1Th 2 | TyvTUV | STEP | Бистиң силерге кээп чораанывыс түңнел чок болбаанын боттарыңар билир силер, ха-дуңма.

‏ 1 Thessalonians 2

Павелдиң Фессалоникага ажыл-чорудулгазы

1 Бистиң силерге кээп чораанывыс түңнел чок болбаанын боттарыңар билир силер, ха-дуңма. 2 Ооң мурнунда Филиппы хоорайга биске күштүг удурланыышкын болуп турда ^a, хилинчек көрүп, дорамчыладып турган-даа болзувусса (ол база силерге билдингир-дир), Бурганывыс биске Ооң Буянныг Медээзин силерге коргуш чок суртаалдаар арганы берген.

3 Силерни кыйгырган өөредивиисте кандыг-даа будулгаазынныг, чүдек-бужар сагыш чок, бис кымны-даа мегелевейн турар бис ^b. 4 А Буянныг Медээни суртаалдаарын дагзыры-биле Бурганның шылгааны улус дег чугаалап тур бис ^c. Ынчангаш бис чугаалап тура, улустуң эвес, а чүректеривисти билир Бурганның сеткили ханзын дээш, кызыткан бис ^d. 5 Шынап-ла, силер билир силер, кажан-даа авыяастап чорбаан бис, чажырар хире хуу ажык-кончаа сүрген сагыжывыс-даа чок турган; херечивис – Бурган ол-дур! ^e 6 – 7 Христостуң элчиннери болгаш, улустан онза хүндүлел негээр эргелиг-даа болзувусса ^f, силерден-даа, өске улустан-даа алдар-мактал дилевээн бис. Харын иениң чаш төлдери дээш сагыш човаары дег, силерге аажок уян-чымчак хамаарылга көргүстүвүс ^{▼▼ Өске бурунгу сөзүглелдерде «Чаш уруглар ышкаш болдувус» деп бижээн.}. 8 Силерге ындыг күштүг ынак болгаш ^h, чүгле Буянныг Медээни эвес, а амы-тынывысты силерге хүлээдип бээринге белен турдувус. Биске ол хире эргим болдуңар!

9 – 10 Ха-дуңма, кайы хире чилчик үзүлдүр ажылдап ⁱ, бергелерни эртип келгенивисти билир силер. Бурганның Буянныг Медээзин силерге суртаалдап тура, кайыңарны-даа шүүдетпес дээш, дүне-хүндүс дивейн ажылдап, бүзүрээн силерге хамаарыштыр боттарывысты Бурганның мурнунга арыг-шынчы, төлептиг ап келгенивисти билир силер, Бурган база ону херечилээр. 11 Ада кижиниң ажы-төлүн эки көөрү дег ^j, силерниң кижи бүрүзүн ынчаар эки көрүп келгенивисти билир силер: 12 «Бодунуң өндүр бедик Чагыргазынче ^k силерни кыйгырган Бурганның мурнунга төлептиг чурттаңар» – деп, бис силерни сорук киирип, өөредип база үттеп-сургап келген бис.

Иудеяда христианнарның үлегери

13 Бистен дыңнааныңар Бурганның медээзин хүлээп аарда, ону кижи сөзү дег эвес, а ооң херек кырында кандыызы дег: бүзүрей бээриңерге, силерге күчүлүг салдар чедирип турар Бурганның сөзү дег кылдыр хүлээп алган силер ^l. Үзүк-соксаал чокка Бурганга өөрүп четтиреривистиң база бир чылдагааны ол-дур. 14 Иудеяда турар Христос Иисуска башкарткан Бурганга бүзүрээннер ниитилелиниң үлегерин эдерген болгай силер, ха-дуңма ^m. Чүге дээрге оларның иудейлерден когарааны дег, силер база боттарыңарның-на чаңгыс чер чурттугларыңардан когарап турар-дыр силер ⁿ. 15 Иудейлер, ооң мурнунда медээчилерин өлүрүп турганнары дег ^o, Дээрги Иисусту өлүрүп кааннар, а бисти истеп-сүрүп турганнар ^p. Оларның ажыл-херээ Бурганга таарымча чок база бүгү кижи төрелгетенге удур бооп турар. 16 Олар биске камгалал дугайында Буянныг Медээни өске чоннарга чедиреринге шаптык кадып ^q, ооң-биле бачыттарының аяан долдуруп турарлар. Ынчалза-даа Бурганның килеңи ам-на оларның кырынче чылча дүжер! ^r

Павелдиң Фессалоникаже аажок катап келиксээни

17 Ха-дуңма, кезек өйде бисти силерден чарыптарга, сеткиливис тудуш харылзаалыг хевээр-даа болза ^s, өскүссүрээн дег бооп, силер-биле арын көржүп ужуражырын аажок күштүг күзеп келдивис. 18 Ийе, бис силерже катап медээжок келикседивис, Павел мен база чаңгыс эвес удаа чеде бээрин шенедим, ынчалза-даа эрлик бистиң оруувусту дуй туруп турду ^t. 19 Силер эвес болза, өске кымнар идегеливис, өөрүшкүвүс боорул? Дээргивис Иисус чедип келгеш, шаңнал кылдыр оваадай бээрге, өске кымнарга чоргаарланып болур бис? ^u 20 Ийет, ылап-ла силер – чоргааралывыс болгаш өөрүшкүвүс силер!