‏ 1 Samuel 30

Давидтиң амалик чондан өжээн негээни

1Үш хүн эрткенде, Давид болгаш ооң улузу Циклагка ^a чедип келгеш көөрге, амаликтер Негевче база Циклагже халдааш, хоорайны эжелеп алгаш, өрттедипкен болган чүве-дир. 2А хоорайга турган херээженнерниң шуптузун улуг-бичези хамаан чокка өлүрбейн, тудуп алгаш, сүрүп аппарган болган. 3Давид бодунуң улузу-биле хоорайга чедип кээрге, ону өрттедипкен, а оларның кадайларын болгаш ажы-төлүн тудуп аппарган болган. 4Давид болгаш ооң улузу ал-шаан төндүр ыглажып-сыктажып алганнар. 5Давидтиң ийи кадайы – изреелчи Ахиноама база Навалдың кадайы чораан кармилчи Авигея ^b – олар база туттуругга барган чүве-дир. 6Давид берге байдалга келген. Улузу ону даш-биле соп кааптар бодап турган, чүге дээрге кижи бүрүзү бодунуң ажы-төлү дээш сагыш аарып турган.

7Ынчалза-даа Давид Дээрги-Чаяакчы Бурганынга бүзүрели-биле быжыгланып турган. Ахимелехтиң оглу, Бурганның бараалгакчызы Авиафарга ^c Давид: «Меңээ эфодту эккеп бер ^d» – дээрге, ол ону эккеп берген. 8Давид Дээрги-Чаяакчыдан: «Ол дээрбечилерни сүрейн бе, оларга чедер мен бе?» – деп айтырган. Дээрги-Чаяакчы: «Сүрүп чорувут. Оларга четкеш, бодуңнуң улузуңну эгидип аар сен» – дээн.

9Давид боду база ооң-биле кады 600 кижи ^e Восор хемге шаг-шинээ төнүп калган чедип кээрге, оларның чамдыызы аңаа доктааган. 10Давид 400 кижини эдертип алгаш, улаштыр сүрүп чорупкан. А 200 кижизи Восор хемни кежер шаг-шинээ чок болгаш, артып калганнар.

11Ховудан египет кижи тып алгаш, Давидке эккелгеннер. Олар аңаа аъш-чем бергеш, суг ижиртип кааннар. 12Аңаа элээн хөй кургадып каан фига чимизи, ийи шарыг үзүм бергеннер. Ону чигеш, ол күш кирип келген. Ол кижи үш дүн-хүн иштинде аъш-чем чивээн, суг ишпээн чүве-дир.

13Давид оон: «Сээң дээргиң кымыл? Кайыын келдиң?» – деп айтырган.

Ол: «Мен египет кижи мен. Бир амалик кижиниң кулу-дур мен. Аарый бээримге, мени дээргим октапкаш чоруй барды. Оон бээр ам үш хүн эртти. 14Бис Негевте керет аймактың чуртунче ^f, Иуданың аймааның чуртунче база Халевтиң төрел бөлүүнүң чуртунче ^g халдадывыс, а Циклагты өрттедиптивис» – деп харыылаан.

15Давид оон: «Ол дээрбечилерге мени чедирип каар сен бе?» – деп айтырарга, египет оол: «Мени өлүрбес база мээң дээргимниң холунга тутсуп бербес мен деп Бурганның ады-биле даңгыраглаар болзуңарза, мен силерни ол дээрбечилерге чедирип каар мен» – дээш ^h, 16ону эдертип чорупкан.

Көөрге, амаликтер бүгү чуртта тарай берген, филистим черден болгаш Иудеядан эккеп алган олчазын байырлап, аштанып-чемненип, дойлап турганнар. 17Давид оларже имиртиңде шаап халдааш, даартагы хүннүң кежээзинге чедир кыргып-хыдып каапкан. Олардан кым-даа дириг артпаан. Чүгле 400 аныяк кижи тевелер мунупкаш, дезе берген ⁱ.

18Амаликтерниң үптеп аппарган чүвезин Давид шуптузун ап алган, ийи кадайын база эгидип алган. 19Амаликтерниң үптеп алган чүүлдеринден улуг-даа, бичии-даа улузу, ажы-төлү-даа – чүү-даа читпээн, шуптузун Давид эгидип алган. 20Давид амаликтерниң бүгү шээр болгаш бода малдарын олчалап, боттарының малдарының мурнунга сүрүп аарга: «Бо Давидтиң олчазы-дыр» – дижип чорааннар.

Давидтиң тыпкан олчаны чөптүү-биле үлээни

21Давид Восор хемниң кыдыынга шаг-шинээ төнгеш, артып калган 200 кижиге чедип келген. Олар ону көрүп кааш, аңаа болгаш ооң-биле кады чораан улузунга уткуштур үнүп келгеннер. Давид оларга чедип келгеш, мендилешкен. 22Ынчан Давид-биле кады чораан улустуң аразында багай, дүржок кижилер: «Маңаа артып калгаш, бистиң-биле чорбаан улуска олчавысты бербес бис. Олар чүгле кадайларын болгаш ажы-төлүн ап алгаш чоруй барзыннар» – дижи бергеннер.

23Ынчалза-даа Давид мынча дээн: «Дээрги-Чаяакчы биске бо бүгүнү берген база бисти камгалап-карактап, биске удурланып келген дээрбечилерни холувуска хүлээдип берген соонда, ындыг чүве кылбайн көрүңер, ха-дуңма. 24Силер-биле кым чөпшээрежир деп? Дайынче чораан улус база эт-хөреңгивис кадагалаан улус олчаны деңге үлежир ужурлуг ^j». 25Ол хүнден эгелээш, ооң соонда-даа ол дүрүмнү сагыыр апарган. Ону хоойлуда бо хүннерге чедир Израильде сагып турар кылдыр киирип каан чүве-дир.

26Давид Циклагка чедип келгеш, эккелген олчазын Иудеяның баштыңнарынга, бодунуң өңнүктеринге: «Дээрги-Чаяакчының дайзыннарындан келген олчадан силерге белек берип тур бис» – дээш чорудуп берип турган. 27Ол белектерни Вефилче, Негевтиң Рамотче, Иаттирже, 28Ароерже, Шитмотче, Эштемоаже, 29Рахалче, иерахмеил база кен аймактарның хоорайларынче ^k, 30Хормаже, Хорашанче, Атахче, 31Хевронче база өске-даа – бодунуң улузу-биле барып турган бүгү черлеринче чорудупкан чүве-дир.