчалары дедир чедип келгеш, Навалдың сөстерин дамчытканнар. 13 Ынчан Давид: «Хылыштарыңарны астып белеткенип алыңар!» – деп бодунуң улузунга чугаалаан. Олары ок-чепсээн астып белеткенип алганнар. Давид база бодунуң хылыжын ап алган. Давид-биле кады 400 хире кижи чорупкан, 200 кижи турлаанга артып калган.

14 Навалдың кадайы Авигеяга бир чалчазы: «Давид ээн кургаг ховудан бодунуң медээчилерин дамчыштыр бистиң дээргивиске байыр сөс дамчыдыптарга, ол олар-биле каржы-хажагай чугаалашкан-дыр. 15 А ол улус бисти дыка эки аажылап турду. Бисти хомудатпаан-даа, бис олар-биле кады ховуга чорувуста, чүвүс-даа читпээн болгай. 16 Бис оларның чоогунга мал кадарып чорувуста, олар биске дүне-хүндүс дивейн камгалакчыларывыс болуп турдулар. 17 Ынчангаш сен чүнү канчалза эки болурун боданып көр. Оон башка бистиң дээргивиске болгаш ооң аал-оранынга айыыл болуру албан апарган-дыр. А ол дүржок кижи-дир ^e, ооң-биле чугаалажып болбас-тыр» – деп чугаалаан.

18 Авигея далаш-биле 200 хлеб, ийи улуг хөм савада арага, өзеп белеткеп каан беш хой, беш са ^{▼▼ Беш са 35 ажыг литр хире болур.} быжырган тараа, чүс шарыг үзүм, 200 шарыг фига чимизи алгаш, элчигеннерге чүдүрүп алган. 19 Ол бодунуң чалчаларынга: «Мени мурнай чоруп олуруңар, мен силерниң сооңардан чоруур мен» – дээн. А ашаанга чүнү-даа ыыттаваан.

20 Кажан Авигея элчигенин мунуп алгаш, дагның ээтпээнден хенертен үнүп кээрге, аңаа Давид болгаш ооң улузу уткужуп келген. 21 Ол үеде Давид мынча деп чугааланып турган: «Ээн кургаг ховуга ол кижиниң эт-хөреңгизин хей-ле кадарып турган-дыр мен. Аңаа хамааржыр чүведен чүү-даа читпээн болгай. Мээң кылган эки херээмге ол багы-биле харыылады. 22 Бир эвес мен эртен даң бажынга чедир Навалдың аал-оранында эрлерниң шуптузун кыра шаппас болзумза, Бурган мени ^{▼▼ Өске бурунгу сөзүглелде «мени» эвес, а «Давидтиң дайзыннарын» деп бижээн.} канчаар-даа кезеткей аан! ^h»

23 Авигея Давидти көрүп кааш, элчигенинден дүже халааш, ооң мурнунга доңгая кээп дүшкеш, черге чедир мөгейген ⁱ. 24 Ооң буттарынга кээп дүшкеш, ол чугаалаан: «Мээң дээргим, бүгү буруу меңээ онаашкай аан ^j. Шуптузун чугаалап бээрин чөпшээреп көрүңерем, мени дыңнап көрүңерем. 25 Мээң дээргим, ол дүржок кижиже, Навалче, кичээнгей салбайн көрүңерем. Ооң ады кандыгыл, боду база ындыг кижи-дир ол. Ооң ады Навал ^{▼▼ Навал дээрге «сээдең, бужар-бак» деп уткалыг ат.}, ооң угаан чогу адындан-на билдингир. А мен, силерниң чалчаңар, силерниң чорудупкан чалчаларыңарны көрбейн барган-дыр мен. 26 Дириг Дээрги-Чаяакчының ады-биле, силерниң адыңар-биле даңгыраглап тур мен, дээргим: бөгүн Дээрги-Чаяакчы силерни хан төгүүшкүнүнче чорутпады, силерниң холуңарны өжээн негээшкининче углавады. Силерниң дайзыннарыңар база силерге каржы сеткилдиг улус Навал ышкаш апарзын ^l.

27 Мен, силерниң чалчаңар, бо белектерни силерге, дээргимге, эккелдим. Бо белектерни мен силерни эдерип турар чалчаларыңарга бээр дээш эккелдим, дээргим. 28 Чалчаңар мээң буруумну өршээп көрүңерем. Дээрги-Чаяакчы силерниң салгалыңарны мөңге кылып каар. Чүге дээрге мээң дээргим Дээрги-Чаяакчының дайыннарын чорудуп турар-дыр ^m. Бүгү чуртталгаңарда силерге багай чүве черле болбас. 29 Бир эвес силерниң амы-тыныңарга чедер дээш, силерни истеп-сүрер кижи тыпты берзе, дээргим силерниң амы-тыныңарны Дээрги-Чаяакчы Бурганыңар карактап камгалаар, а силерниң дайзыннарыңарның кут-сүнезинин Ол Боду-ла даш дег үндүр октаптар. 30 Дээрги-Чаяакчы мээң дээргимге чугаалап турганы эки чүвелерин шуптузун кылып бергеш, силерни Израильдиң чагырыкчызы кылып каар. 31 Ынчан мээң дээргим хей черге хан төгүүшкүнү кылбайн, бодуңарның өжээниңер негээринден ойталаар болзуңарза, сеткил-чүрээңер оожум болур. Дээрги-Чаяакчы мээң дээргимге ачы-буянын чедирерге, силер чалчаңар мени сактып кээп көрүңерем».

32 Давид Авигеяга: «Сени бөгүн менче уткуй чорудупкан Израильдиң Бурганы Дээрги-Чаяакчыга алдар! 33 Бөгүн мени хан төгүүшкүнүнче болгаш өжээн негээшкининче чорутпааның дээш, сээң угааныңны база бодуңну алгап-йөрээп тур мен. 34 Дээрги-Чаяакчы мени сеңээ багай чүве кылырындан чайлаткан-дыр. Израильдиң дириг Бурганының ады-биле даңгыраглап тур мен: бир эвес сен меңээ уткуй далашпаан болзуңза, эртен даң бажынга чедир Навалдың аал-оранында эрлерниң шуптузун кыра шавар турган мен!» – дээн. 35 Давид Авигеяның эккелген белектерин ап алгаш: «Бажыңыңче амыр-тайбың чана бер. Мен сээң сөзүңнү дыңнадым, сенче ээ көрүндүм» – дээн.

36 Авигея Навалга чедип кээрге, ол бажыңында хаанныы дег улуг дой кылып турар болган. Ол хөглүг болгаш аажок эзирик болган. Авигея аңаа эртенге чедир чүнү-даа чугаалаваан. 37 Эртенинде Навал элээр апарганда, кадайы аңаа шуптузун чугаалап бээрге, ооң чүрээ чайлы бер часкаш, боду даш көжээ дег апарган. 38 Он хире хонук эрткенде, Дээрги-Чаяакчы Навалга кеземче онааптарга, ол өлүп калган.

39 Давид Навалдың өлүп калганын дыңнап кааш: «Навалдың мени куду көргениниң өжээнин негеп алган Дээрги-Чаяакчыга алдар! Навалдың каржы сеткилинге Дээрги-Чаяакчы кеземче онаан-дыр, а Бодунуң чалчазы мени багай чүве кылырындан чайлаткан-дыр» – дээн. Оон соонда Давид Авигеяже ону кадай кылдыр алыр дугайында сөс дамчыдыпкан. 40 Давидтиң чалчалары Кармилде Авигеяга чедип келгеш: «Бисти сенче Давид чорудупту. Ол сени кадай кылдыр алыксап турар-дыр» – дээннер.

41 Авигея дораан черге чедир мөгейгеш: «Көрүңер, дээргимниң чалчаларының буттарын чуур чалча болурунга безин белен мен» – дээн. 42 Авигея дүрген-не белеткенип алгаш, элчигенин мунупкаш, Давидтиң медээчилерин эдерип чорупкан. Ону беш чалча кыс үдеп чораан. Ол Давидтиң кадайы болу берген.

43 Давид Изреелден Ахиноаманы база кадай кылдыр ап алган. Ынчалдыр Авигея биле Ахиноама ийи Давидтиң кадайлары апарган ⁿ. 44 А Саул Давидтиң кадайы турган бодунуң уруу Мелхоланы Галлим чурттуг Лаиштиң оглу Фалтийге берипкен ^o.